Gasabo : Imfubyi ya Jenoside iracyasiragizwa ku gusubizwa imitungo ya se

Uwonkunda Josiane, imfubyi ya Jenoside yakorewe Abatutsi muri 1994, isambu y’ababyeyi be yafashwemo ibibanza yijejwe kuyisubizwa amaso ahera mu kirere ; mu batuyemo harimo n’urugo rw’umuyobozi w’Akarere wungirije ushinzwe imibereho myiza muri Gasabo.

Uwonkunda w’imyaka 22, Jenoside yakorewe Abatutsi mu mwaka 1994 yabaye afite imyaka itatu nyuma yaje kurerwa mu muryango i Kamonyi, mu 2006 yimukiye mu mujyi wa Kigali, aza kubwirwa n’umusaza wari uziranye na se ko wa se yari afite isambu mu Rugando mu murenge wa Kimihurura mu karere ka Gasabo.

Uwonkunda akigera aho isambu ya se iri yasanze yarubatswemo, ahandi harakaswemo ibibanza. Guhera muri 2010 atangira kuyikurikirana azenguruka mu buyobozi bamwizeza kuyisubizwa cyangwa agahabwa ingurane, ariko kugeza ubu ntibiracyemuka.

Mu batuye muri icyo kibanza harimo Nyakana Mohamed n’umugore we Uwimana Marie Louise, umuyobozi w’Akarere wungirije ushinzwe imibereho myiza y’abaturage mu karere ka Gasabo, Rugira Peter, Mukandutiye Sada, Itorero ry’abahamya ba Yehova naryo ryubatsemo riguze na Nyakana, Ndamira Emmanuel, Ntakirutimana Bradoc na Nsabimana Eric bategetswe gusubiza isambu ya Uwonkunda bitarenze ku italiki 30 Nyakanga 2012 ariko na n’ubu ntacyo arahabwa.

Mu bandi batuye mu kibanza cya Uwonkunda, ni Habiyambere Jean Ennock na Mukarwego Merry baragije kumwishyura.

Mu mpapuro zitandukanye IGIHE dufitiye kopi zigaragaza uko iyi mfumbyi yakurikiranaga ibye mu nzego zitandukanye, hari uruhererekane rw’amabaruwa asaba kumurangiriza ikibazo.

Josiane avuga ko kuba atarahabwa isambu y’ababyeyi be biterwa n’uko harimo n’umuyobozi w’Akarere ka Gasabo wungirije ushinzwe imibereho myiza, Uwimana Marie Louise, ati “ Ntabwo byoroha kurenganurwa mu gihe uwakurenganyije ariwe ugaruka ugatakira.”

Imwe mu mabaruwa asaba ko Uwonkunda asubizwa ibye, Umuyobozi w’Akarere ka Gasabo, Ndizeye Willy, yandikiye abantu umunani bafashe ibibanza mu isambu y’ababyeyi be ku itariki ya 23 Nyakanga 2012, yasabaga ko bagomba kuba bamwishyuye bitarenze ku wa 30 Nyakanga 2012.

Nk’iyandikiwe umugabo w’Umuyobozi w’Akarere ka Gasabo wungirije ushinzwe imibereho myiza yagiraga iti “ Bwana Nyakana Mohamed, nshingiye ku mwanzuro wabagize Komisiyo ishinzwe gukurikirana no gukemura ibibazo by’imitungo y’abana b’imfubyi za Jenoside yakorewe Abatutsi mu mwaka 1994, nejejwe no ku kwandikira ngira ngo nkumenyeshe umwanzuro komisiyo yafashe kuri icyo kibazo ngusaba gusubiza Uwonkunda Josiane ikibanza cye kubera ko utagaragaje uburyo wakibonyemo. Ikindi n’uko utabashije guha Uwonkunda Josiane ingurane yabwo hagendewe ku bwumvikane nk’uko Uwonkunda Josiane yabyifuje. Usabwe kubahiriza uyu mwanzuro bitarenze itariki ya 30 Nyakanga 2012, utabikora ukazakurwa muri icyo kibanza ku ngufu za Leta.”

Uwimana Marie Louise, umuyobozi w’Akarere wungirije ushinzwe imibereho myiza muri Gasabo ufite umugabo uvugwa mu batarishyura imfubyi.

Ibyandikiwe Nyakana Mohamed, byanandikiwe abandi bafitanye ikibazo na Uwonkunda Josiane kumubera mu bya se.

Uwonkunda yandikiye Umujyi wa Kigali asaba ko wamufasha gusubizwa ibye, kuko Akarere ka Gasabo ntacyo kamufashije, harimo n’uwakamukemuriye ikibazo ukivugwamo, Umujyi wa Kigali usaba Akarere ka Gasabo gufasha iyo mfubyi igahabwa imitungo y’ababyeyi be vuba, ariko na n’ubu ntarayihabwa.

Uwonkunda asaba ko Akarere ka Gasabo kakerura kakavuga ko kananiwe kumucyemura ikibazo hakaba hakwifashishwa ubundi buryo nk’inkiko.

Uwimana Marie Louise, umuyobozi wungirije ushinzwe imibereho myiza y’abaturage muri Gasabo, ufite inyubako n’umugabo we Nyakana Mohamed yohereza ubutumwa bugufi bugira buti “Nifuzaga kugusaba ko wazaza ku karere kuko byaba byiza kurushaho kuko twakwifashisha n’impapuro hagasohoka inkuru nzima.” Ibi ariko dukurikije uruhererekane rw’amabaruwa dufitiye kopi yerekana neza imiterere y’ikibazo.

Ubwo IGIHE yavuganaga kuri telefone n’ Umuyobozi w’Akarere ka Gasabo, Ndizeye Willy, abajijwe icyatumye itariki yari yasabye ko Uwonkunda yaba yishyuwe, bikaba bitarakozwe, yasubije ko bo nk’Akarere bari bashyizeho umunsi ntarengwa ariko abaregwa nabo baza gusaba kurenganurwa ati “ Ntabwo abantu bari gusaba ko barenganurwa ngo duhite dushyira imyanzuro mu bikorwa.”

Ndizeye avuga ko nubwo hakomeje kugaragara amananiza yo kumwishyura ko Uwonkunda agomba kwishyurwa ku byo se yasize, ati “Bamugora batamugora imitungo ni iye.”

Ibaruwa Umuyobozi w’Akarere ka Gasabo yandikiye abagomba kwishyura Uwonkunda