IGIHE.com > Amakuru > U Rwanda
Kicukiro : Umugore yanze kuva mu nzu ngo isanwe bayimusenyeraho

Kicukiro : Umugore yanze kuva mu nzu ngo isanwe bayimusenyeraho


Yanditswe kuya 13-02-2013 - Saa 15:17' na Deus Ntakirutimana

Isanwa ry’inzu ya Rugerinyange Nshuti Samuel iherereye mu Murenge wa Kigarama mu Karere ka Kicukiro mu Mujyi wa Kigali, ryateje ubwumvikane buke nyuma y’uko umugore we Mutesi Jeannette ngo yari yasabwe kuyivamo by’akanya gato kugira ngo ivugururwe nyamara akabyanga avuga ko atinya kubuzwa kuyisubiramo.

Rugerinyange waretse kubana na Mutesi kubera impamvu yita iz’umutekano we avuga ko yoherereje uyu mugore ubutumwa bugufi muri telefoni (SMS) amusaba kuba yimutse by’igihe gito akavugurura inzu, ariko umugore akamusubiza ko atayivamo kuko ngo ayivuyemo abona atayisubiramo.

Umugore ngo yarabyanze maze Rugerinyange amusaba kumvikana n’abafundi bakemeranya uko izasanwa, ngo bumvikana ko bazasakambura igice kimwe ayirimo ndetse ku ya 10 Gashyantare 2013 batangira kuyisana.

Rugerinyange avuga ko yahageze akabona ibi bishobora guteza impanuka agahitamo gushyiraho ingufuri ku miryango, icyakora ngo byakurikiwe n’impaka nyinshi kugeza ubwo ubuyobozi bufata icyemezo cyo kwica ingufuri Mutesi akajya mu cyumba kitari cyagasakamburwa ari na ho aba kugeza ubu.

Mutesi mu mvugo irimo agahinda, yabwiye IGIHE ko umugabo yamutaye mu mwaka wa 2009 ntacyo amubwiye ngo akaba nta cyizere amufitiye ko yasana inzu akayimusubiza.

Rugerinyange icyakora mu kiganiro yagiranye na IGIHE yavuze ko ibyo umugore avuga atari byo, avuga ko atabikora kuko iyi nzu ibamo abana be "akunda" nubwo ngo nta burenganzira abona abafiteho kuko nyina abamwangisha.

Rugerinyange avuga ko ahangayikishwa n’abana be ari na cyo cyatumye abajyana mu ishuri ryiza kugira ngo bazagire imibereho myiza mu minsi iri imbere, ariko Mutesi we akavuga ko umugabo atamwitaho kuko ngo amuha amafaranga yo gutunga abana atinze.

Rugerinyange utakiri umugabo wa Mutesi nk’uko bigaragazwa n’ibaruwa yamwandikye muri Nyakanga 2012 amubwira ko atari umugore we asabwe no kumuvira mu nzu nyamara Mutesi ntabyubahirize, avuga ko yabanje kujya amuha amafaranga yo guhaha abinyujije kuri banki akabona ayakoresha nabi agafata icyemezo cyo kujya ayishyura ku muntu umugore n’abana bafataho ibyo bakenera.

Umunyamabanga nshingwabikorwa w’Akagari ka Karugira iyi nzu iherereyemo Nshimirimana Emmanuel, avuga ko Rugerinyange ari we uteza ikibazo akaba atari akwiye gusana iyo nzu atabyumvikanyeho n’umugore ; ndetse ko nakomeza iyi gahunda yo gusana iyi nzu hazitabazwa inzego za Polisi.

Rugerinyange na Mutesi ubu bafitanye abana batatu, umukobwa umwe n’abahungu babiri.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO