IGIHE.com > Amakuru > U Rwanda
Perezida Kagame yagaragaje uko igihugu gihagaze

Perezida Kagame yagaragaje uko igihugu gihagaze


Yanditswe kuya 1er-01-2013 - Saa 07:47' na Marie Chantal Nyirabera

Mu Ngoro y’Inteko ishinga amategeko y’u Rwanda, ku wa mbere tariki ya 31 Ukuboza 2012 Perezida Paul Kagame yagejeje ijambo ku Banyarwanda ribasobanurira uko igihugu gihagaze mu nzego zitandukanye anabifuriza umwaka mushya muhire wa 2013.

Ni ijamabo rya buri mwaka Perezida wa Repubulika ageza ku Banyarwanda abagaragariza uko Igihugu gihagaze.

Ijambo rya Perezida Kagame

Ba Nyakubahwa bayobozi b’inzego nkuru z’Igihugu cyacu,
Banyacyubahiro bandi muri hano,
Ba Nyakubahwa muhagarariye ibihugu byanyu n’imiryango mpuzamahanga mu Rwanda,
Banyarwanda, Banyarwandakazi, mbanje kubashuza kandi nishimiye kugaruka muri iyi ngoro y’Inteko Ishinga Amategeko kubera impamvu ebyi z’ingenzi.

Iya mbere ni ukugaragariza Abanyarwanda mwese, inshuti z’u Rwanda n’abo dufatanya mu bikorwa binyuranye uko u Rwanda ruhagaze muri iki gihe.

Iya kabiri ni ukubifuriza umwaka mushya muhire, nk’uko dusanzwe tubikora buri gihe umwaka uba urangira.

Mbere y’uko ntanga ishusho y’Igihugu cyacu, reka mbanze nshimire Abanyarwanda ko bitabiriye ibarura rusange ryakozwe uyu mwaka rikagaragaza umubare w’Abanyarwanda, imibereho yabo n’imitungo yabo hano mu gihugu.

Ibi bizatuma Leta ikora igenamigambi rihamye, na serivisi zitangwe hakurikijwe imibare nyakuri.

Icyagaragaye kandi cy’ingenzi ni uko umuvuduko w’ubwiyongere bw’abaturage wagabanutse ukava kuri 2,9% mbere y’umwaka wa 2002, ubu ukaba ari 2,6%.

Ibi birerekana ko ingamba twafashe zo kugabanya uwo muvuduko uko bikwiye zagize akamaro, kandi nidukomeza muri iyo nzira ubwinshi bw’Abanyarwanda butazagira ingaruka ku bukungu n’imibereho myiza byabo.

Mu by’ukuri nta wabura kuvuga ko igihugu cyacu gikomeje gutera intambwe ishimishije mu iterambere.

Imibare inyuranye igaragaza ko ubukungu bw’u Rwanda bukomeje kwiyongera. Muri uyu mwaka dushoje, uteganya ko ubukungu bwacu buziyongera ku gipimo kingana na 7,7%. Ahanini dushingiye ku musaruro mwiza waturutse muri serivisi n’inganda byiyongereye ku gipimo cya 13,5% na 6% mu bihembwe bitatu bya mbere by’uyu mwaka. Ibi birashimishije.

Ubu bukungu ariko bwashoboraga kwiyongera iyo hataba impamvu ebyiri zitaturutse ku Rwanda, ku Banyarwanda.

Iya mbere ni uko ubukungu bw’isi muri rusange bwahuye n’ibibazo bitoroshye, natwe bikaba byaratugizeho ingaruka.

Iya kabiri ni ingaruka z’intambara mu gihugu duturanye na cyo. Byitiriwe u Rwanda, inkomoko yabyo kandi atari byo. Ntabwo ari byo. Ntabwo intambara yabaye mu gihugu cy’abaturanyi yatewe n’u Rwanda, ntabwo u Rwanda rwabigizemo uruhare, ntabwo ari byo. N’ababivuga barabizi ko atari byo. Abo babivuga ni bo byaturutseho, ntabwo ari u Rwanda byaturutseho.

Nk’uko mubizi, hari raporo yasohotse ishingiye ku bintu bidahwitse, ku binyoma, yatumye bamwe mu baterankunga tumaze igihe dukorana bahagarika inkunga yabo kandi bikorwa mu buryo na bwo butari bwo ; bunyuranyije n’amahame agenga imikorere n’imikoranire mpuzamahanga.

Ibi ntabwo njye navuga ko bitangaje, kuko bihuje n’ibyo tumaze iminsi tuvuga. Dushubije amaso imbere tukibuka ibyagiye bikorwa n’ibyo twavuze ku mugaragaro, iyi nkunga ituruka hanze ishobora guhagarara igihe icyo ari cyo cyose.

Nta n’ubwo bigomba kugendera ku mpamvu zidashingiye ku kuri, kuko izo mpamvu zigenwa n’abatanga iyo nkunga.

Ko intego yacu ikwiye kuba kugenda dukora ibishoboka byose tugabanya imfashanyo iva mu mahanga, cyane cyane twibanda ko havayo ishoramari rindi ry’abakorera. Icya ngombwa ni uko tudatezuka kuri iyo ntego y’ibyo tugomba gukora.

Guhagarika imfashanyo bikaba byashobora gusa kudindiza iterambere ryacu, ariko ntibizatubuza gukomeza gukora ibishoboka byose kugira ngo twivane aho turi, tuvane Abanyarwanda mu bukene nk’uko twabuvuyemo mu myaka itanu ishize abarenga miliyoni imwe ; Abanyarwanda bakaba baravuye muri ubwo bukene nk’ uko tubizi.

Nidukomeza gukora uko dushoboye kose kandi dushingira ku myumvire mizima, tugakomeza guteza Igihugu cyacu imbere, ubukungu bukiyongera, guhagarika inkunga na byo nibwira ko ahari bizaba byaratuviriyemo isomo ryiza. Kandi umusingi urahari.

Uretse kwitabira umurimo byaranze Abanyarwanda, muri uyu mwaka n’iyashize dufite umutekano, amahoro n’ imiyoborere myiza y’Igihugu cyacu.

Hari n’ ibindi twavuga. Reka dutange ingero zikurikira :

Umubare w’amabanki n’amashami byayo byariyongereye kandi bisakara mu gihugu hose. Na za Koperative SACCO zariyongereye kandi zigirira akamaro Abanyarwanda cyane abo banyamuryango bazo muri rusange. Ariko ntabwo tuvuga imibare gusa, n’uburyo zigomba gukora bwagiye burushaho kunozwa biteza Abanyarwanda imbere. Abanyarwanda bahabwa serivisi z’imari bavuye kuri 49% muri 2008 bagera kuri 72% uyu mwaka (2012).

Inguzanyo zatanzwe n’amabanki n’ibindi bigo by’imari uyu mwaka zigeze kuri miliyali hafi magana ane na mirongo ine (miliyari 440), ugereranyije na miliyari magana atatu n’icyenda (miliyari 309) mu mwaka ushize.

Nidukomeza kugira umuco wo kuzigama no gukorana n’imari, nta gushidikanya ko ubukungu bwacu buziyongera kurushaho kandi bugakomeza.

Uyu mwaka ibyo twohereza mu mahanga byiyongereye ku gipimo cya 74%, agaciro kabyo kiyongera ku gipimo cya 26%.

Ibyinjiye mu Rwanda muri uyu mwaka dushoje byiyongereye ku gipimo cya 29%, agaciro kabyo kiyongera ku gipimo cyegereye 14%.

N’ubwo umubare w’ibyo twohereza hanze wazamutse, haracyari icyuho kinini iyo urebye amafaranga menshi dutanga ku byo tuvana hanze. Ni ngombwa ko twongera umubare n’agaciro mu byo twohereza hanze, mu masoko yo hanze no ku masoko mpuzamahanga bityo inyungu tuvanamo na yo igakomeza kuzamuka.

Mu bijyanye n’ubukungu, twavuga ko ishoramari ryaba iry’Abanyarwanda cyangwa iry’abandi bo hanze ryariyongereye muri uyu mwaka.

Mu bihembwe bitatu by’uyu mwaka, ishoramari ryageze ku madolari miliyoni 570 ugereranyije n’amadolari miliyoni 483 umwaka ushize(2011). Igishimishije ni uko ishoramari rijya mu mishinga izagira ingaruka nziza kandi nini mu iterambere ry’Igihugu cyacu muri rusange.

Aha twavuga nk’ishoramari rigamije kongera amashanyarazi mu gihugu, amahoteli yo mu rwego mpuzamahanga, ndetse na Rwandair iduhuza n’ibindi bihugu cyane cyane ibyo muri aka karere.

Ahanini biterwa n’uburyo twashyizeho bwo korohereza abashoramari no gukorera imirimo yabo mu Rwanda. Mbibutse ko igihugu cyacu kiri ku isonga muri aka karere k’ibihugu by’Umuryango wa Afurika y’Uburasirazuba mu byerekeye korohereza abashoramari, ndetse Igihugu cyacu kikaba ari icya gatatu muri Afurika.

Muri uyu mwaka twakomeje kubaka imihanda mishya nka Kigali-Musanze, Kigali -Gatuna, Rusizi -Rubavu, Ntendezi-Huye ndetse ni imihanda ya kaburimbo no gusana iyindi.

Imijyi minini n’imito na santeri z’ubucuruzi hirya no hino mu gihugu byakomeje kuvugururwa no guhabwa isura nziza.

Amazi n’amashanyarazi byariyongereye mu gihugu n’ubwo tugomba gushyiramo izindi mbaraga nyinshi kugira ngo bigere kuri buri Munyarwanda.

Amabuye y’agaciro na yo aragumya kugira uruhare runini mu kongera ubukungu bw’igihugu cyacu.

Muri uyu mwaka amabuye yinjije amadolari hafi miliyoni 128, kandi biragaragara ko mu bihe biri imbere umusaruro wayo uziyongera kurushaho, ugaha Abanyarwanda uburyo bwinshi harimo n’imirimo.

Ubukerarugendo na bwo bwakomeje gutera imbere. Ni na bwo buza ku isonga mu byatwinjirije amadovize menshi muri uyu mwaka. Ibi bitwereka ko u Rwanda ari nyabagendwa, abantu bifuza kureba ibikorerwa mu Rwanda n’ibyiza nyaburanga u Rwanda rufite, usibye ko hiyongeraho gushaka kurukoreramo ndetse no kuruturamo.

Kugeza mu Kwakira uyu mwaka, haje ba mukerarugendo binjije amadolari miliyoni 232 ugereranyije n’umwaka ushize muri ayo mezi u Rwanda rwinjije amadolari miliyoni 204, murumva ko hiyongereyeho miriyoni 28. Byatewe n’uko dukomeza kububakira neza, tukabaha serivisi nziza [ba mukerarugendo], bakagenda bafite isura nziza y’Igihugu cyacu bakacyumva kandi bakakivuga uko bikwiye ndetse babishobora tukifuza ko bazagaruka kenshi bazanye n’abandi benshi.

Banyarwanda,
Banyarwandakazi,
Dukwiye no kwishimira intambwe imaze guterwa mu ikoranabuhanga.
Ubu biroroshye guhanahana amakuru, ubumenyi, kohereza no kwakira amafaranga, kumenya ibiciro byo ku masoko mu Rwanda no hanze n’ibindi.

Turashishikariza Abanyarwanda bose cyane cyane urubyiruko kwitabira ikoranabuhanga, kuko ari ryo rizanoza imikorere rikanongera umusaruro w’ibyo dukora byose.

Mu byerekeye imibereho myiza, twavuga ko Abanyarwanda muri rusange biga ari benshi kurusha mu myaka yashize kandi bakavurwa uko bikwiye iyo bikenewe.

Muri uyu mwaka twakomeje kongera amashuri mu byiciro bitandukanye, umubare w’abayigamo warazamutse.

Mu mashuri abanza umubare w’abanyeshuri wiyongereye kuri 2,3% ubu bagera kuri 2,394,674 ugereranyije na 2,341,146 mu mwaka wa 2011.

Mu mashuri yisumbuye abanyeshuri biyongereye hafi [ku gipimo cya] 10% ugereranyije ugereranyije n’umwaka ushize.

Umubare w’abanyeshuri bari muri Kaminuza na wo wiyongereyeho 4%, ubu zifite abanyeshuri 76,629 ugereranyije n’73,674 mu mwaka wa 2011.

Uyu mwaka twatangije gahunda y’uburezi bw’ibanze bw’imyaka 12 (12YB), ikaba ari intambwe yuzuza gahunda y’uburezi bw’ibanze bw’imyaka icyenda (9YBE).

Umubare w’amashuri y’imyuga n’abayigamo wariyongereye, umubare w’abanyeshuri mu byiciro binyuranye wavuye kuri 67,919 ugera ku 74,320.

Muri aya mashuri y’imyuga havamo ubumenyi ngiro n’ubushobozi bwo gukora mu nganda, mu buhinzi, mu bworozi ndetse abarangiza ayo mashuri bakaba bafite amahirwe yo kwihangira imirimo.

Aya mashuri ni ngombwa mu gihugu cyacu. Gukomeza kuyashoramo imari n’ubushobozi bushoboka kugira ngo abe menshi n’umubare w’abanyeshuri ugende wiyongera kandi n’ibyo bageraho biteze Igihugu imbere, bihore byiyongera.

Ni ngombwa ko dushishikariza abana b’Abanyarwanda kwitabira aya mashuri y’imyuga, kuko ubukungu bwacu buzakomeza gushingira kuri ubwo bumenyi ngiro. Ababyeyi n’abari hano dukomeze kubyumva, kumva ishingiro ryabyo.

Uyu mwaka hari za kaminuza zo hanze zaje gutangiza amashami yazo mu Rwanda. Urugero ni ishami rya Carnegie Mellon University, Kaminuza yo muri Amerika. Ibi bizatuma ireme ry’uburezi muri rusange ryiyongera, Abanyarwanda babyungukiremo ubumenyi buhagije twajyaga tujya gushakisha ahandi.

Mu byerekeye ubuzima, uyu mwaka twakomeje kongera umubare w’amavuriro n’uw’abavuzi babifitiye ubushobozi, ndetse hari gahunda y’abaganga baturuka hanze baturutse cyane mu gihugu cyo muri Amerika, za ’université’ [za Kaminuza] zitandukanye n’amavuriro akomeye azwi bohereje abaganga benshi mu kubaka ubushobozi bw’abaganga n’ubwamavuriro.

Twanavuguruye ubwisungane mu kwivuza (Mutuelle de Santé), ku buryo Umunyarwanda ashobora kwivuriza aho ari hose mu gihugu.

Indwara zari zarazahaje Abanyarwanda nka malariya n’ibindi birimo imfu z’abana n’abagore babyara n’abatwite na zo zirakomeza kugenda zigabanuka ku buryo bushimishije.

Imfu z’abana bari munsi y’imyaka itanu zari 152 ku bana 1,000 muri 2005, ubu ni 54 ku bana 1,000.

Umubare w’ababyeyi bapfa babyara cyangwa batwite wavuye kuri 750 ku bagore ibihumbi 100 muri 2005, ubu ukaba uhagaze ku 134.

Umubare w’imfu ziterwa na malariya waragabanutse uva kuri 54% muri 2005 ubu ni 6%.

Tuzakomeza gushyira imbaraga mu kurwanya imirire mibi akenshi ituruka ku myumvire mibi no kubujij. Igihugu cyacu nticyakwihaza mu mirire hanyuma ngo uduce tumwe twacyo dukomeze kurangwa n’imirire mibi. Tuzanongerera abaganga bacu ubumenyi buhanitse kandi bwihariye, dukomeze no gukumira no kurwanya icyorezo cya SIDA ndetse n’ibindi byorezo.

Mu byerekeye ubutabera, twakwishimira ko amategeko akomeje kuvugururwa aho bibaye ngombwa. Kandi bikorwa hashingiye ku mikorere myiza igaragara ku rwego mpuzamahanga. Hari inkiko Mpuzamahanga n’ibihugu byo hanze byemeye iyo ntera ubutabera bwacu bumaze kugera ho. Ubu bikaba bitwoherereza Abanyarwanda babituyemo bakekwaho ibyaha bakoreye mu Rwanda.

Twagabanyije ibihano kandi turifuza ko za gereza ziba ibigo ngororamuco. Ibi byatumye umubare w’abagororwa na gereza bigabanuka.

Urwego rw’abuhinzi rumaze gushinga imizi, kandi abaturage bafite uruhare mu mikorere yarwo kuko ari kimwe mu bikorwa bishingiye ku muco wacu Nyarwanda.

Ntawabura kuvuga ko urwo rwego rwagabanyije imanza nyinshi zari kujya mu nkiko. Twanashyizeho urwego muri buri Karere rwunganira rukagira inama abaturage mu bibazo by’ubutabera.

Inkiko Gacaca twashoje uyu mwaka zakoze umurimo mwiza cyane kubyerekeye ubutabera bwunga Abanyarwanda. Izi nkiko zatubereye igisubizo cy’ikibazo gikomeye Abanyarwanda twahuye nacyo cyatewe na Jenoside.

Ni n’ikindi kimenyetso cy’uko Banyarwanda bifitemo ibisubizo, kwishakamo ibisubizo no mugihe kiri imbere.

Mboneyeho umwanya wo gushimira Abanyarwanda b’ingeri zose bo mu Rwanda n’abo mu mahanga, ndetse n’ inshuti z’ u Rwanda ikindi gikorwa kiza cyo gutera inkunga Ikigega. Icyo twise Agaciro Develpement Fund twishyiriyeho.

Banyacyubahiro Mwese muri hano,
Banyarwanda Banyarwandakazi,

Tuzakomeza gufatanya n’ibindi bihugu bya Afurika, ndetse no hanze ya Afurika gushaka amahoro arambye kuri uyu mugabane, ndetse tunaharanire n’iterambere ryawo kugira ngo Abanyafurika barusheho kugira ubuzima bwiza.

Aho bibaye ngombwa, tuzakomeza gutanga umusanzu mu kubungabunga amahoro n’umutekano cyane muri Afurika n’ahandi ku isi, uko bizaba bikenewe kandi tubishoboye.

Ndagira ngo nsoze nongera kwibutsa ko igihugu cyacu kiri mu nzira nziza. Icya ngombwa ni uguhora duhanze amaso aho tugana, tugahuza ibikorwa nimigambi, kandi ntitwigere na rimwe dutezuka ku ntego yo guteza Igihugu cyacu n’Abanyarwanda imbere, n’iyo twahura n’ibibazo. Ibibazo byo nabasezeranya ko tuzahura nabyo. Ariko tugomba no gusezeranya ko tuzahangana nabyo kandi tukabikemura.

Ibibazo, ibyo ari byo byose twahura na byo, ntibikwiriye kugira abo bica intege, ahubwo bikwiye kutwongera imbaraga n’ubushake byo kugirango tubikemure.

Izo mbaraga n’ubushake bizagaragare muri uyu mwaka tugiye gutangira mushya w’i 2013 maze utubere mwiza kurusha uwo dushoje. Ubukungu bwacu bwiyongere, tunavane mu bukene abandi Banyarwanda benshi.

Duhere kuri byinshi dufitiye ubushobozi twebwe ubwacu, maze dushyiremo imbaraga zacu zose, tubibyaze umusaruro mwiza. Ahangaha nagirango nkangurire abayobozi bose ko bagomba kuhagira uruhare rukomeye, n’ubwitange budasanzwe. Ibyo nukubibutsa ariko nongera no kubibasaba.

Nk’uko nabivuze ntangira, mboneyeho umwanya wo kwifuriza Abanyarwanda n’abaturarwanda bose, n’inshuti z’u Rwanda, umwaka mushya muhire w’i 2013.

Uzababere mwese n’imiryango yanyu uw’uburumbuke n’ibikorwa byinshi, kandi uzakomeze kurangwa n’ubufatanye bugamije kugeza u Rwanda ku yindi ntera kandi rukwiye

Murakoze, mugire umugoroba mwiza, muhorane n’amahoro y’Imana.

Kanda aha wumve ijambo ryose

Foto : Village Urugwiro

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO