IGIHE.com > Amakuru > U Rwanda
Me Rudakemwa arasaba Leta amafaranga y’abavoka b’ababurana ibyaha mpuzamahanga

Me Rudakemwa arasaba Leta amafaranga y’abavoka b’ababurana ibyaha mpuzamahanga


Yanditswe kuya 10-02-2013 - Saa 16:22' na Faustin Nkurunziza

Me Rudakemwa Jean felix, wunganira Dr. Léon Mugesera arasaba Leta y’u Rwanda amafaranga agenerwa abavoka bunganira ababurana ibyaha mpuzamahanga.

Me Rudakemwa yabwiye IGIHE ko yandikiye Minisiteri y’Ubutabera ( MINIJUST) asaba guhabwa amafaranga agenerwa abavoka bunganira ababurana ibyaha mpuzamahanga, ati “ Nifuje ko nahabwa amafaranga atangwa na Leta agenerwa abavoka bunganira ababurana ibyaha mpuzamahanga, ariko sindayahabwa kugeza ubu.”

Avuga ko n’uwunganira Pasiteri Uwinkindi Jean Bosco woherejwe n’Urukiko Mpuzamahanga Mpanabyaha rwashyiriweho u Rwanda(ICTR) ayahabwa nta kibazo, ariko we akaba atayahabwa kandi ngo ateganyijwe.

Me Rudakemwa Jean felix na Dr. Léon Mugesera yunganira mu mategeko

Rusanganwa Eugène, Umuyobozi ushinzwe itangwa ry’inkunga mu by’amategeko muri Minisiteri y’ubutabera, avuga ko ibaruwa ya Me Rudakemwa isaba ayo mafaranga bayibonye, gusa ngo biracyasuzumwa neza niba agomba kuyahabwa, ubundi bigashyirwaho umukono na Minisitiri w’Ubutabera.

Risanganwa ati “Ni inshingano za Leta kuyatanga gusa iyo adahari ntabwo atangwa, ubu hari ikibazo cy’amafaranga”. Akomeza avuga ko ubundi ayo mafaranga atangwa ku muntu utishoboye uburana urubanza mpuzamahanga, akaba ariyo mpamvu uwunganira Pasiteri Uwinkindi Jean Bosco ayabona, kuko yashyizwe muri icyo cyiciro.

Rudakemwa avuga ko yunganira Mugesera ku giti cye, kandi ko ayo mafaranga agenerwa abavoka baburana ibyaha mpuzamahanga, u Rwanda rutayamuha kandi agenwa n’amategeko.

Ati “ Biranditswe gusa ariko ntibishyirwa mu bikorwa”, Rudakemwa yifuza ko Leta yayamugenera, ngo kuko n’abandi bose bakoze ibyaha bya Jenoside yakorewe Abatutsi 1994, bazoherezwa na TPR kuza kuburanira mu Rwanda, abazababuranira bagomba kugenerwa ayo mafaranga.

Uhabwa aya mafaranga agenerwa amadolari y’Amerika 50$ ku isaha, imwe uyavunje mu manyarwanda arenga ibihumbi 30.

Ayo mafaranga yishyurwa ku isaha uwunganira Mugesera, Umushinjacyaha mukuru Martin Ngoga, aherutse kugaragariza Urukiko ko uko urubanza rwa Mugesera rutinda bituma hishyurwa amafaranga menshi, ubwo yagaragazaga ko Mugesera atisobanura ku byaha ashinjwa akanyura hirya no hino.

Uwunganira Dr. Mugesera arasaba kwishyurwa

Me Rudakemwa avuga ko kugeza ubu umuryango wa Léon Mugesera ariwo umwishyura amafaranga yo kumwunganira, akaba agitegereje n’aya Leta y’u Rwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO