IGIHE.com > Amakuru > U Rwanda
Hatahuhwe ibimenyetso mpimbano muri raporo ya Loni ishinja u Rwanda gufasha M23

Hatahuhwe ibimenyetso mpimbano muri raporo ya Loni ishinja u Rwanda gufasha M23


Yanditswe kuya 21-08-2012 - Saa 02:44' na IGIHE

Raporo yakozwe n’itsinda ry’impuguke z’Umuryango w’Abibumbye ishinja u Rwanda gufaha M23, ibimeneyetso bikomeje kujya ahagaragara, bigaragaza ko ari impimbano.

Nyuma y’ibimenyetso byatanzwe n’u Rwanda , ko ntaho ruhuriye n’umutwe wa M23, noneho hagaragaye ko kimwe mu bimenyetso byashingirwagaho ko igisirikare cy’u Rwanda cyoherezaga abasirikare muri M23, bagendeye ku byangombwa byagaragazwaga ko byatanzwe n’u Rwanda, icyangombwa cyagaragaweho ko cyari igihimbano.

Nk’uko bigaragazwa n’inkuru y’Izuba Rirashe ikesha Chimpreports.com, ivuga ko izo mpuguke zavuze ko Capt. Saddat Janvier, witwaga ko ari umusirikare waturutse mu ngabo z’u Rwanda (RDF), akoherezwa mu Ntara ya Kivu (DRC) gufasha umutwe wa M23, ibyangombwa bye bigaragaza ko yari umusirikare w’Umutwe wa CNDP mu mwaka wa 2009, warwanyaga Leta ya Congo.

Uyu musirikare nyuma y’aho CNDP igiranye amasezerano n’igisirikare cya Leta ya Congo, abari bagize CNDP bakinjizwa gisirikare cya Leta (FARDC), yahawe icyangombwa cya gisirikare gifite nimero #166964208920.

Nyamara icyangombwa cyagaragajwe muri raporo, kigaragaza ko yari umusirikare w’u Rwanda, kiri mu rurimi rw’Igifaransa u Rwanda rutigeze rukoresha mu byangombwa byarwo.

Umuvugizi w’igisirikari cy’u Rwanda Brigadier General Joseph Nzabamwita, aganira n’Izuba Rirashe dukesha iyi nkuru yagize ati “Na mbere hose abasirikari bacu ntibigeze bagira ikarita zibaranga zanditse mu Gifaransa.”

Brig. General Nzabamwita anavuga ko izo karita za mbere, zitari zikinakoreshwa mu 2009, kuko kuva aho umushinga w’indangamuntu nshya zikoze mu buryo bw’ikoranabuhanga, abasirikare nta cya ngombwa kihariye bagira.

Aka kanama k’impuguke za Loni, raporo yako ikomeje kugaragaza ko ibyo kakoze kabihimbye, kagasohora raporo katabajije u Rwanda, kari gakuriwe na Steve Hege na we watahuwe ko yaranzwe no gushyigikira umutwe wa FDLR.

Ibi bigaragazwa ko nta Gifaransa u Rwanda rwakoreshaga mu byangombwa, kandi raporo ya Loni ikagaragaza ibyanditemo, byatahuwe n’umwanditsi wa Blog witwa Sonia Uwimana, ukorera Kigali na Nairobi.

Iyi karita yashingiweho nayo muri raporo

Steve Hege, ashinjwa gushyigikira umutwe wa FDLR ukorera mu Burasirazuba bwa Congo, hashingiwe ku nyandiko yasohoye yiswe “Comprendre les FDLR en République Démocratique du Congo”, bivuze gusobanukirwa umutwe wa FDLR muri Repuburika Iharanira Demukarasi ya Congo. Inyandiko ye yagaragazaga ko FDLR ifite ukuri mu bikorwa byayo muri Congo. Uyu mutwe wa FDLR, ushinjwa Jenoside yakorewe Abatutsi mu 1994.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO