IGIHE.com > Amakuru > U Rwanda
Ikijuju cyasimbuye Umwura mu kwibuka Jenoside yakorewe Abatutsi

Ikijuju cyasimbuye Umwura mu kwibuka Jenoside yakorewe Abatutsi


Yanditswe kuya 8-02-2013 - Saa 12:20' na Rene Anthere Rwanyange

Bitandukanye n’uko byari bisanzwe bimenyerewe ko mu gihe cyo kwibuka abazize Jenoside yakorewe Abatutsi muri Mata 1994 haba mu myambarire cyangwa ahandi bateguye hakoreshwa ibara ry’umwura (Mauve) hakaba hari n’abakoreshaga irijya gusa n’umweru, ubu hafashwe icyemezo ko ibara Abanyarwanda bose bagomba guhuriraho mu kwibuka Jenoside ari ikijuju (Grey, Gris) ; ibara risa n’ivu.

Ibumoso ni ibara ry'ikijuju ryasimbujwe iry'umwura mu kwibuka Jenoside yakorewe abatutsi

Minisitiri w’Umuco na Siporo Mitali Protais, avuga ko guhindura ibara ryari risanzwe rikoreshwa byatekerejweho mu nama y’Abaminisitiri iheruka guterana ku wa gatandatu Gashyantare 2013 hakemezwa ko hazajya hakoreshwa ibara ry’ivu kuko rifite icyo risobanuye mu mateka y’Abanyarwanda.

Ubwo Minisitiri Mitali yari mu kiganiro n’abanyamakuru cyakurikiye iyi Nama y’Abaminisitiri, yagize ati “Gukoresha ibara ry’ivu ntibihise bikuraho andi mabara yakoreshwaga ariko uko Abanyarwanda bazagenda bamenyera ni ko andi azacika.”

Imyambaro y'uyu mugabo (ikoti n'ipantalo) ifite ibara ry'ikijuju rizajya rikoreshwa mu kwibuka Jenoside yakorewe abatutsi

Minisitiri Mitali yasabye ko hatabaho kwitiranya ibara ry’ivu n’umuhango ukorwa mu gihe Kiliziya Gatolika iba yinjiye mu gihe cy’igisibo cya Pasika, kuko bo barisiga ku gahanga naho mu gihe cyo kwibuka hakaba hatazakoreshwa ivu ahubwo ari ibara risa n’ivu gusa.

Mu kwibuka ku nshuro ya 19 Jenoside yakorwe Abatutsi, Abanyarwanda bose barasabwa kubigira ibyabo. Insanganyamatsiko y’uyu mwaka iragira iti “Twibuke Jenoside yakorewe Abatutsi duharanira kwigira.”

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO