IGIHE.com > Amakuru > U Rwanda
Rukumberi: Abacitse ku icumu rya Jenoside muri gahunda yo kwibuka amatongo y’iwabo

Rukumberi: Abacitse ku icumu rya Jenoside muri gahunda yo kwibuka amatongo y’iwabo


Yanditswe kuya 24-01-2013 - Saa 11:44' na Kayonga Epimaque/Ngoma

Mu gihe hasigaye amezi make ngo hibukwe ku ncuro ya 19 Jenoside yakorewe Abatutsi mu Rwanda, Umuryango ARG Rukumberi (Association des Rescapés du Génocide de Rukumberi) wo mu karere ka Ngoma, watangije igikorwa cyo gushyira ibuye ry’urwibutso ku matongo y’imiryango yabo yishwe muri Mata 1994.

Icyo gikorwa cyitabiriwe n’abacitse ku icumu rya Jenoside yakorewe Abatutsi mu 1994 bo muri Rukumberi hamwe n’Umuryango Remember Tutsi Genocide wo mu Bubiligi gitangizwa ku miryango 15 ariko kikazakomeza.

Icyo kikaba ikimenyetso cy’icyubahiro cyo kugira ngo abazajya banyura aho kiri bajye bazirikana ko abishwe bari umuryango mugari, batazize icyorezo cyangwa impanuka ahubwo bishwe n’interahamwe zari ziturutse imihanda yose hamwe n’iz’i Rukumberi bari baturanye kandi baziranye zibaziza kuba Abatutsi.

Ibyari byanditse ku myenda yari yambawe

Umuyobozi w’umuryango Remember Tutsi Genocide wo mu Bubiligi, Eugene Mutabazi, yatangarije IGIHE ko icyo gikorwa kigamije kwerekana ko aho hantu hari hatuwe. Ibi ngo akenshi biterwa n’uko hari abacitse ku icumu bakiri bato batibuka aho bavukiye bakanaharererwa.

Mutabazi ati "amateka ya Rukumberi ni maremare kuva mu 1959-1994, kuko hari haraciriwe Abatusi baturutse mu cyahoze ari Gitarama, Butare, Gikongoro n’ahandi.”

Umuryango Remember Tutsi Genocide wafashije no mu gikorwa cyo kubarura amazina y’abantu basaga ibihumbi cumi na bitanu biciwe muri ako gace, akaba yarashyizwe ku rubuga rw’uwo muryango. Hakozwe n’inyigo yo kubaka urwibutso rwa Rukumberi.

Umuhuzabikorwa wa ARG Rukumberi Kabandana Callixte, asaba abarokotse Jenoside gukomeza kwigirira icyizere no kwihesha agaciro, aho guhora bitwa abatishoboye.

Umunyamabanga Nshingwabikorwa w’Umurenge wa Rukumbeli, Nyamutera Emmanuel, yashimiye ARG Rukumberi ibikorwa byayo bikomeje guha agaciro abazize Jenoside. Akomeza avuga ko icyakozwe gifasha abakiri bato kugira ngo bagire aho bavugira, bityo agace ababyeyi babo bari batuyemo katazazima ahubwo barusheho kubaka amateka.

Ku birebana n’uburyo bwo kwita kuri ibyo bimenyetso aho byashyizwe yatangarije, Nyamutera yatangarije IGIHE ko habayeho igikorwa cyo gukangurira abaturage ibigiye kuhakorerwa n’akamaro kabyo, kandi bakazibandana no gukorera amarondo aho hantu batibagiwe n’isuku yaho.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO