IGIHE.com > Amakuru > U Rwanda
Kigali : Abanyeshuri bo muri Kaminuza zo muri Canada n’U Bwongereza  basabwe kuba abavugizi b’u Rwanda

Kigali : Abanyeshuri bo muri Kaminuza zo muri Canada n’U Bwongereza basabwe kuba abavugizi b’u Rwanda


Yanditswe kuya 17-07-2012 - Saa 21:37' na Abdou Nyampeta

‘’Dusaba Abanyeshuri baza kudusura kutubera abavugizi mu bihugu byabo, bakavuga ibyabaye muri Jenoside yakorerwe Abatusi mu w’i 1994. Ni urubyiruko, igihe bazakura bagiye mu buyobozi bazajye bahora barwanya ikintu cyose cyatera Jenoside’’.

Ibi ni ibitangazwa na Kalisa Evariste, Visi Perezida w’Inteko Nshingamategeko, Umutwe w’Abadepite, kuwa Kabiri, tariki ya 16 Nyakanga 2012, ubwo yagiranye ikiganiro n’abanyeshuri baturutse muri Kaminuza zimwe na zimwe zo muri Canada n’Ubwongereza.

Mu kiganiro abo banyeshuri bagiranye na Visi Perezida w’Inteko ndetse na Komisiyo y’Ubumwe bw’Abanyarwanda, Uburenganzira bwa Muntu no kurwanya Jenoside, Kalisa Evariste yatangarije IGIHE.com agira ati : “Iyo basuye u Rwanda basura n’Inteko Ishingamategeko, tukababwira aho tuvuye, aho tugeze n’aho twifuza kugera, guhangana n’ibibazo twahuye nabyo n’intambwe dutera yo kuzamura igihugu cyacu mu mibereho myiza y’abaturage’’.

Impamvu abo banyeshuri baje gusura Inteko Nshingamategeko, Byabarumwanzi François, Perezida wa Komisiyo y’Ubumwe bw’Abanyarwanda, Uburenganzira bwa Muntu no kurwanya Jenoside, agira ati : ’’Baje kugira ngo bamenye uko dukora n’uko tukorana n’izindi nzego za Leta ndetse n’imiryango ikorera mu gihugu’’.

Mu bibazo abanyeshuri bibanzeho, Byabarumwanzi François agira ati : ’’ Bibanze kuri Jenoside, cyane cyane ku Nkiko Gacaca zimaze gusoza imirimo yazo. Bari bafite amatsiko yo kumenya ukuntu bizagenda nyuma, no kumenya ukuntu ikintu cyitwa ingengabitekerezo ya Jenoside gihagaze mu gihugu. Twabasobanuriye ko ingengabitekerezo ya Jenoside ikomeje kurwanya kandi intambwe imaze guterwa ni nziza. Impamvu basuye Komosiyo yacu ni uko ariyo bakoraho ubushakashatsi ku byerekeye Jenoside’’.

Byabarumwanzi akomeza agira ati :’ ’Ku bw’umwihariko, kubera inshingano Komisiyo yacu ifite itera amatsiko cyane abantu banyuranye baba abanyamakuru, abashakashatsi kuri Jenoside, ku bumwe bw’Abanyarwanda no kubrurenganzira bwa muntu’’.

Yannick Tona, umukozi ku Rwibutso rwa Jenoside ruri ku Gisozi mu Mujyi wa Kigali, avuga ko abo banyeshuri barimo kwiga ku mateka y’u Rwanda, aya mbere ya jenoside, mu gihe cyayo na nyuma yayo. Barareba kandi ukuntu u Rwanda ruriho rwiyubaka nk’igihugu kivuye muri Jenoside nyuma imyaka 18 gusa.

Mu izina ry’abagenzi be, Kirsten Stefanik, umwe mu banyeshuri basuye u Rwanda, yatangarije IGIHE.com, aya magambo : ’’Twishimiye u Rwanda, Abanyarwanda ni abantu beza rwose, batwakiriye neza, igihugu ni cyiza, ibihe ni byiza nabyo. Twishimiye kandi intambwe u Rwanda rumaze kugeraho mu rwego rwo kwiyubaka. Twanyuzwe n’ibisobanuro twahawe’’.

Abo banyeshuri bageze mu Rwanda ku itariki ya 9 Nyakanga 2012. Bagiranye ibiganiro n’Abayobozi ba Minisiteri y’Ububanyi n’Amahanga n’imiryango nka : Ibuka, Avega-Agahozo basura n’Urwibutso rwa Jenoside ruri ku Gisozi.

Abanyeshuri basuye u Rwanda ni bane aribo : Dylan Kular wo muri Quest University, Andrea Gelina wo muri Nipissing University, Kirsten Stefanik wo muri University of British Columbia/Univrsity of Westen Ontario, aba bose nabo muri Canada na Guy Petrie wo muri University of Newcastle yo mu Bwongereza.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO