IGIHE.com > Amakuru > U Rwanda
U Budage: Minisitiri Mushikiwabo yasobanuriye Abadepite ukuri ku Rwanda

U Budage: Minisitiri Mushikiwabo yasobanuriye Abadepite ukuri ku Rwanda


Yanditswe kuya 31-01-2013 - Saa 21:39' na IGIHE

Minisitiri w’ububanyi n’amahanga w’u Rwanda, Louise Mushikiwabo, yaganiriye n’abadepite b’Inteko Ishinga Amategeko y’u Budage muri komisiyo zitandukanye abasobanurira ku ngingo zitandukanye bashobora kwibaza ku Rwanda, harimo n’irebana n’umutekano w’Uburasirazuba bwa Congo Kinshasa, waje no gutuma umubano w’u Rwanda n’u Budage uzamo agatotsi.

Minisitiri Louise Mushikiwabo ari kumwe na Ambasaderi w’u Rwanda mu Budage yaganiriye kuri uyu wa kane 31 Mutarama 2013 mu murwa mukuru w’u Budage i Berlin, n’abadepite ba komisiyo ishinzwe ubutwererane n’ubukungu, n’ishinzwe ububanyi n’amahanga n’uburenganzira bwa muntu no guteza imbere imibereho myiza.

Mushikiwabo yabanje gushimira u Budage inkunga bwatanze mu myaka myinshi ishize, anagaruka no ku gatotsi kajemo nyuma y’aho u Rwanda rushinjwe na raporo y’impuguke za Loni ko rufasha inyeshyamba z’umutwe wa M23, u Budage na bwo bukayishingiraho kandi Leta y’u Rwanda yaragaragaje ibimenyetso ko ibivugwamo ari ikinyoma, igafata icyemezo cyo guhagarika inkunga bwarugeneraga .

Mushikiwabo yabagaragarije ko u Rwanda rwatunguwe no kubona u Budage kimwe n’ibindi bihugu n’imiryango nterankunga byaragaragaje ko bihangayikishijwe n’ikibazo cy’uburasirazuba bwa Kongo bigahagarika cyangwa bigakerereza inkunga bageneraga u Rwanda.

Akomeza avuga ko nubwo byagenze gutyo, gutanga inkunga cyangwa kutayitanga ari uburenganzira bwabo. Ariko yibukije ko inkunga u Rwanda rwabonaga ruyishimira, kandi rwanayikoreshaga neza.

Mushikiwabo yabwiye abadepite b’Abadage ko Abanyarwanda babikuyemo isomo, ko bagomba gushaka uburyo bwo kudategereza gutungwa n’inkunga gusa, ariko u Rwanda rukaba rutanakwirengagiza uruhare rukomeye abaterankunga banyuranye, cyane cyane u Budage, bagize mu gusana u Rwanda nyuma ya 1994.

Minisitiri Louise Mushikiwabo (Hagati) n'Ambasaderi Christine Nkurikiyinka imbere y'Abadepite b'u Budage muri za Komisiyo

Mushikiwabo yabagaragarije by’umwihariko ko nta nyungu u Rwanda rwaba rufite mu guteza umutekano muke muri Congo, rufasha M23, ati “Inyungu z’igihugu ntizagerwaho binyuze mu ntambara cyangwa amakimbirane ayo ariyo yose, byahe byo gatabwa, ahubwo umudendezo, amahoro nibyo byadufasha! Congo itekanye, ifite amahoro, niyo yafasha u Rwanda mu iterambere.”

Mushikiwabo yagaragaje ko u Rwanda rwifuza bidasubirwaho ko Congo igira mahoro, n’ikimenyimenyi rukaba rwari rwiteguye gushyira umukono ku masezerano yari yateguwe na Loni yo kugarura amahoro mu Burasirazuba bwa Congo yagombaga gusinyirwa i Addis Abeba mu nama ya 20 y’Ibihugu bigize umuryango w’Afurika Yunze Ubumwe ku wa 28 Mutarama 2013.

Ariko ntiyasinywe kuko ibihugu bimwe mu munani yarebaga kuyashyiraho umukono byahisemo kwifata, none amasezerano akaba asa nari mu cyeragati; u Rwanda rugakomeza kubahanagarira gushishikazwa no gushaka umuti urambye aho kwihutira ibisubizo by’akanya gato, hitabwa ku mpamvu nyazo zitera ibibazo abatuye kariya karere kamaze igihe kirekire karangwa n’amakimbirane y’urudaca.

Mu bindi birebana n’umutekano, Mushikiwabo yagaragaje ko n’ubwo u Rwanda rwatereranwe muri Jenoside rwashyize imbere ubumwe n’ubwiyunge, kandi rugaharanira kubungabunga amahoro hirya no hino ku isi nka Darful muri Sudan na Haiti, aho rwohereza abasirikare cyangwa abapolisi, kandi bahagera bagashimirwa imyitwarire myiza.


U Rwanda rugenda rutera imbere

Mushikiwabo yagaragarije abo badepite bo muri izo komisiyo ko u Rwanda rwakoze byinshi mu guhindura imibereho y’Abanyarwanda, nko muri gahunga y’imbaturabukungu EDPRS. Yabagaragarije ko kuva mu 2005, hari benshi bavuye munsi y’umurongo w’ubukene, ku buryo hari ikizere ko icyerekezo 2020 u Rwanda rwihaye kizagerwaho.

Ashimira inkunga y’ishami ry’iterambere rya Leta y’u Budage GIZ inyuzwa mu ngengo y’imari n’ahandi, mu gufasha u Rwanda muri gahunda yo kurwanya SIDA, kuboneza urubyaro n’ubwisungane mu kwivuza.

Ikindi kandi hakaba mu buzima haragabanutse umubare w’abahitanwa na malariya kuva mu 2005 kugeza 2011, zagabanutse ku kigereranyo cya 87,3%; hagati y’umwaka w’2000 n’2010 umubare w’abana bapfa bavuka wagabanutse ku kigereranyo cya 59.5%; Abana bapfa batarageza imyaka 5 bagabanutse kugera kuri 70.4% hagati y’umwaka wa 2000 na 20111, iki gipimo twagezeho kiri munsi y’ikigereranyo rusange cyo mu karere duherereyemo ndetse kikaba gisatira ikigereranyo ku rwego rw’isi, bikomeje gutyo bikagaragaza ko , u Rwanda ruzaba ari icyo gihugu cyonyine mu karere kiri mu nzira yo kugera kuri buri Ntego z’Ikinyagihumbi (MDG) mu rwego rw’ubuzima muri 2015 nk’uko biheruka gutangazwa n’ikinyamakuru British Medical Association mu ntangiriro z’uku kwezi.

Si mu rwego rw’ubuzima gusa, Mushikiwabo yashimiye uburyo GIZ muri 2011, yabonye ko bikenewe ifasha mu iterambere ry’urwego rw’abikorera, itanga amahugurwa ku bakozi no kwegereza ubuyobozi abaturage.

U Rwanda kandi rukomeza gushyira imbaraga mu kwegereza ubuyobozi abaturage, hatibagiranye no guteza imbere abagore nabo bagira uruhare mu iterambere ry’igihugu, abana b’abakobwa mu mashuri abanza bakaba barenga 90% by’abagomba kuba biga.

Minisitiri w’ububanyi n’amahanga w’u Rwanda, Louise Mushikiwabo, yasobanuriye Abadepite b’Abadage birambuye uburyo u Rwanda ruteza imbere abaturage barwo, rugashyigikira no kubungabunga amahoro hirya no hino ku isi, ko ntaho rwajya kuyabuza.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO