IGIHE.com > Amakuru > U Rwanda
Gishwati: Isaranganywa ry’amasambu ryahawe igihe ntarengwa

Gishwati: Isaranganywa ry’amasambu ryahawe igihe ntarengwa


Yanditswe kuya 8-02-2013 - Saa 07:35' na IGIHE

Minisitiri w’Intebe Dr Pierre Damien Habumuremyi yayoboye inama ku isaranganya ry’amasambu mu ishyamba rya Gishwati, inama yari igamije kurebera hamwe aho ikibazo cy’amasambu kigeze no gutanga umurongo ku ishyirwa mu bikorwa ry’isaranganya ry’ubutaka muri Gishwati nyuma y’uko abari bahatuye bahimuriwe kubera ubuhaname bwaho mu rwego rwo kwirinda ibiza byabagwirira no kubungabunga ibidukikije.

Iyi nama yashyizeho itsinda ku rwego rw’igihugu rishinzwe gusaranganya amasambu ku byiciro bitandukanye by’abaturage, mu rwego rwo kubabonera aho bahinga ndetse n’aho bororera.

Ibyo byiciro birimo imiryango yimuwe muri Gishwati igatuzwa hanze yayo, imiryango yasigaye muri Gishwati ariko idafite aho guhinga, imiryango ituye hanze ya Gishwati ariko yari ihafite ibikorwa mbere, n’imiryango yari ifite ubutaka gakondo mu nkengero za Gishwati ubu hakaba habarirwa muri Gishwati mu ikarita nshya.

Itsinda ryashyizweho rigizwe na Lt Gen Fred Ibingira uriyoboye, Assistant Commisioner of Police Mugisha Joseph wungirije umuyobozi w’iri tsinda, Pothin Muvara wo mu kigo gishinzwe umutungo kamere, William Ngabonziza wo muri Minisiteri y’Ubutegetsi bw’Igihugu, Nzeyimana Innocent wa Minisiteri y’ubuhinzi, Na Kagabo Nsengiyumva wo muri Minisiteri y’Umutungo Kamere.

Iri tsinda ryahawe igihe cyo kugeza mu mpera z’ukwezi kwa gatandatu 2013 ngo ribe ryarangije icyo kibazo cy’isaranganya ry’amasambu. Riziyambaza impuguke zitandukanye mu byerekeye gupima ubutaka, rinakorane n’inzego z’ibanze zirebwa n’iki kibazo.

Ubutaka buzatangwa ni ubw’ahamaze gucibwa amaterasi kugira ngo hakorerwe ibikorwa bitabangamiye ibidukikije.

Ahazasaranganywa hazakorerwa ubuhinzi cyane cyane ubw’ibihingwa bihabereye nk’ibigori n’ibirayi, hakaba hanateganywa ko hakorerwa ubuhinzi bw’igihingwa cya ‘pomme’.

Iyi nama ije ikurikira icyemezo cy’Inama y’Abaminisitiri yo ku wa 31 Ukwakira 2012, kigena uburyo iri saranganya rigomba gukorwamo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO