IGIHE.com > Amakuru > U Rwanda
Perezida Kagame yasabye abaturage ba Nyamasheke gukora bakarwanya gusabiriza

Perezida Kagame yasabye abaturage ba Nyamasheke gukora bakarwanya gusabiriza


Yanditswe kuya 16-01-2013 - Saa 18:29' na Olivier Rubibi

Mu ruzindiko Perezida Paul Kagame yagiriye mu Karere ka Nyamasheke yasabye ko nta munyarwanda ukwiye gusabiriza, bakwiye kugira umuco wo gukunda umurimo uteza imbere nyira wo ukamuhesha agaciro.

Imbere y’imbaga y’abaturage baje kwakira Umukuru w’igihugu ku kibuga cy’umupirwa cy’ishuri rikuru rya EAV Ntendezi mu murenge wa Ruharambuga, Perezida Kagame yagize ati “Nta munyarwanda ukwiye gusabiriza kuko dufite ubwenge n’amaboko yo gukora kandi Imana yaduhaye igihugu cyiza.”

Perezida Kagame yibukije abaturage ko iyo bitabiriye gukora baba biteza imbere, banategura ejo hazaza h’ababakomokaho. Ati “Gukora bigira ingaruka nziza ku badukomokaho, abana bacu bakiga neza, bakagira ubuzima bwiza ndetse bakazabeshaho n’abazabakomokaho.”

Asaba ko bagomba gukora cyane, buri wese mu kazi ke, ku buryo babasha kwitunga ntihagire inzara ibameneramo.

Akarere Perezida Kagame yasuye gahana imbibi na Repubulika Iharanira Demukarasi ya Congo, yasabye abaturage gukomeza guhahirana na bagenzi babo bo muri Congo Kinshasa, batitaye ku byo yise “amatiku’ y’Abanyafurika.

Ikindi kandi, mu byo bakora byose Umukuru w’igihugu yabukije kwibumbira mu makoperative kuko bizabafasha kwiteza imbere. Mu iterambere, yabasezeranyije ko gahunda yo gukwirakwiza amashanyarazi ikomeje, abana bakava mu ku gatadowa.

Perezida Kagame yabibukije ko bagomba gusigasira umutekano kuko ariwo shingiro ya byose. Abasezeranya ko atazihanganira na mba uzashaka kubabuza umutekano, avuga ko u Rwanda rwakubititse bihagije rutazemera kongera gusubira aho rwavuye, kandi ko uzabigerageza bitazamugwa amahoro ; abigereranya n’umuntu ubona urusinga rw’amashanyarazi agakoraho.

Nk’uko asanzwe abigenza iyo yasuye abaturage, abafite ibibazo babibajije ibyinshi bishingiye ku karengane. Ababajije bose, Umukuru w’igihugu yagiraga uwo ashinga kuzarangiza by’umwihariko icyo kibazo.

Uruzinduko rwa Perezida Paul Kagame azarukomereza mu karere ka Rusizi kuwa 17 Mutarama 2013.

JPEG - 130.7 ko
Abaturage ibyishimo biba ari byinshi kwakira Perezida wa Repuburika y’u Rwanda
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO