IGIHE.com > Amakuru > U Rwanda
Gasabo: Akabari gahinduka urusengero ku cyumweru kafungiwe imiryango

Gasabo: Akabari gahinduka urusengero ku cyumweru kafungiwe imiryango


Yanditswe kuya 9-01-2013 - Saa 16:42' na Nkurunziza Faustin

Right Vision batangaga serivisi za Café-Resto na Bar yo mu Murenge wa Kimironko, Akarere ka Gasabo mu Mujyi wa Kigali, yahagaritswe gukora kubera umwanda abayobozi bahasanze no kuba mu mpera z’icyumweru haba urusengero.

Abatuye hafi y’aka kabari babwiye abayobozi bari bagasuye ko ku cyumweru mu masaha ya mu gitondo haba humvikana ibicurangisho n’indirimbo byo mu rusengero, bivuze ko haba hari gusengerwa.

Ibi byatumye hafatwa icyemezo cyo kuhafunga kuri uyu wa cyenda Mutarama 2013, mu rwego rwo kwita ku isuku n’ubwiza bw’Umujyi wa Kigali n’ibikorwa remezo byawo ubwo abayobozi b’umujyi n’uturere tuwugize bbasuraga za resitora bareba imiterere y’isuku izirangwamo.

Umuyobozi w’Umujyi wa Kigali wungirije ushinzwe ubukungu Nizeyimana Alphonse, yavuze ko bihaye gahunda yo kwita ku isuku izamara igihe kingana n’amezi atatu yatangiye ku ya 11 Ukuboza 2012; kugira ngo hagenzurwe isuku yo ku mihanda ya kaburimbo n’imihanda y’amabuye, hamwe n’isuku yo mu ma resitora n’utubari.

Nyuma yo gusanga Right Vision irimo inyama zidapfundikiye, ibyo kurya bivangavanze n’ibindi bigaragaza umwanda nk’ibishishwa bya avoka byandagaye, Nizeyimana yasabye ko iyi resitora iba ifunzwe kuko ifite umwanda ukabije.

Ikindi ni uko kuba hari igihe kigera iyi resitora ikaba urusengero bitemewe, akaba yagize ati “Bikwiriye kurwanywa tukirinda akajagari nk’aka. Urusengero n’akabari ntibikwiriye kubangikanywa.”

Yongeyeho ko iyo watse icyangobwa cyo gukorera imirimo ahantu runaka bitavuze ko uba ugomba kurengera ukahakorera ibindi binyuranyije n’icyo wahasabiye.

Muri iyi gahunda yo kugenzura isuku kandi harebwa uko ibishingwe bikurwa mu ngo, no kureba uko ibindi bikorwa remezo bifatwa n’abakora imirimo itandukanye munsi y’ubutaka ntibongere kubisana.

Abo twaganiriye nyuma y’ifungwa ry’iyi resitora bavuga ko iyi ari nka ‘business’ isigaye ikorwa mu nsengero zimwe na zimwe, kuko usanga ahari utubari hakodeshwa ku cyumweru hagahinduka insengero. Aha bibazaga icyo abayobozi b’inzego z’ibanze bakora iyo badakumira ibintu nk’ibi hakiri kare.

Mu mafoto y’umwanda wahasanzwe

Mu bikari hasanzwe umwanda
Inyama z'ingurube (Akabenzi) basanze zidapfundikiye
Muri firigo basanze inyama zarimo zarasaziyemo kandi harimo umwanda
Ahatunganyirizwa urusenda hari mu mwanda
Aha haba ubunywero hagahinduka n'urusengero kucyumweru
Umwanda mu masafuriya

Photo/Faustin N.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO