IGIHE.com > Amakuru > U Rwanda
Mu Rwanda harategurwa Inama mpuzamahanga y’urubyiruko izahuza ibihugu 9

Mu Rwanda harategurwa Inama mpuzamahanga y’urubyiruko izahuza ibihugu 9


Yanditswe kuya 24-01-2013 - Saa 19:14' na Rene Anthere Rwanyange

Imyiteguro yo kwakira Inama Mpuzamahanga y’Ihuriro ry’Urubyiruko rwo mu bihugu byo mu Burasirazuba bw’Afurika (EAYF : Eastern Africa Youth Forum) izatangira kuya 19 kugeza ku wa 23 Gashyantare 2013. Abazayitabira bazaba baturutse mu bihugu bigize Umuryango wa Afurika y’Iburasirazuba (EAC) wongeyeho Sudani y’Amajyepfo n’iy’Amajyaruguru, Somalia na Ethiopia.

Nk’uko bitangazwa na Ngarambe Louis Umuhuzabikorwa wa Gahunda y’urubyiruko muri EAYF, atangaza ko iyi nama izabera mu Rwanda izamara iminsi itanu, akaba ari ku nshuro yayo ya gatatu ibaye. Iya mbere yabereye muri Kenya, iya kabiri muri Uganda, iba rimwe mu mwaka. Ku birebana n’aho imyiteguro yayo igeze agira ati “Kugeza ubu imyiteguro igeze ku kigereranyo cya 75%.”

Ngarambe Louis, Umuhuzabikorwa wa Gahunda y'Urubyiruko muri EAYF

Akomeza atangaza ko abayitabira ari urubyiruko ruri hagati y’imyaka 18 na 35, bahuriye mu muryango witwa “Initiatives of Change” ariko bakaba banatumira abo mu yindi miryango kimwe n’abayobozi bafite aho bahurira n’urubyiruko ndetse n’imiyoborere myiza ; bagasuzumira hamwe indangagaciro z’ubumuntu.

Ngarambe avuga ko Intego y’iyi nama ari ukwigira hamwe ibikunze kubangamira urubyiruko muri aka karere, bazaganira kandi banarebere hamwe uburyo urubyiruko rwakwirinda kwakira ibintu by’inzaduka bibonetse byose harimo kwirinda ibiyobyambwenge.

Atanga ubutumwa bw’uko urubyiruko rukwiriye kwishakamo ibisubizo by’ibibazo bafite aho kwirirwa bareba ubuyobozi. Yagize ati “Dukwiriye kureba Twebwe dushoboye iki, n’iki wumva wakwimarira ? Ese icyo dushoboye, tubasha kugikora bitatugoye ?”

Eastern Africa Youfh Forum , yashinzwe mu mwaka 2010 nyuma ya Harambe Africa yabaye mu mwaka wa 2007. Urubyiruko rwo muri Kenya na Uganda rwaje gusanga ibibazo n’imbogamizi byariho icyo gihe ari na zo bahuriyeho n’urundi rubyiruko rwo muri aka karere.

Iyi nama biteganijwe ko izitabirwa n’abasore n’inkumi bagera ku ijana baturutse muri Kenya, Uganda, Tanzaniya, Sudani y’Amajyepfo, Sudani y’Amajyaruguru, Ethiopia, Somalia, u Burundi n’u Rwanda.

Uwafashe ifoto : Steven Ndizeye

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO