IGIHE.com > Amakuru > U Rwanda
Perezida Kagame yagaragaje ko ibibera muri Afurika bikwiye kuvugwa n’abanyafurika ubwabo

Perezida Kagame yagaragaje ko ibibera muri Afurika bikwiye kuvugwa n’abanyafurika ubwabo


Yanditswe kuya 24-01-2013 - Saa 08:00' na Kayonga J.

Kuri uyu wa Gatatu i Davos mu Busuwisi ahateraniye Ihuriro ry’Ubukungu ku Isi, Perezida Paul Kagame wari umwe mu bitabiriye ikiganiro cyari gifite insanganyamatsiko igira iti "Gukuraho ingaruka kuri Afurika: Ni gute abayobozi bo muri Afurika bagabanya ingaruka z’ibishobora gukoma mu nkokora ishoramari muri kuri uyu mugabane?", yatangaje ko ikibazo gikomereye Afurika kuri ubu ari uko ibibera muri Afurika byandikwa bikanavugwa n’abahandi batari Abanyafurika ubwabo, bityo ibi ugasanga bigaragaza Afurika uko itari.

Muri icyo kiganiro cyari cyitabiriwe n’abakuru b’ibihugu barimo Jacob Zuma w’Afurika y’Epfo, Jonathan Goodluck wa Nigeria, hari kandi na Louise Arbour ukuriye umuryango International Crisis Group, Umuyobozi wa SABMiller Graham Mackay ndetse n’Umuyobozi wa kompanyi Bharti D Suni Bharti Mittal, Perezida Kagame yasabye abari aho kurenza amaso ibisanzwe bivugwa ku ngaruka zo gukorera muri Afurika.

Yagize ati "Ikibazo gikomeye ni uko ibibera muri Afurika byandikwa n’abahandi batari Abanyafurika. Iyi ni yo mpamvu ahandi ku isi bareba Afurika bakagira uko bayifata. Barashaka kugena uko abantu bakwiye gufata Afurika. Icyiza kuri twe twakora ni uko ibibazo byacu dukwiye kubyiharira, tukiharira ibisubizo byabyo ndetse tukaniyandikira inkuru z’ibitureba. Ibyo bizaduha urubuga rwo kugaragaza nyabyo uko ingaruka muri Afurika zihagaze, ingaruka nyazo, muri icyo gihe uko izo ngaruka zikwiye gufatwa bizagaragazwa noneho mu buryo bwa nyabwo."

Perezida Kagame ntiyumva ukuntu abanyamahanga bandika ibibera muri Afurika, aho kuba ari Abanyafurika babyiyandikiye

Abakuru b’ibihugu Jacob Zuma na Goodluck Jonathan nabo bunze mu rya Perezida Kagame kubirebana n’uko hakenewe impinduka ku kuntu isi ibona Afurika. Perezida Zuma yagize ati "Ese ingaruka muri Afurika zaba ari nyinshi kurusha ahandi hose ku isi? Biragaragara ko hari uburyo Afurika ifatwamo bukwiye kugarukwaho. Hari ibimenyetso bifatika ko Afurika iri gutera imbere(...)ndetse n’ibigaragaza ko abayobozi bo muri Afurika bashyize hamwe mu kuzamura Afurika."

Mbere yo kwitabira iki kiganiro, Perezida Kagame yari yagiranye inama n’abayobozi b’amasosiyete atandukanye akomeye ku isi bari kwitabira Ihuriro ry’Ubukungu ku Isi (World Economic Forum). Iyo nama yari yateguwe n’uwahoze ari Minisitiri w’Intebe w’u Bwongereza Tony Blair afatanije n’Umuyobozi wa Meridian Group Marc Hltzman, yitabiriwe n’abayobozi b’amasosiyete barimo uwa Heineken Group na Metal Corpd, bagaruka cyane ku bukungu bw’u Rwanda, ahanini hagaragazwa iterambere bwagize ndetse n’ishoramari.

Mu mugoroba wo kuri uyu wa Gatatu kandi Perezida Kagame yasoje umunsi agirana ibiganiro n’Umuyobozi w’Ihururi ry’Ubukungu ku Isi Prof Schwab n’umugore we.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO