IGIHE.com > Amakuru > U Rwanda
Ingabo za Loni ntizitaye ku marira y’abazitakiraga

Ingabo za Loni ntizitaye ku marira y’abazitakiraga


Yanditswe kuya 12-04-2013 - Saa 16:22' na Marie Monique Dushime

Abarokotse Jenoside yakorewe Abatutsi mu 1994 kimwe n’abayobozi batandukanye bateraniye ku rwibutso rwa Nyanza ya Kicukiro mu mugoroba wo kwibuka, banenga Ingabo z’Umuryango w’Abibumbye gutererana Abatutsi bari bazihungiyeho bakicwa urubozo.

Abatanze ubuhamya ku rwibutso rwa Nyanza bavuze ko nyuma y’uko ingabo z’Umuryango w’Abibumbye zisize Abatutsi bari bahungiye mu ishuri rya ETO Kicukiro, ari bwo umutwe w’Interahamwe wabibasiye utangira kubica urubozo.

Abarokokeye aho ku kigo cya ETO Kicukiro basanga ari ubugwari bukomeye bw’ingabo Loni kuko zasize abazitakiraga mu menyo y’abishi, kandi bari bazihungiyeho bazizeyeho ubufasha.

Margret Zziwa, Umuvugizi w’Inteko Ishinga Amategeko y’Umuryango wa Afurika y’Iburasirazuba, yagize ati “Birabaje cyane kubona ingabo nka ziriya zari zizewe ku Isi yose mu kubungabunga amahoro, zitererana abo zagombaga gutabara, bakarinda bicwa aka kageni. Ku bwanjye numva bari bakwiye kubiryozwa, kuko ntacyo bakoze.”

Margret yongeyeho ko batazahwema kuvuga ibyabaye mu Rwanda, mu rwego rwo gukumira icyatuma hongera kubaho Jenoside aho ari ho hose ku Isi, anavuga ko bazakomeza gufatanya n’u Rwanda mu gushakisha abakoze Jenoside bakidegembya hirya no hino ku Isi.

Mitali Protais, Minisitiri w’Umuco na Siporo yihanganishije ababuze ababo muri Jenoside yakorewe Abatutsi, anashishikariza Abanyarwanda gufasha abasinzwe iheruheru na yo, cyane cyane abapfakazi b’inshike, bihereye ku muturanyi no mu nzego z’ibanze.

Abarokotse Jenoside batanze ubuhamya kimwe n’abayobozi bagaye Umuryango w’Abibumbye kudatabara Abatutsi bicwaga muri Mata 1994, ndetse no kuba utarafashije Leta y’Ubumwe mu gusana igihugu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO