IGIHE.com > Amakuru > U Rwanda
Kigali: Ibitaramo ni uruhuri mu gihe umwaka mushya wegereje

Kigali: Ibitaramo ni uruhuri mu gihe umwaka mushya wegereje


Yanditswe kuya 30-12-2012 - Saa 10:33' na Olivier Muhirwa

Mu gihe habura igihe gito ngo umwaka wa 2012 ugere ku musozo uwa 2013 utangire, hirya no hino mu Rwanda by’umwihariko muri Kigali hateguwe ibirori bitandukanye byo gusoza umwaka, haba mu buryo bw’umwuka no mu buryo bw’umubiri, dore ko abatazaba bari mu nsengero, bazaba bari mu kundi kwishimisha gutandukanye.

Mu gusoza umwaka, mu Mujyi wa Kigali n’ahandi hirya no hino hari ibitaramo bitandukanye, amasengesho, ibiterane n’amateraniro.

Ibi ni bimwe mu byo twabashije kumenya:

1. Concert ya Orchestre Impala

Iyi concert y’imbaturamugabo igiye gukorwa nyuma yo kwiyubaka kw’iyi Orchestre mu mwaka wa 2012, bikaba byari nyuma y’imyaka isaga 17 idacuranga.

Muri iki gitaramo kizabera muri Centre Saint Paul i Kigali ku mugoroba wo ku wa 31 Ukuboza 2012, iyi Orchestre izacuranga zimwe mu ndirimo zayo zo hambere nka Bonne année, Anitha Mukundwa, Amavubi, Mariya Rosa, Mbega ibyago, n’izindi zitandukanye.

Munyanshoza Dieudonne (Mibirizi), umwe mu bari muri iyi Orchestre, avuga ko bateguye iki gitaramo cyo gusoza umwaka muri Kigali, nyuma yo kuzenguruka hirya no hino mu turere tw’igihugu.

Orchetre Impala igihe gucurangira muri Saint Paul, nyuma y’uko yari yifuje gucurangira kuri Stade Regional i Nyamirambo ku Bunani, ariko ntibyabasha gukunda kuko iyo Stade bayimwe ku munota wa nyuma.

Kwinjira muri iki gitaramo bizaba ari amafaranga ibihumbi bitanu (5,000 FRW) kuri buri muntu, kikazatangira saa kumi n’ebyiri z’umugoroba.

Impala n'Impalage

2. Kuri Sky Hotel

Uretse Orchestre Impala izatarama ku wa 31 Ukuboza 2012, no muri Sky Hotel; bateguye igitaramo cyiswe “Special Bonne Année” kizitabirwa n’abahanzi batandukanye barimo Tom Close, Ama-G The Black, Kayitare Wayitare Dembe, B-Gun, Pedro, Sister Aima wo mu Ntara y’Iburasirazuba n’abandi.

Hazaba kandi hari abakinangasire (DJ) kabuhariwe baturutse mu Gihugu cya Uganda, kwinjira bikazaba ari amafaranga igihumbi kuri buri muntu (1,000FRW).

Nyuma y’iki gitaramo, kwinegura bizakomereza muri “Liz Bar and Restaurant”, mu isoko rishya ryo mu Mujyi wa Kigali, na ho kwinjira bikazaba ari amafaranga igihumbi.

Tom Close azaba ahari

3. Fantastic Restaurant izahemba ababaye imena kurusha abandi

Nyuma y’uko hari hasanzwe hari Igisope cy’imbaturamugabo, ku wa 31 Ukuboza 2012 iyi resitora izaba ifite undi mwihariko, kuko izahemba insakazamashusho ya rutura (écran géant) ku bakiliya bayo b’imena mu mwaka wa 2012.

Mu gutanga ibihembo kandi abazaba bahari bose bafite amahirwe ko bashobora kuzatombora, bagatangira umwaka bareba televiziyo zizira amashaza.

Ba bacuranzi ba Karahanyuze na bo bazaba bahari, aho ndetse ngo hari n’uruhisho rwo gusoza umwaka ruteganyirijwe abazaba baje gusoza umwaka.

Kwinjira muri ibi bitaramo byo muri Fantastic, ni ubuntu nk’uko bisanzwe, kandi ibyo kurya by’amoko menshi n’ibyo kunywa bizaba ari munange.

Bamwe mu bazacuranga muri Fantastic

4. East African Party

Iki ni igitaramo ngarukamwaka rurangiza, kiba buri gihe uko umwaka utangiye. Kuri iyi nshuro ya gatanu, hazaba hari abahanzi batandukanye baba abo mu Rwanda no mu mahanga.

Mu bahanzi bazaba bahari twavuga Kidumu, Azonto, Kamichi, Knowless, Mani Martin, Uncle Austin, Riderma, Tom Close, Jay Polly, King James n’abandi.

Kwinjira muri iki gitaramo kizatangira saa kumi z’umugoroba, kikabera muri Parking ya Stade Amahoro i Remera, bizaba ari amafaranga ibihumbi bitanu mu myanya y’icyubahiro n’ibihumbi bibiri ku handi bose hasigaye.

Kidumu azaba ahari

5. Happy People

Nk’uko bimaze kumenyerwa buri mwaka, mu Rwanda hakirwa imbaga nini y’Abanyarwanda baba mu Rwanda no mu mahanga n’inshuti z’u Rwanda. Tariki ya 31 Ukuboza 2012, ibi bizongera kuba mu gitaramo cyiswe “Happy People”.

Iki gitaramo kizabera kuri Minisiteri y’Ububanyi n’Amahanga (MINAFFET), gitangire saa yine z’ijoro, aho kwinjira bizaba ari amafaranga ibihumbi icumi.

Hazaba hari umukinishangasire (DJ) Fully Focus, uzaturuka muri Afurika y’Epfo, na Khalim wo mu Rwanda. Uretse aba kandi hari ibindi birori bitandukanye, abazahagera bazabasha kwibonera.

Ubushize byari ibicika

6. Album ya mbere ya Young Grâce

Umuhanzikazi w’Umunyarwanda wazamutse bitunguranye muri muzika akaza no muri bane bakunzwe mu Rwanda mu marushanwa ya Primus Guma Guma Super Star ya 2012, arateganya kumurika album ye ya mbere ku wa 31 ukuboza 2012.

Nk’uko bitangazwa na TOP 5 Sai, inzu itunganya umuziki mu Mujyi wa Musanze, inakorana cyane n’uyu muhanzi, ngo uyu muraperikazi azamurika album ya mbere yise “Hip Hop Game”.

Kugeza ubu aho iki gitaramo kizabera ntiturabasha kuhamenya, ariko ni mu mujyi wa Kigali mu gikorwa cyiswe “Listening and viewing Party”.

Album ye yambere arayishyira ahagaragara

7. Bye Bye Vacances

Inkubiri y’ibitaramo byo mu minsi mikuru isa n’igabanutse. Ku itariki ya gatanu Mutarama 2013 hazaba hari ikindi gitaramo cyiswe “Bye Bye Vacances” kizabera kuri Stade Amahoro i Remera, aha kandi ni na ho umuhanzi Lil G azamurikira album ye.

Uretse Lil G, hazaba hari n’abandi bahanzi batandukanye dore kuko uzaba ari n’umwanya wo kwibuka Hirwa Henry wariribaga mu itsinda rya Kigali Boys KGB.

Ni muri iki gitaramo kandi intyoza mu marushanwa amaze iminsi abera hirya no hino mu gihugu yiswe “Talentum” yo kureba abahanzi bafite impano zizamenyekana.

Kwinjira bizaba ari amafaranga ibihumbi bibiri mu myanya y’icyubahiro n’igihumbi ahandi hasigaye.

Album ye irashyize iraje

8. Sick City entertainment

Iri si izina ry’igitaramo, ahubwo ni izina ry’itsinda ry’abaririmbyi ribyina indirimbo zigezweho, na ryo ryateguye igitaramo ku itariki ya kabiri Mutarama 2013.

Bari kumwe na bagenzi babo babyina indirimbo zigezweho, ku Ishyo Art Center ku Kacyiru guhera ku isaha ya saa cyenda z’igicamunsi kugeza saa moya z’ijoro. Aba basore n’inkumi bazaba basusurutsa abazaba baje kubareba, dore ko kwinjira bizaba ari amafaranga ibihumbi bibiri ku muntu umwe n’ibihumbi umunani ku bantu batanu bari kumwe.

