IGIHE.com > Amakuru > U Rwanda
Umunyekongo ukekwaho guhinga urumogi yafatiwe mu Rwanda

Umunyekongo ukekwaho guhinga urumogi yafatiwe mu Rwanda


Yanditswe kuya 22-06-2012 - Saa 14:40' na Jotham Ntirenganya.

Polisi yataye muri yombi Umunyekongo ukekwaho guhinga kandi agacuruza urumogi mu Rwanda arukuye mu gihugu cya Congo Kinshasa, ubu noneho kandi bamwe mu Banyarwanda baribashinzwe kuruhunika, kurucuruza, ndetse no guhuza abaguzi n’abaranguzi barwo,nabo bafatiwe i Kigali kuri uyu wa Gatanu tariki ya 22 Kamena 2012.

Uwa fashwe bwambere ni Hagenimana Patrick akaba yafatanywe ibiro 55 by’urumogi mu Karere ka Nyarugenge, Umurenge wa Kimisagara, Akagari ka Kamuhoza, akaba ngo yari yahawe ibihumbi 10 na Damscène utuye i Rwamagana kugirango ajye arumurindira.

Gusa nyiri iyi nzu Ndatimana Raphaël nawe avuga ko uburyo iyi nzu yakingwaga hifashishijwe ingufuri nyinshi bitari bisanwzwe, n’ubwo avugako batigeze bamenya ko harimo urumogi, kandi bari bimukiyemo vuba cyane ko binjiye mu gipangu cye bwije cyane.

Ndatimana kandi avuga ko ubwo Polisi yazaga gufata urumogi, Hagenimana nyiri kururinda yabanje kwanga gukingura, kugeza ubwo ingufuri bari hafi kuyimena aribwo yabonye gukingura.

Umuyobozi wa Station ya Polisi Nyamirambo Festus Muvara (CIP) wari uyoboye ikigikorwa yavuze ko kugirango bafate uru rumogi byatewe n’imikoranire myiza n’abaturage bahatuye. Yongeraho ati:”Nta kindi kiri muri iyinzu uretse urumogi na matela yo kuraraho bigaragara ko yakodesherejwe guhunika ibiyobyabwenge gusa”.

Nyamara kandi nkuko bigaragara ku mifuka y’urwo rumogi hari amazina atandukanye y’abanyemari bakora ubucuruzi bwarwo, ndetse bigaragarako imifuka iva mumahanga itumijwe n’abantu batandukanye, ari nayo mpamvu bashyiraho amazina kuri buri mufuka.

Hagati aho no kuri Station ya Polisi ku Muhima hakaba naho hafungiye umugore utuye mu Karere Gasabo, Umurenge wa Kimironko, mu Kagari ka Nyagatovu, ufite ibiro 8 by’urumogi.

Avuga ko uru rumogi rwazanywe n’umuntu maze akarubitsa umugabo we, ngo ruvuye ku muntu bita Boss. Ubwo kandi uwo avuga, aherutse gufatwa kandi IGIHE cyamusanze ku Rukiko rw’Ibanze rwa Nyarugenge, akekwaho kuruhinga muri Congo akarushora mu Rwanda.

Nubwo abacuruzi b’urumogi bamwita Boss, ubusanzwe yitwa Murhabazi Chivura Moise, akaba aregwa kuruhinga i Masisi muri Congo, akarucuruza mu Rwanda. Yemera ko yashoye ibifpunyika bingana n’ibihumbi 15 by’urumogi, nubwo polisi ivuga ko akekwaho ibihumbi 400 by’ibifpunyika byarwo.

Nkuko Spt Ngondo Emmanuel ushinzwe kurwanya ibiyobyabwenge muri Polisi y’u Rwanda yabitangarije IGIHE, hari abantu benshi bakorana n’uyu Munyekongo bakanamufasha gukwirakwiza urumogi mu gihugu.

Ngondo kandi yavuze ati: ”Chivura Moise azana urumogi mu modoka itwara imbaho, kuko afite uruganda ruzitunganya mu Rwanda, bityo aruvanga mu mbaho hagati kugirango tutamufata”. Muri uwo mwanya kandi Ngondo ubwo yavuganaga n’IGIHE, urumogi rwahise rufatirwa ku Gitikinyoni rutwawe mu bikoresho bitwara amata.

Yahise atangariza IGIHE ko abacuruza ibiyobyabwenge basigaye barize ubwenge bwinshi bwo kubitwaramo, harimo kubitwara munda, kubyambariraho, ndetse no kubitwara mu bikoresho umuntu atakeka ko byatwarwamo urumogi.

Yongeraho ati: ”Inzira zose binyuramo Polisi yiyemeje kuzimenya byanze bikunze”. Yongeraho ko kuba abacuruzi n’abahinzi b’urumogi batangiye gufatwa, biri muri gahunda biyemeje yo kwibanda kubahinga kandi bakanacuruza ibiyobyabwenge kurusha ababinywa batazi iyo bivuye cyane ko abo kumuhnda bamwe ngo usanga n’ubundi ubwenge bwarayobye.

Muri irifatwa ry’urumogi kandi hafashwemo n’umunyeshuri wiga muri Kaminuza ya ULK mu gashami k’amategeko, we akora umurimo wo guhuza abaranguzi n’abacuruzi b’urumogi. N’ubwo inzego za Polisi zageze mu nzu y’uyu munyeshuri Bayingana Justin mu masaha ya mugitondo nta rumogi rwabonetsemo.

Yabwiye polisi ati:” Nk’umuntu wiga amategeko njye sinakwemera ko urumogi rurara mu nzu yanjye”. Yongeraho ati:” Nabikoraga ngirango nibonere agafaranga k’ishuri, ndebe ko nabonamo n’itike kandi simfite n’umuntu wo kundihirira ishuri”. Yongeraho ati: “Mumbabarire sinzongera”.

Gusa yemeye ko ashobora kuzagaragaza abantu bose bacuruza urumogi, kandi yanasabaga uruhushya ngo ajye gukora ibizamini. Bayingana yanditse ku mpapuro za Polisi bimwe mubyo azakora kugirango ayifashe kugera ku makuru amwe namwe, yemerako azafasha cyane Polisi kumenya ibiruseho.

Umunyekongo Murhabazi Chivura Moise

Foto:Ntirenganya J.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO