Rubavu:Abanyarwanda babiri bishwe n’amasasu, abandi batangiye guhunga

Guhera ku mugoroba wo kuri uyu wa Mbere, Abanyarwanda batuye mu Murenge wa Gisenyi n’indi yegereye umupaka batangiye guhunga, berekeza mu bice bitandukanye by’igihugu, kubera imirwano ikomeye kubera hakurya muri Congo mu mujyi wa Goma, ndetse hari n’Abanyarwanda babiri bishwe n’amasasu.

Amakuru twatangarijwe n’Umuyobozi w’Akarere ka Rubavu Sheik Bahame Hassan avuga ko aba baturage bakomeje kuva mu ngo zabo ari benshi bahunda, aho abenshi bari muri Gare ya Gisenyi.

Umunyamakuru wacu uri i Rubavu mu gitondo cyo kuri uyu wa Kabiri yatubwiye ko hari Abanyarwanda babiri buye aribo Uwiringiyimana Claude w’imyaka 22 wakomokaga i Rutsiro i Rusasa na Ngarukiye Innocent ukomoka Mbugangali ku Gisenyi w’imyaka 36 bishwe n’amasasu aba ndi batandatu bakomeretse.

Ubwo twavuganaga muri iki gitondo cyo kuwa Kabiri, Umuyobozi w’Akarere ka Rubavu Bahame Hassan yavuze kuri uyu wa Kabiri bayukiye mu nama bahumuriza abaturage, akavuga ko uku guhunga kurimo guterwa n’ibihuha bitandukanye, dore ko bavuga ko ingabo za Zimbabwe ndetse n’za Col. Masunzu zaje gufasha ingabo za Leta ya Congo kugirango babashe gucungura Goma igice kimwe cyayo cyari cyamaze kwigarurirwa na M23, hakaba hari impungenge ko zishobora kongera kurasa mu Rwanda, dore ko ku mkuroroba wo kuri uyu wa mbere hari Umunyarwanda wahitanywe n’amasasu yavaga muri Congo abandi bagera kuri barindwi bagakomereka.

Abaturiye umupaka wa Congo kandi batangaje ko kuva ejo urusaku rw’amasasu rwakomeje kumvikana, ndetse no kugeza muri iki gitondo.

Umunyamakuru wa IGIHE uri mu Mujyi wa Rubavu yatangaje ko ubu imodoka ziza i Kigali zabuze, ndetse ko n’abarimo kwerekeza i Rubavu barimo guhita bagaruka muri izo modoka bagiyemo, ku buryo bamwe barimo guhitamo guhunga n’amaguru.

Umuyobozi w’Akarere ka rubavu ariko yatangarije IGIHE ko barimo gusaba abaturage gutuza, ndetse no kwirinda ibihuha kuko ngo ingabo na Polisi bakomeje kurinda umutekano wabo.

Umunyamakuru wacu uri mu Karere ka Rubavu ku mupaka w’u Rwanda na Congo, avuga ko abakomerekejwe n’amasasu ava muri Congo babarirwa muri barindwi hakaniyongeraho uyu wapfuye aguye mu bitaro.

Amasasu menshi yaguye mu Kagali ka Mbugangari mu Murenge wa Gisenyi.

Hari ibindi amasasu ava i Goma yangirije u Rwanda

Ku isaha ya saa cyenda ku masaha yo mu Rwanda, ni bwo mu Mujyi wa Goma muri Repubulika Iharanira Demokarasi ya Congo humvikanye urusaku rw’amasasu, ibi bikaba byatumye bamwe mu banyeshuri bari mu bizamini bya Leta mu Mujyi wa Rubavu mu Rwanda babisohokamo.

Urusaku rw’amasasu rwatangiye ubwo indege ya MONUSCO yarasaga iri mu kirere hagakurikiraho kurasa kw’abasirikare ba Leta bari muri Goma nk’uko amakuru atugeraho abivuga.

Iyi mirwano yagize ingaruka mu Rwanda. Abanyeshuri bakoraga ibizamini bya Leta mu Mujyi wa Rubavu bahise basohoka mu mashuri bumvise urusaku rw’amasasu.

Ku ishuri rya Centre Scolaire Umubano twageze twasanze abanyeshuri batarasubira mu bizamini, kuko bari bagifite ubwoba, amakuru ariko atugeraho ni uko ibizamo byakomeje muri iki gitondo cyo kuwa Kabiri.

Hari ibisasu bibiri byaguye ku butaka bw’u Rwanda mu Mujyi wa Rubavu, ku buryo byanahungabanyije indi mirimo muri uyu mujyi kuko hari abahise bava mu mujyi nyuma yo kumva amasasu.

Andi makuru aravuga ko abana batatu bari bagiye kwiga Icyongereza na bo baburiwe irengero muri Rubavu.

Umva ikiganiro twagirante n’Umuyobozi w’Akarere ka rubavu

Turakomeza kubakurikiranira iby’iyi ntambara.