Akarusho muri iki gitaramo ni uko hazatangirwamo ibihembo (Awards) bitandukanye harimo icy’itsinda ryiza ry’umwaka (Best dance group of the year), Itsinda ryiza rikizamuka (Best upcoming group), Umubyinnyi w’umukobwa witwaye neza kurusha abandi muri uyu mwaka (Best female dancer), ndetse n’umuhungu urusha abandi kubyina akora na siporo (Best B-Boy).

Abazitabira iki gitaramo bazasusurutswa n’amatsinda y’ababyinnyi basanzwe bazwi hano mu Rwanda nka Jabba Junior, Bri8 Fantasy, Krest Crew, Fantoms Crew, Dance Freaks n’abaririmbyi Dark matter entertainment.

Aba nabo bazatarama

9. Igitaramo cy’inkera y’abahizi "Ntungurishirize umuco"

Iki gitaramo cyo giteganyijwe kuwa 30 Ukuboza 2012, aho umuhanzi Rure

Aba nabo bazatarama

mire Focus ashyira ahagaragara album ye yise "Ntungurishirize umuco".

Haraba harimo udushya twinshi, kuko harimo kwiyakana, gukirana, kwivuga, ababyeyi bazaririmba ibihozo by’abana, kumurika imideri, kuvuga amazina y’inka n’ibindi bitandukanye.

Abasusurutsa barimo, Masamba Intore, Itorero Indangamirwa, Umucuranzi w’inanga Nsayisenga Sophie, Mariya Yohana , Jean Paul Samputu n’abandi batandukanye.

Kwinjira muri iki gitaramo kibera muri Hotel Serena guhera saa kumi n’ebyiri z’umugoroba ni amafaranga ibihumbi icumi (10,000) mu myanya y’icyubahiro n’ibihumbi bitanu (5,000) ahandi hose hasigaye.

Ruremire

Ubutumwa:

Umuyobozi w’Umujyi wa Kigali

Mu butumwa butangwa n’Umuyobozi w’Umujyi wa Kigali Ndayisaba Fidèle, ni uko abantu bagomba kwidagadura ariko banazirikana ko umwaka utaha abanyeshuri bazasubira ku ishuri.

Agira ati "Babyeyi namwe mwisanzure, mwidagadure, muhahe, mumererwe neza, abacuruza namwe mucuruze neza ariko kandi mwibuka ko ibyo mukora byose muri iyi minsi mikuru mugomba kuzirikana ko mu ntangiriro z’ukwezi kwa Mutarama (ukwezi kwa mbere) 2013 abana bazasubira ku ishuri. Muzirikane ko na bo bakeneye byinshi bibafasha mu myigire yabo, harimo n’amafaranga y’ishuri."

Yongeraho ati "Abana batarengeje imyaka 18 y’amavuko ntibemerewe kujya mu tubyiniro, keretse mu bitaramo byihariye na byo bashobora kujyanamo n’ababyeyi babo. Urubyiruko igihe na bo bagiye mu bitaramo bibareba, barasabwa gutaha kare kandi bakirinda kunywa ibisindisha n’ibindi biyobyabwenge. Birabujijwe kunywa ibisindisha ku bana bose n’urubyiruko."

Umuyobozi w'Umujyi wa Kigali Ndayisaba Fidele

Umuvugizi wa Polisi

Umuvugizi wa Polisi y’Igigugu Supt Theos Badege, mu butumwa atanga kuri iyi minsi y’isoza n’itangira ry’umwaka, agira ati “Umutekano mu Rwanda hose umeze neza, abantu bisanzure uko babitekereje kose, bizere umutekano.”

Akomeza agira ati “Ariko barasabwa kwibuka ko amategeko adahagarara, ndetse biba byiza ko umuntu yishima uyu munsi n’ejo agakomeza. Abishimira mu ruhame babimenyeshe Polisi n’izindi nzego z’umutekano, abava kwishima bamenye birinde amakosa cyane cyane arebana n’ibinyabiziga. Abajya kwishima kandi bamenye ko ingo zabo zitatereranwe, kandi twakwishimira kutagira uwo duhana avuye kwishima.”

Muri rusange muri izi mpera z’umwaka wa 2012 no mu itangira ry’umwaka wa 2013 hari ibitaramo bitandukanye, haba muri Kigali n’ahandi hirya no hino mu gihugu tutaretse n’abazarara mu nsengero no mu Kiliziya.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO