Ku mugoroba wo ku wa 18 Mutarama muri Serena Hotel, Perezida Paul Kagame yitabiriye umuhango wo kumurika igitabo cyitwa Rwanda INC, How a devasted nation became an economic model for the developing world, cyanditswe na Patricia Crisafulli na Andrea Redmond baba muri Leta ya Chigago, Illinois muri Leta zunze Ubumwe za Amerika.
Iki gitabo Rwanda INC, How a devasted nation became an economic model for the developing world, tugenekereje mu kinyarwanda kivuga “u Rwanda : Igihugu cyari cyarasenyutse cyaje guhinduka urugero rw’ubukungu mu ruhando rw’ibihugu biri mu nzira y’amajyambere”, kivuga ku iterambere n’intambwe u Rwanda rumaze kugeraho rubikesha Perezida wa Repubulika Paul Kagame, nyuma y’icuraburindi rwanyuzemo mu gihe cya Jenoside yakorewe Abatutsi mu 1994.
Abanditsi bombi, Patricia Crisafulli na Andrea Redmond, bahereye ku mateka mabi u Rwanda rwanyuzemo, yanatumye rumenyekana mu ruhando mpuzamahanga, rugatereranwa na bimwe mu bihugu bikomeye, ariko kuri ubu rukaba rumaze gutera intabwe ishimishije rubikesha imiyoborere myiza.
Iki gitabo kigaragaza kandi uburyo u Rwanda ari igihugu gifite ubuyobozi bwiza bw’intangarugero, kikaba cyarafashe iya mbere mu kwikura mu bukene.
Ibyo byose rukaba rwarabigezeho bitavuye ku nkunga z’amahanga, ahubwo rubikesha kwigira, kumva ko rushoboye, kwegereza ubuyobozi abaturage no gukorera mu mucyo.
Aba banditsi bacukumbuye intera u Rwanda rwateye rugamije kugera ku ntego yo kuva mu bihugu bigisindagizwa, ruteza imbere ikoranabuhanga mu bukungu, gushyigikira iterambere ry’abikorera no gushyira imbaraga mu kwihangira imirimo, bagaragaza intambwe nziza igihugu kigezeho mu burezi, ubuzima no kwihaza mu biribwa byose bijyana na gahunda ihamye y’Ubumwe n’Ubwiyunge.
Muri iki gitabo kandi aba banditsi bagaragaza imiyoborere myiza ya Perezida Paul Kagame, bakavugamo uburyo yagejeje u Rwanda ku rwego rushimishije, ubu rukaba ari intangarugero ku mugabane wa Afurika ndetse no ku Isi muri rusange.
Perezida Paul Kagame ashima umurimo wakozwe
Perezida Paul Kagame yashimye abanditsi Patricia Crisafulli na Andrea Redmond kuba baranditse inkuru mpamo ku Rwanda, bagaragaza amateka uko ari, kuko hari n’abanyarwanda ubwabo batayazi neza. Yabashimiye ko batanze umusanzu mu gusobanura u Rwanda, akazi gakomeye bakoze ko kwitanga.
Yagize ati “Afurika ntabwo ari ahantu hagenewe ubukene, ibiza, intambara cyangwa ibindi bijyaye na byo ; ahubwo Afurika ni ahantu habereye gukorerwa ibintu byinshi nk’ubucuruzi, gushora imari, n’ibindi.”
Akomeza agira ati “Iyo urebye amateka y’u Rwanda aho twavuye, aho tugeze ubu ndetse n’aho dushaka kwerekeza, ntabwo byoroshye gusubiza ibibazo twahuye na byo, ariko twizeye gukomeza gutsinda, kuko ari itegeko ko tubigeraho. Ni cyo Abanyarwanda twiyemeje. Iyo ugiye mu byaro, bakubwira uburyo twahinduye imibereho yabo ; amateka y’u Rwanda ni amateka nyayo.”
Abanditsi Patricia Crisafulli na Andrea Redmond bashyize ahagaragara bwa mbere iki gitabo tariki ya 13 Ugushyingo 2012, kigizwe n’amapaji 256.
IKINYARWANDA
IKIRUNDI
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
