IGIHE.com > Amakuru > U Rwanda
U Rwanda rurizihiza Yubile y’imyaka 50 rubonye ubwigenge

U Rwanda rurizihiza Yubile y’imyaka 50 rubonye ubwigenge


Yanditswe kuya 30-06-2012 - Saa 19:50' na IGIHE

Ku wa 01 Nyakanga 2012, u Rwanda ruzizihiza Yubile y’imyaka 50, (01 Nyakanga 1962-01 Nyakanga 2012) rumaze rubonye ubwigenge.

Uwo munsi uzizihirizwa n’isabukuru imyaka 18 ( 01 Nyakanga 1994 - 01 Nyakanga 2012) , Abanyarwanda bose bamaze bibohoye ingoma y’igitugu aho kuba ku wa 04 Nyakanga nk’uko byari bimenyerewe.

Mu itangazo rigenewe abanyamakuru Minisiteri y’Ubutegetsi bw’Igihugu n’imibereho y’abaturage, rivuga ko Ubukoloni bwasigiye u Rwanda umurage mubi w’amacakubiri, ivangura, imiyoborere mibi, urwikekwe, ihezwa n’ibindi mu bana b’u Rwanda, ngo ibyo byaje kuvamo iyicwa, icibwa ndetse n’akato kuri bamwe mu Banyarwanda.

Ibyo ngo byasize inyagwa, gutwikirwa n’ibindi bibi byinshi byakorerwaga abantu bamwe byose ku mabwiriza y’ubutegetsi bubi bwariho icyo gihe, ibyo byakorwaga kandi byitwa ko ari uguharanira ubwigenge.

Ibyo ngo byakomeje bityo Abanyarwanda bagendera kuri iyopPolitiki mbi n’inyigisho mbi z’Abakoloni , imbuto yo kutiha agaciro, batozwa umuco mubi wo guhora basabiriza no guhora bategereza ak’ i Muhana, aho gutozwa guhora bashaka uburyo bwo kwihesha agaciro no kwishakamo ibisubizo by’ibibazo bafite bagahora bumva ko ibibazo bafite bizakemurwa n’abandi.

Iri tangazo nk’uko Izuba Rirashe dukesha iyi nkuru ribivuga rikomeza rivuga ko mu 1994 Leta yariho yateguye kandi ishyira mu bikorwa Jenoside igamije kurimbura igice kimwe cy’Abenegihugu, bagizwe cyane cyane n’Abatutsi, kimwe n’undi wese utarashyigikiye politiki mbi yariho.

Ku wa 04 Nyakanga imyaka 18 izaba ishize ingabo zari iza RPA zihagaritse Jenoside yakorewe Abatutsi. Nyuma y’aho ngo Abanyarwanda biyemeje bidasubirwaho kwiyubakira igihugu kizira ivangura iryo ari ryo ryose, bihesha agaciro, bashimangira indangagaciro na kirazira by’Umuco Nyarwanda kandi bishakamo ibisubizo.

Minisiteri y’Ubutegetsi bw’igihugu irishimira ibimaze kugerwaho byinshi ku bufatanye bw’abaturage n’inzego z’imitegekere y’igihugu , ahanini ngo bikaba bishingira ku nkingi enye za Guverenoma. : Ubukungu, Imiyoborere myiza, Ubutabera n’imibereho myiza.

Ikindi cyakozwe gituma Abanyarwanda batera imbere ku buryo bushimishije ngo ni gahunda y’icyerekezo 2020 u Rwanda rwihaye, aho buri Munyarwanda icyo gihe azaba ashobora kwinjiza nibura amadolari y’Amerika 1,500 ku mwaka.

Perezida Kayiobanda afata ijambo ubwo u Rwanda rwahabwaga ubwigenge 1962

Minisiteri y’Ubutegetsi bw’Igihugu ikaba isaba kandi yifuriza buri Munyarwanda wese gukomeza gutera imbere no kugira uruhare n’ijambo mu bimukorerwa, gukomeza umuco wo guhiga n’ibindi bituma umunyarwanda agira agaciro.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO