IGIHE.com > Amakuru > U Rwanda
Abapadiri bandika kuri Le Prophete n’ababaha amakuru bongeye kwikomwa

Abapadiri bandika kuri Le Prophete n’ababaha amakuru bongeye kwikomwa


Yanditswe kuya 30-04-2012 - Saa 10:57' na Olivier MUHIRWA

Kuwa Gatanu tariki ya 13 Mata 2012, muri gahunda yo gusoza icyunamo mu Karere ka Nyamasheke, muri Paruwasi ya Nyamasheke, uhagarariye Ibuka yamaganye abantu bagifite ibitekerezo bibi harimo n’Abapadiri ; by’umwihariko akaba yaratunze agatoki Padiri Thomas Nahimana na Padiri Rudakemwa Fortunatus hamwe n’ababaha amakuru bandika ku rubuga rwabo leprophete.fr

Uyu wari uhagarariye Ibuka yasabye inzego zibishinzwe ko zabikurikirana, aba bapadiri nabo bakaza mu murongo mwiza, bagafatanya n’abandi Banyarwanda kubaka igihugu.

Ibi bije bikurikira ubuyobozi bwa Diyoseze ya Cyangugu, Kiliziya Gatolika mu Rwanda n’Abapadiri bose ba Diyoseze ya Cyangugu, aho bitandukanyije na Padiri Thomas Nahimana na Padiri Rudakemwa Fortunatus.

Diyoseze ya Cyangugu ivuga ko kubera ibyo aba bapadiri bagiye batangaza bashaka gutesha ikuzo Kiliziya Gatolika by’umwihariko Diyoseze ya Cyangugu, kandi batarabiherewe uburenganzira na Musenyeri bwo kujya muri Politiki.

Zimwe mu mpungenge Diyoseze ya Cyangugu ngo ni uko ibikorwa na bariya bapadiri bikunze kwitirirwa Diyoseze ya Cyangugu kandi ngo ntaho bahuriye na mba.

Tariki ya 01 Gicurasi 2011, Nyiricyubahiro Musenyeri Yohani Damaseni Bimenyimana, Umushumba wa Diyoseze Gatolika ya Cyangugu yagejeje ku Basaseridoti, Abiyeguriyimana n’Abakirisitu ba Diyoseze ya Cyangugu ubutumwa bugira buti : “Abasaseridoti n’Abiyeguriyimana babujijwe gukora imirimo ya Politiki batabiherewe uburenganzira n’umwepisikopi”.

Muri ubwo butumwa, Musenyeri Yohani Damaseni Bimenyimana avuga yeruye ko ibyo Padiri Thomas Nahimana na Padiri Fortunatus Rudakemwa bakora atari ubutumwa bahawe na Diyoseze.

Musenyeri yagize ati : “Ndibutsa Abasaseridoti, Abihayimana n’Abalayiki kutibagirwa ko umuhamagaro wacu ari ukwamamaza ivanjiri ya Kiristu wazutse nta kindi tuyigeretseho. Ubwo butumwa bugira ireme iyo ubukora yunze ubumwe n’umushumba wa Diyoseze cyangwa umukuru w’umuryango. Niba Padiri Thomas Nahimana na Padiri Fortunatus Rudakemwa bumva ko ibyo bakora bifite ireme bazatubwire niba bunze ubumwe n’umushumba wa Diyosezi yabo”.

Muri ubwo butumwa, Musenyeri Yohani Damaseni yakomeje gushimangira ko ibyo bariya bapadiri batangaza bitakwitirirwa Diyoseze ya Cyangugu.

Yagize ati : “Mboneyeho gutangaza ko ibyandikwa ku rubuga rwa internet leprophete.fr rwashinzwe n’abapadiri babiri ba Diyosezi ya Cyangugu by’umwihariko ..... si ubutumwa bwahawe abo bapadiri.”

Umwe mu bapadiri babarizwa muri Diyoseze ya Cyangugu utarashatse ko amazina ye atangazwa yagize ati : “None se niba Musenyeri Yohani Damaseni Bimenyimana avuga ko ibyo abo bapadiri bandika cyangwa batangaza ku maradiyo bidakwiye kwitirirwa Kiliziya kandi ko atari ubutumwa bahawe, babona bari mu wuhe murongo ? Ese bari mu murongo wa Kiliziya ? Ese bari mu murongo wa Politiki ? Niba se bari mu murongo wa Politiki kandi batarabiherewe uburenganzira babona batarayobye ?"

Uyu mupadiri akomeza agira ati : ”None se koko niba nk’uko Musenyeri abivuga yarandikiye Abasenyeri b’aho bariya bapadiri babarizwa abamenyesha ko adashyigikiye inyigisho zabo kandi abasaba kuzamaganira kure, Padiri Thomas Nahimana na Padiri Fortunatus Rudakemwa ibyo bakora babikorera iki ?"

Umushumba wa Diyoseze Gatolika ya Cyangugu Musenyeri Yohani Damaseni Bimenyimana
Padiri Nahimana Thomas, Rudakemwa Fortunatus bashinze leprophete.fr

Uko Diyoseze ya Cyangugu ibona icyihishe inyuma ya Le Prophète n’abapadiri bayiri inyuma

Abapadiri ba Diyoseze ya Cyangugu basanga ruriya rubuga rwa internet rwa bariya bapadiri bari i Burayi ari umuyoboro wa sekibi kugira ngo abibe urumamfu mu mubano wabo.

Nk’uko itangazo risoza inama y’abasaseridoti ba Diyoseze ya Cyangugu yo ku wa 19-21/09/2011 ribivuga, ngo inyandiko zisohoka kuri urwo rubuga zandagaza bamwe mu bapadiri, bigatera urwikekwe, kwishishanya no kutizerana.

Muri iryo tangazo, abapadiri bavuga ko urwo rubuga rwo hanze rubavangira mu butumwa bwabo kandi rukayobya intama Kristu yabashinze. Baboneyeho umwanya wo kwamagana ibitekerezo bisenya maze banasaba abasoma izo nyandiko kujya bamenya gushungura kandi ko umuntu wese ugira uruhare mu gutanga amakuru agamije kwanduza isura ya mugenzi we no gusenya ubumwe bw’abana b’Imana yashyira mu gaciro akabireka. Nk’uko bigaragara muri iryo tangazo, hari n’aho bavuga ko inyandiko za Padiri Thomas Nahimana na Padiri Fortunatus Rudakemwa zitatanya ubushyo bw’Imana aho kubwegeranya.

Nk’uko bigaragara mu nyandiko zitandukanye zagiye zishyirwa ahagaragara, Musenyeri Yohani Damaseni Bimenyimana n’abapadiri ba Diyosezi ya Cyangugu ntibashyigikiye ibyandikwa n’ibivugwa na Padiri Thomas Nahimana na Padiri Fortunatus Rudakemwa.

Padiri Eugène Dusabirema yagize ati : “Icyifuzo cyanjye ni uko ziriya nyandiko zabo zahagarara kuko ziteza ibibazo byinshi, ziteza urwikekwe mu bantu, ziteza climat itari nziza mu bantu”.

Wa mupadiri wo muri Diyoseze ya Cyangugu utarashatse ko izina rye ritangazwa, mu kiganiro twagiranye yakomeje yibaza ibibazo bitandukanye agira ati : “Ese kuki bariya bapadiri batinda kumva. Wenda ubwo banga guhagarika inyandiko zabo ku bushake, bazazihagarika binyuze mu mategeko. Ahari wenda impamvu bakomeza kuvunira ibiti mu matwi, ubagiriye inama wese bakamwandagaza ni uko bazi ko kubafatira ibyemezo mu rwego rwa Kiliziya ari inzira ndende. Ese bazakomeza kurangaza abantu bahimbira Kiliziya ibibazo idafite kugira ngo bayiteshe agaciro ?"

Aba bapadiri se babivugaho iki ?

Twashatse kumenya icyo aba bapadiri babivugaho maze Padiri Thomas Nahimana na Rudakemwa Fortunatus badutangariza ko nta kibazo bafitanye na Kiliziya Galolika, yewe ngo na Diyoseze ya Cyangugu nta kibazo bafitanye. Bagira bati : ” Nta Kibazo na gito dufitanye na Kiliziya y’u Rwanda, ndetse na Diyoseze Gatolika ya Cyangugu by’umwihariko !”.

Bakomeza bagira bati : ”Erega Abayobozi ba Kiliziya si Inkandagirabitabo, bazi gushishoza kandi bakitwararika uburenganzira bwa buri wese. Uburenganzira bwo kuvuga cyangwa kwandika icyo umuntu atekereza, Kiliziya ntishobora kubunyonga. Niko bimeze. Padiri Fortunatus na Padiri Thomas nabo si impinja, bazi neza aho uburenganzira bwabo butangirira n’aho bugarukira !”.

Basoza ikiganiro bagiranye na IGIHE batangaje ko badateganya gufunga uru rubuga rwabo aho bagira bati :” Ku byerekeye urubuga Le Prophète, ntabwo italiki yo kurufunga iri muri gahunda yacu."

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO