IGIHE.com > Amakuru > U Rwanda
 Perezida Kagame yunamiye Umumisiyoneri w’Umugande waguye mu Rwanda

Perezida Kagame yunamiye Umumisiyoneri w’Umugande waguye mu Rwanda


Yanditswe kuya 25-06-2012 - Saa 09:27' na Jotham Ntirenganya

Perezida wa Repubulika Paul Kagame yibutse mu cyubahiro umubyeyi wa Minisitiri w’Ububanyi n’Amahanga wa Uganda wapfiriye mu Rwanda mu Karere ka Kayonza Umurenge wa Gahini mu mwaka w’1952 ubwo yari mu butumwa bw’ubumisiyoneri.

Uyu mu Minisitiri Sam Kutesa, yabuze umubyeyi we Kosiya Kyamuhangire mu 1952, apfiriye mu Rwanda, ibyo bikaba byaratumye mu rwego rwo kumwibuka uyu mwaka na Perezida w’Igihugu cy’u Rwanda yitabira uyu muhango.

Uyu Kyamuhangire ni umwe mu bamisiyoneri bazwi ku izina rya East Africa Revival Movement (EARM) akaba yarapfuye ari mu bikorwa by’ibwirizabutumwa yishwe n’uburwayi.

Kyamuhangire yavutse mu mwaka 1914 apfa azize indwara ya gapfura, mu murenge wa Gahini , Akarere ka Kayonza, Intara y’Iburasirazuba, ari naho kandi ngo babonye bikwiriye uko yashyingurwa.

Perezida Kagame yagize ati: “Uyu munsi, Abanyarwanda n’Abagande, duhurijwe hamwe kugirango duhe icyubahiro Nyakwigendera n’ibikorwa bye. Nk’Abanyarwanda by’umwihariko, ni ibintu duha agaciro gakomeye cyane kubona Gahini ariho habaye uburuhukiro bw’umumisiyoneri”.

Ibyo Perezida Kagame yabivuze ari kumwe n’umufasha we Jeannette Kagame, kuri Diyosezi y’Abangilican ya Gahini, hamwe n’abandi Bagande bari kumwe na Perezida bakaba barashyize indabo ku mva ya Nyakwigendera.

Usibye abayobozi bakuru bari baherekeje Perezida Kagame muri uyu muhango wo kwibuka wabaye ku Cyumweru tariki ya 24 Kamena 2012, hari n’abanyapolitike bo muri Uganda bari bitabiriye uyu muhango harimo Sam Kutesa n’umufasha we Edith Gasana.

Abandi ba misiyoneri bibutswe harimo umugore wa Kyamuhangire bitaga Elisabeth Kyozaire, William Nagenda n’umugore we, Musajaakawa, Yoweli Rutamwebwa, Abaishemwe, Mishakye Kikundo, Thomas Kabaho, Zabroni Rutafa Elimiya Kagyendagura, na Yeremiya Kagyendagura, n’abandi benshi.

Gahini hazwi ho kuba ari ikicaro cy’aho ubutumwa bw’Abangilikani bwatangiriye mu Rwanda kuva 1930, kandi ku bwa Perezida ngo hazakomeza kuba igicumbi cy’ubutumwa bw’Abangilikani, n’umuhuza w’Abanyarwanda n’Abagande.

Amwe mu mafoto:

Foto:Village Urugwiro

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO