IGIHE.com > Amakuru > U Rwanda

"Kwiyongera kw’abaturage gukwiye gufatwa nk’imbaraga, aho kuba umutwaro"


Yanditswe kuya 12-07-2012 - Saa 21:37' na Ishimwe Samuel

Ibi Perezida wa Repubulika Paul Kagame yabitangaje kuri uyu wa Kane tariki 12 Nyakanga, ubwo yari mu biganiro bya “Re|Source 2012” byabereye muri Kaminuza ya Oxford yo Bwongereza, bivuga ku kibazo cy’umusaruro muke ugereranije n’ubwiyongere bw’abatuye Isi.

Muri ibi biganiro byari byitabiriwe n’abayobozi barenga 200 bavuye mu bihugu bitandukanye, Perezida Kagame yafunguye icyiciro cy’ibiganiro kibandaga ku biribwa, aho yasangije abari aho inararibonye ry’u Rwanda mu kwihaza mu biribwa.

Perezida Kagame yavuze kuri gahunda za leta y’u Rwanda nko guhuza ubutaka no guhinga igihingwa kimwe, byatumye u Rwanda rugera ku buhinzi burambye ndetse n’umusaruro wizewe ; Yagize ati : ”Gushyira gahunda yo kwihaza mu biribwa imbere ni ubushake bwa politiki (…) niba u Rwabda rwarabashije kubikora, n’ikindi gihugu icyo ari cyo cyose cyabigeraho.”

Yasabye kandi abayobozi bari aho kureba izamuka ry’abatuye Isi nk’ingufu, aho kurifata buri gihe nk’umutwaro. Yagize ati : ”Abaturahe bashobora kugira uruhare mu kuba igisubizo, mu gihe dukoze ku buryo umusaruro nawo wiyongera nk’abaturage. Abantu bagomba kubakwamo ubushobozi mu rwego rwo kongera umusaruro, no kugenzura neza ibikenerwa.”

Perezida Kagame yakomeje gusobanura politiki y’u Rwanda ku biribwa, aho yibukije ko kugira ngo haboneke umusaruro uhamye hakenewe ukwagura amasoko mu buryo mpuzamahanga, hakurwaho inzitizi zirimo ibyemezo by’ubuziranenge bikarishye mu buryo butari ngombwa, usanga bifite intego yo guheza umusaruro uvuye mu duce tumwe na tumwe.

Yasoje asaba abakurikiye ibi biganiro, gufata ikibazo cyo kutihaza mu biribwa nk’impungenge ikomeye ku kiremwa muntu, ndetse kigashakirwa umuti nk’ibindi bibazo Isi yagiye ihura nabyo muri iki gihe.

Iki cyiciro cy’ibiganiro kibanze ku kwihaza mu biribwa cyari kirimo n’Intumwa y’Umunyamabanga Mukuru wa Loni ishinzwe ukwihaza mu biribwa n’imirire David Nabarro ; Prof Charles Godffray Umuyobozi ushinzwe gahunda yo kwiga ku hazaza h’ibiribwa muri Kaminuza ya Oxford, hamwe na Peter Howell uyobora Banki ya Rebobank International.

Ibi biganiro bya Re|Source 2012, byitabiriwe n’abantu benshi bari mu myanya ifata ibyemezo ku Isi, barimo abakuru b’ibihugu, abahawe ibihembyo bya Nobel, abanyeshuri ndetse n’abikorera ku giti cyabo.

Inkuru dukesha Perezidansi ya Repubulika

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO