IGIHE.com > Amakuru > U Rwanda
Kigali : Abatwara imyanda n’Umujyi baritana bamwana ku mikorere mibi

Kigali : Abatwara imyanda n’Umujyi baritana bamwana ku mikorere mibi


Yanditswe kuya 11-01-2013 - Saa 13:02' na ORINFOR

Bamwe mu batuye mu Mujyi wa Kigali, barinubira imikorere y’amwe mu masosiyete atwara imyanda idahwitse ; kuko batayitwarira igihe igateza umwanda aho irunze. Gusa ba nyir’amasosiyete bavuga ko harimo akajagari ku bashinzwe gutwara iyo myanda, bakavuga ko na rwiyemezamirimo wari kujya atunganya imyanda akaba imwe mu nzitizi.

Imikorere mibi ivugwa ni uko hirya no hino mu nkengero z’umujyi wa Kigali hari ahagaragara imyanda iri mu mifuka, akenshi ugasanga ihamaze igihe kirenga icyumweru isazi zituma hejuru yayo.

Hari aho imyanda itinda kugeza ubwo imifuka yari irimo ishwanyagurika imyanda igasigara yandagaye

Abatuye mu ngo ziba hafi y’ahantu nk’aho icyo bahurizaho ni uko amasosiyete atwara iyo myanda ataza kuyihavana ku gihe ngo yubahiriza umunsi n’isaha yo gutwara iyi myanda, abaturage twaganiriye bakaba bemeza ko nyamara badasiba gutanga amafaranga yo kumena iyo myanda ahabugenewe.

Ngenzi Jean Paul uhagarariye sosiyete Agruni, imwe mu zitwara imyanda, avuga ko aka kazi kakorwaga mu buryo bw’akajagari nta sosiyete imwe yabaga izwi itwarira imyanda agace runaka ; ariko ngo hari hari n’izindi nzitizi zituma akazi katagenda neza.

Ngenzi avuga ko kandi umuhanda ugana ku kimoteri cya Nduba ari mubi cyane ku buryo ubangamira abajyanayo imyanda, hakiyongeraho ko iki kimoteri kitabyazwa umusaruro bityo umwanya w’aho ibindi bijya ukaba muto.

Yongeraho icyakora ko indi mbogamizi bahura na yo, ati "Indi mbogamizi ari na yo ikomeye ni aho dutwara imyanda hadatunganyijwe, tubaza Umujyi wa Kigali ukatubwira ko rwiyemezamirimo hari ibyo atujuje, twabaza rwiyemezamirimo na we akavuga ko MVK [Umujyi wa Kigali] hari ibyo itamuhaye.”

Umuyobozi ushinzwe isuku mu Mujyi wa Kigali Mugabo John, we avuga ko hari umushoramari ari we ikibazo kiriho kuko utubahirije amasezerano yo kubyaza umusaruro ikimoteri cya Nduba. Kuri ubu Umujyi wa Kigali ngo ugiye kuhatunganya ku buryo iyo myanda izubakirwa ibyumba byabugenewe.

Ikigo cy’igihugu gishinzwe kugenzura imwe mu mirimo ifitiye igihugu akamaro RURA, cyagenye ibiciro byo gukusanya no gutwara imyanda mu ngo zo mu mirenge igize uturere tw’Umujyi wa Kigali hakurikijwe urutonde rw’ibyiciro by’ubwisungane mu kwivuza.

Ikigaragara ni uko n’ubwo iyi gahunda iriho hakigaragara ahantu imyanda imara igihe kinini, ibi ndetse bikaba byatera ikibazo cyo kwandura zimwe mu ndwara zituruka ku mwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO