IGIHE.com > Amakuru > U Rwanda
Ngoma: Abadafite ubushobozi bwo kwiburanira bashima  inama za MAJ

Ngoma: Abadafite ubushobozi bwo kwiburanira bashima inama za MAJ


Yanditswe kuya 17-01-2013 - Saa 11:04' na Faustin Nkurunziza

Bamwe mu baturage bo mu murenge wa Remera, Akarere ka Ngoma badafite ubushobozi n’ubumenyi bwo kwiburanira, barashima ibiro by’ubufasha mu by’amategeko (MAJ) uburyo ibagira inama mu manza baburana.

Nk’uko bitangazwa na Uwimana Clementine wo mu murenge wa Remera, Akarere ka Ngoma, Umudugudu wa Gisunzu,MAJ (Maison d’Accès à la Justice) yamufashije kumugira inama mu kuburana imanza yagiye ahura na zo, ngo kuko yazitsindwaga bitewe no kutamenya amategeko, ndetse no kutagira ubushobozi bwo kwishyura umwunganira.

Uwimana avuga ko MAJ yamufashije cyane kuko yatsinze urubanza nyuma yo kujuririra urwo yari amaze gutsindwa bitewe n’ubujiji, no kutagira ubushobozi bwo kwishyura uwari kumuburanira. Agira ati “MAJ ifasha kumenya ibyo uburana niba ari amahugu cyangwa ibyo wemerewe n’amategeko, ukamenya ko wakomeza urubanza cyangwa wareka kuruburana.”

Mukabisanana Yvette akuriye MAJ mu karere ka Ngoma, avuga ko Minisiteri y’ubutabera yashyiriyeho umuturage utishoboye ufite urubanza imbere y’inkiko, uburyo bwo kwigirwa urubanza mbere y’uko aburana kandi akabikorerwa ku buntu.

Mukansanga Yvette uhagarariye MAJ mu karere ka Ngoma

Akomeza avuga ko mu bibazo bakunze guhura na byo mu kazi kabo, ari abaturage batazi gusoma no kwandika. Cyakora ngo iyo babigiye urubanza babasha kubaha imyanzuro yarwo kugira ngo naramuka ananiwe kwisobanura imbere y’Umucamanza; abashe kumuha umwanzuro we umufasha kumenya ibikubiyemo byanditse ku mpapuro.

Mukabisanana agira ati “Dushyira amategeko mu nyandiko kuko umuturage uyamusobanuriye yose atabasha kuyamenya.”
Avuga kandi ko akenshi iyo abaturage babiyambaje hakiri kare bituma batirirwa bajya mu nkiko.

Akomeza avuga ko ibyo byafashije abaturage cyane mu rwego rwo kwirinda guhora basiragira ku nkiko no kutamenya amategeko, ndetse no kutagira ubushobozi bwo kwishyura ubaburanira.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO