IGIHE.com > Amakuru > U Rwanda
Inyeshyamba za M23 zirahakana kuba zifite aho zihuriye n’u Rwanda

Inyeshyamba za M23 zirahakana kuba zifite aho zihuriye n’u Rwanda


Yanditswe kuya 29-06-2012 - Saa 07:49' na Kagenza C.

Kuri uyu wa Kane tariki 28 Kamena itsinda rishinzwe igenzura rihuriweho n’u Rwanda na Congo Kinshasa ryashyize ahagaragara ibikubiye mu bushakashatsi bwakozwe ku birego by’uko u Rwanda rwaba rufasha inyeshyamba za M23, benshi mu babajijwe babarizwa muri uwo mutwe bahakana kuba baba bafite aho bahuriye n’u Rwanda mu mikorere yabo, bavuga ko ayo makuru ari ibinyoma no gukabya.

Hagati y’itariki 29 na 30 Gicurasi, bamwe mu bagize umutwe wa M23 washinzwe n’abahoze muri CNDP na PARECO nyuma yo kutumvikana na leta babajijwe n’itsinda rishinzwe igenzura rihuriweho n’u Rwanda na Congo ibibazo bitandukanye hifuzwa kumenywa niba hari imikoranire bafitanye n’u Rwanda, batanu muri bo barabihakana.

Iri tsinda ry’igenzura, ku ruhande rw’u Rwanda ryari riyobowe na Col Fred Muziraguharara, naho ku ruhande rwa Congo Kinshasa hari ColYav Jean Claude, rikaba ryari rigizwe n’abantu umunani.
Ibirebana n’ibazwa byose byakorewe ku cyicaro cya MONUSCO i Goma, aho habajijwe abantu bagera ku icumi, batanu muri bo bakaba barahakanye amakuru avuga ko batorejwe mu Rwanda.

Raporo yashyizwe ahagaragara na MONUSCO mu gihe gishize ndetse na Radio BBC ikayikomozaho mu nkuru yashinjaga u Rwanda kuba inyuma y’inyeshyamba za M23 zigumuye ku butegetsi bwa Congo Kinshasa kuva mu gihe gishize, aho byavugwaga ko habajijwe abagera kuri 11 muri iyo raporo batangaza ko baherewe imyitoz n’intwaro mu Rwanda. Gusa muri abo 11 babajijwe icyo gihe, benshi muri bo bari mu kigero kiri hagati y’imyaka 18 na 21 y’amavuko, ariko nta ndangamuntu z’u Rwanda bari bafite.

Mu biganiro bitandukanye abagize itsinda rishinzwe igenzura rihuriweho n’ibihugu byombi, abo ku ruhande rw’u Rwanda batangarijwe na bamwe mu bagize M23 ko basabwe kujya muri uwo mutwe n’abagabo babiri bari bambaye imyenda ya gisivili, bahise babatwara mu modoka za gisivili, nyuma baza guhura n’abari bambaye imyenda y’igisirikare cya Congo Kinshasa muri pariki ya Virunga, ari bo babahaye imyenda ya girikare, amasasu n’ibindi bikoresho; aha hose bakaba bemeza ko nta muntu cyangwa ikintu na kimwe cyerekeye u Rwanda bigeze bahura nacyo.

Hagati aho, ibyavuye mu nama yabereye I Goma hagati ya ba minisitiri b’ingabo n’abagaba b’ingabo ku ruhande rw’u Rwanda na Congo Kinshasa kugeza ubu ntibiramenyekana.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO