IGIHE.com > Amakuru > U Rwanda
 Umwiherero : Perezida Kagame yasabye abayobozi kunoza imikorere n’imikoranire

Umwiherero : Perezida Kagame yasabye abayobozi kunoza imikorere n’imikoranire


Yanditswe kuya 28-03-2013 - Saa 16:45' na Meilleur Murindabigwi

Ikibazo cy’imikoranire hagati y’inzego za leta, kuzuzanya kwazo, inama z’urudaca zitagira ibyemezo bizikurikira bwangu, ubumenyi bucye kuri bamwe ; ni zimwe mu mpamvu zagaragarijwe mu mwiherero w’abayobozi nka nyirabayazana mu kutesa imihigo uko bikwiye kwa zimwe mu nzego za leta ndetse no kudindira kw’ibiba bigomba kugerwaho.

Mu ijambo Perezida Paul Kagame yagejeje ku bayobozi bagera kuri 300 bateraniye mu mwiherero ngarukamwaka w’iminsi itatu, uri kubera mu ishuri rya Gisirikare rya Gabiro mu Karere ka Gatsibo ku nshuro ya cumi, yashimye kuba nubwo u Rwanda rwaranyuze mu bibazo bikomeye mu mwaka ushize birimo guhagarikwa kw’inkunga, ubukungu bw’u Rwanda bwazamutseho 8%, ariko agaruka ku mikorere idahwitse igaragara muri zimwe mu nzego ndetse ishobora kubera inzitizi iterambere.

Umukuru w’Igihugu yibanze ku kibazo cy’imikoranire y’inzego, yagize ati “Mu kigo runaka, muri Minisiteri runaka ubwabyo iyo abantu barimo badakorana, batuzuzanya, batajya inama ngo buri wese azane imbaraga yuzuzanye n’undi, ni ikibazo (…)ntugera ku musaruro wagombaga kugeraho.”

Imwe mu ngingo ziri kwibandwaho muri uyu mwiherero, iy’ibanze ni ukurebera hamwe icyakorwa kugirango ubukungu bw’u Rwanda bubashe kuzamukaho 11,5% hagati y’uyu mwaka wa 2013 na 2017, gusa Perezida Kagame yavuze ko iyi ntego yazatambamirwa no kutanoza imikoranire hagati y’inzego hatagize igihinduka.

Mu bitabiriye uyu mwiherero ufite insanganyamatsiko igira iti "Dukorere hamwe tugamije kugera kuri gahunda y’imbaturabukungu icyiciro cya kabiri" harimo abayobozi bo mu nzego zitandukanye uhereye ku Mukuru w’Igihugu, abayobozi bo mu nzego zitandukanye zirimo Sena, Umutwe w’Abadepite, minisiteri zitandukanye, inzego z’umutekano, abayobozi b’ibigo bitandukanye bishamikiye kuri leta, abayobozi b’uturere n’ab’inzego z’abikorera ku giti cyabo.

Mu minsi itatu bazamara i Gabiro bigira hamwe icyarushaho guteza imbere igihugu ndetse hanashakirwa umuti ibibazo bitandukanye, abayobozi bose babaho mu buzima butandukanye n’ubwo basanzwe babamo bya buri munsi, kuko usibye kuba bose baba barasize amamodoka yabo bakazanwa muri bisi, barara mu byumba binini bya rusange, mu gitondo bakabyuka bakora imyitozo ngororangingo bita "mucaka mukaca", ubundi bagasangirira hamwe, yewe no kuryama bakaryamira rimwe.

Ikigo kiri gukorerwamo uyu mwiherero mu gihe cy’amezi abiri cyaravuguruwe hubakwa inyubako nshya zirimo icyumba cy’inama gishobora kwakira abantu barenga 1000 n’andi mazu menshi, byose byakozwe mu gihe gito cyane ugereranyije n’ingano n’imiterere y’ibyo bikorwa.

Umwaka ushize inama nk’iyi yari yabereye i Gako mu Karere ka Bugesera. Mu myanzuro yari yahafatiwe igera kuri 53, yagezweho ku kigero cya 81,1%, naho 14,7% byayo bigerwaho mu buryo bucagase, naho 4,2% byayo kugeza muri Werurwe uyu mwaka byari bitaratangira gukorwa na mba.

Uyu mwiherero uzasozwa kuwa Gatandatu hafatwa imyanzuro mishya izashyirwa mu bikorwa mu gihe cy’umwaka.


Umunsi wa mbere w’umwiherero

Perezida Paul Kagame, Minisitiri w'Intebe Pierre Damien Habumuremyi na Minisitiri w'umutekano Musa Fadhil Harerimana
Umugaba mukuru w’ingabo Gen Charles Kayonga na Perezida Kagame
Perezida Kagame ageza ijambo ku bitabiriye umwiherero

<imgc30172|center>

Abayobozi bageze i Gabiro babyukiye muri mucaka mucaka
Abayobozi mu myitozo ngororangingo

Amafoto/Village Urugwiro

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO