IGIHE.com > Amakuru > U Rwanda
Perezida Kagame yashimangiye ko uzapfobya Jenoside azarwanywa aho ari hose

Perezida Kagame yashimangiye ko uzapfobya Jenoside azarwanywa aho ari hose


Yanditswe kuya 7-04-2013 - Saa 13:20' na James Habimana

Mu butumwa Perezida wa Republika Paul Kagame yageneye Abanyarwanda mu gutangiza kwibuka Jenoside yakorewe Abatutsi ku nshuro ya 19, yatangaje ko umuntu wese yaba umunyarwanda cyangwa umunyamahanga uzapfobya jenoside azakurikiranwa aho yaba ari hose.

Avuga ku bagipfobya Jenoside, Perezida Kagame yagize ati “Uwo muntu aho yaba ari hose, yaba umunyarwanda cyangwa umunyamahanga, abanyarwanda bazakomeza kumurwanya ku buryo bushoboka ubwo aribwo bwose.”

Perezida Kagame yavuze ko mu myaka 19 ishize, ibyagezweho byose byagizwemo uruhare n’Abanyarwanda, akaba ari nayo mpamvu ubu kwibuka byashyizwe ku rwego rw’Umudugudu kugira ngo buri munyarwanda wese abone ko kwibuka biri mu nshingano ze.

Perezida Kagame yatangaje ko mu kwihesha agaciro, Abanyarwanda batagomba gutegereza ko abanyamahanga aribo bazaza kubakemurira ibibazo, ahubwo bo ubwabo bagomba kubigiramo uruhare bihesha agaciro.

Agaruka ku bakoze Jenoside bakiri mu mahanga, Perezida Kagame yashimiye ibihugu bimwe byafashe icyemezo cyo kohereza bamwe mu Rwanda, ariko anenga ibihugu bimwe bidashyira ingufu mu gushyikiriza abshinjwa Jenoside ubutabera bw’u Rwanda, ariko avuga ko icyaha cya Jenoside kidasaza bityo igihe icyo aricyo cyose bazakurikiranwa.

Perezida Kagame yasabye Abanyarwanda kujya begera abarokotse Jenoside bakabaganiriza, bakabafasha, Leta ikaza ibunganira.

Perezida Kagame yasabye abakoze Jenoside gusaba imbabazi abo bakoreye ibyaha, kuko aribyo bizatuma ubwabo bumva babohowe, ubumwe n’ubwiyunge bukagerwaho.

Perezida Paul Kagame ya shimiye ibyo Inkiko Gacaca zakoze zica imanza mu gihe cyigufi, imanza zari gutwara igihe kirekire ; zikagera ku nshingano zazo, kandi n’aho hari ibyo zitakemuye bikazakemuka.

Perezida Kagame yavuze ko kwigisha amateka ya Jenoside mu mashuri bizakomeza gushyirwamo ingufu, kugira ngo abavutse mbere na nyuma ya Jenoside yakorewe Abatutsi mu 1994, bakomeze kuyamenya, ndetse n’inzibutso za Jenoside zigakomeza kwitabwaho.

Perezida Kagame ageze ku Gisozi
Perezida Kagame ashyira indabo ahashyinguwe Abatutsi bazize Jenoside yakorewe Abatutsi ku Rwibutso rwa Kigali ku Gisozi
Perezida Kagame acana urumuri rw’icyizere, ikimenyetso cyo gutangiza kwibuka Jenoside yakorewe Abatutsi ku nshuro ya 19
Abayobozi bakuru bunamiye abazize jenoside
Kwibuka abazize Jenoside si iby'Abanyarwanda gusa
Perezida Kagame ku rwibutso rugararagaza amateka ya jenoside yakorewe Abatutsi
Inzego zose zitabira kwibuka Jenoside yakorewe Abatutsi
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO