IGIHE.com > Amakuru > U Rwanda
Ihagarikwa ry’iyubakwa ry’umuhanda wa Gihogere, ingaruka zikomeye ku baturage

Ihagarikwa ry’iyubakwa ry’umuhanda wa Gihogere, ingaruka zikomeye ku baturage


Yanditswe kuya 8-03-2013 - Saa 09:51' na Emmanuel Kanamugire

Ihagarikwa ry’ibikorwa byo kubaka umuhanda uva ku kigo basuzumiramo imodoka "Controle Technique" werekeza i Nyabisindu mu Murenge wa Remera, Aarere ka Gasabo, byatumye abaturage batuye agace ka Gihogere bibagiraho ingaruka zirimo gusenyuka kw’inzu zabo cyane mu gihe cy’imvura nyinshi, inkomyi ku bikorwa by’ubutabazi, ibibazo by’umutekano muri uyu muhanda kuko watangiye gusenyuka n’ibindi.

Nk’uko twabitangarijwe n’abatuye kuri uyu muhanda watangiye gukorwa mu mwaka wa 2010, ariko imirimo yaje kudindira, ugira uruhare mu gutuma amazi asenyera abaturage, kuko aturuka mu gice cya Remera yose ari ho aruhukira, kandi imiyoboro yayo idatunganyijwe neza.

Kuba abakoresha uyu muhanda ari benshi, umubyigano wabo n’imodoka umeze nabi na ruhurura idapfundikiye. Majyambere Jean Baptiste avuga ko ari bimwe mu bitera inkeke aba baturage bavuga ko umutekano wabo utizewe cyane cyane abana n’abagore bahavunikira.

Avuga ko kuri ubu darete (beto) bakoreshaga ibiraro byinjira mu ngo abakoraga uyu muhanda baza bakazitwara batazisimbuje kandi zari zihari na mbere y’uko utangira kubakwa. Ati “mu gitondo imodoka ifite icyapa RAB 093E yajemo abasore bambaye amajire ya COTRACO bapakira darete zari zikoze uturaro, ntituzi aho bazijyanye kandi mu by’ukuri si bo bari bazishyizeho.”

Rugira Emmanuel we avuga ko bamwe bahitamo gucumbikisha imodoka zabo kuko batabona aho bazinyuza. Iki kibazo kandi ngo gituma abakeneye kubaka batabona aho banyuza ibikoresho.

Ikindi ni uko iyo habaye nk’ikibazo cy’uburwayi, Imbangukiragutabara (Ambulance) itabona aho inyura, bisaba ko umurwayi aterurwa kuko itabona uko yambuka umuhanda.

Undi muturage muri aka gace avuga ko umuyoboro utwara amazi ufite ubushobozi buke ugereranije n’ahanyura bigatuma hamwe na hamwe agenda asenya ibikorwa by’abaturage.

Umuyobozi w’Umujyi wa Kigali, Fidele Ndayisaba yatangaje ko mu gihe kitarenze ukwezi umuhanda uzaba watangiye gukorwa hashyirwamo kaburimbo, kuba utarakozwe ngo urangire byatewe n’uko Rwiyemezamirimo wawuhawe yari afite indi mihanda yakoraga.

Agira ati “Rwiyemezamirimo aba afite indangaminsi y’ibikorwa, ntibishoboka ko yakorera ibintu byose icyarimwe, tubona hari ahandi yagiye akora neza. Nta mpungenge n’ibindi azabikora na ho ibindi bibazo bizasuuzumwa.”

Mu gihe bigaragara ko imiyoboro y’amazi imwe yasibwe n’abashaka inzira aho bishoboka, iyasigaye yatangiye gusenyuka ku buryo ababyitegereza bavuga ko mu gihe cyo gusubukura imirimo, bazongera gutangirira ku busa.

Ibikorwa bizasubukurwa bisaba kongera kuwubaka bundi bushya
Iyi ruhurura ishobora kuzasenyera abaturage
Uyu muturage ntashobora kunoba uko yinjiza imodoka mu rugo
Abaturage birwanaho mu kwishakira uko bashyiraho ibiraro
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO