IGIHE.com > Amakuru > U Rwanda
Ubuyobozi bwa Gereza buranyomoza amakuru avuga ko Mugesera afashwe nabi

Ubuyobozi bwa Gereza buranyomoza amakuru avuga ko Mugesera afashwe nabi


Yanditswe kuya 19-11-2012 - Saa 07:54' na IGIHE

Nyuma y’uko ikinyamakuru cyo muri Canada kitwa “Le Soleil” cyanditse inkuru ivuga ko Leon Mugesera ufunzwe akekwaho kugira uruhare muri Jenoside yakorewe Abatutsi yaba afashwe nabi, umuyobozi ushinzwe imibereho myiza n’uburenganzira bw’imfungwa, Dativa Ngaboyisonga Mukanyangezi aratangaza ko iyo nkuru yuzuyemo ibinyoma kuko ubusanzwe ngo uwayanditse atigeze agera mu Rwanda cyangwa se ngo abaze n’ubuyobozi bwa Gereza afungiyemo.

Mu kinyamakuru “Le Soleil” bari basohoye inkuru ivuga ko Leon Mugesera afashwe nabi, ahabwa indyo imeze nabi kandi igamije kumwica bakongeraho ko ngo yaba arara ahantu habi.

Ibi rero ngo siko bimeze kuko ubwo itangazamakuru ryasuraga Mugesera ryasanze aba mu cyumba cya wenyine harimo ibikoresho bya ngombwa birimo Radio, computer ndetse na Printer byose yifashisha mu mirimo ye ya buri munsi.

Mukanyangezi agira ati “Ikinyamakuru cyasohoye inkuru ivuga ko Mugesera yitegura kurega Leta ya Canada kuko yamuzanye mu Rwanda akaba afashwe nabi.”

Mukanyangezi ati ”Ibi sibyo kuko tumuha uburenganzira bwe nk’imfungwa hari n’igihe tumuha ibirenze iby’abandi babona kandi tuzi neza ko afashwe neza.”

Ubuyobozi bwa gereza buvuga ko Mugesera afatira ifunguro aho abayobozi barifatira ikindi kandi ahabwa telefoni yo gukoresha igihe cyose abishakiye kandi ngo akishyurirwa ibyo yakoze byose.

Ku bijyanye naho arara bigaragara ko afite uburiri bushashe buriho na supernet ndetse n’ibindi bijyana n’aho umuntu arara.

Ku rundi ruhande ariko ubwo itangazamakuru ryageragezaga kuvugana na nyirubwite yatangaje ko atiteguye kuvugana n’itangazamakuru.
Mugesera yagize ati “Mumbabarire niba mwemera ko mfite uburenganzira bwo kutavugana n’itangazamakuru. Iyo mfite ikibazo mvugana n’ubuyobozi bwa gereza.”

Impapuro zigaragaza ko Mugesera ahura n’umuburanira byibuze inshuro eshanu mu cyumweru kandi ngo bavugana uko bashatse ntawubahagaze hejuru.

Mugesera wahoze ari umwarimu muri Kaminuza ashinzwa ibyaha birimo ijambo yavuze ribiba urwango akaba yararivuze mu 1992 rikaba ngo rifitanye isano n’amahano ya Jenoside yakorewe Abatutsi muri Mata 1994.

Ubu Leon Mugesera afungiwe muri Gereza nkuru ya Kigali izwi ku izina rya 1930.

The New Times

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO