IGIHE.com > Amakuru > U Rwanda
Cyamunara yatejwe nabi yatumye asubira mu manza

Cyamunara yatejwe nabi yatumye asubira mu manza


Yanditswe kuya 13-03-2013 - Saa 08:39' na Emmanuel Kwizera

Urubanza rwa Kanimba John n’abo rureba bagera kuri 11, nyuma yo kongera kuburanishwa bamwe mu baregwa bagaragaje uko miliyoni zisaga 420 zavuye muri cyamunara y’amagorofa atatu zatangiye kugabagabanwa baniregura byimbitse.

Muri uru rubanza rurimo batanu barega n’abaregwa batandatu, imvo n’imvano yarwo ni sheki ya Sosiyete Expo World Furniture (EOF) ya miliyoni 36 yatanzwe n’umuhungu wa Kanimba John witwa Nizeyimana Johnson itazigamiwe igahabwa uwitwa Kabonera Ramazani.

Kabonera yitabaje inkiko kuriga ngo yishyurwe izi miliyoni, Nizeyimana ategekwa kwishyura ariko aburirwa irengero. Urukiko rwategetse ko hagurishwa igorofa ya Kanimba kugira ngo haboneke inyishyu kuko Nizeyimana yari umwe mu bari bagize Sosiyete Expo World Furniture yari ihuriweho n’umuryango wabo inahagarariwe na se.

Umuhesha w’Inkiko Kagame Alexis yahise ahabwa icyemezo cyo kugurisha igorofa kugira ngo hishyurwe miliyoni 38 za Kabonera, cyakora ibi byarenzweho kuko Noteri w’Akarere ka Kicukiro Ruzindana Landrine yahise ateza amagorofa atatu, kandi yaragombaga guteza imwe mu cyamunara cyabaye ku wa 25 Mata 2012 azi ko yose ari aya Kanimba. Aya magorofa yose yaguzwe na KIME Ltd kuri miliyoni magana ane na makumyabiri n’ibihumbi icumi.

Kuva ku itariki ya 4 kugeza ku ya 6 Werurwe 2013, urubanza rwongeye kuburanishwa. Me Mutabazi Abayo Claude uhagarariye Kanimba na bagenzi be na Me Rwayitare Serge uhagarariye Nizeyimana Johnson bavuze ko uwatsinzwe mu rubanza ari EWOF atari Kanimba, rero ko ubwishyu bwa Kabonera bwagombaga kuva mu mutungo wayo atari mu mutungo wa Kanimba ku giti cye, kandi ko sosiyete yari iwufite uhagije wari kuvamo miliyoni 38 zari zikenewe nk’inyishyu.

Kanimba John ntiyanyuzwe n'uko urubanza rwarangijwe asubira mu nkiko

Me Mutabazi avuga ko icyo anenga ari uko KIME Ltd yaguze mu cyamunara igatanga sheki ya miliyoni 420 n’ibihumbi icumi itazigamiwe nk’uko ngo bigaragara ku mikorere ya konti ya KIME iri muri FINA BANK, ko ku itariki 25 Mata 2012 igihe yaguraga mu cyamunara nta mafaranga yari ifite kuri konti kugeza ku itariki ya 30 Mata 2012, kuko mu cyamunara nta deni kandi sheki yishyurwa igomba kuba ifitiwe amafaranga (amafaranga ari kuri konti).

Yongeyeho ko kuba urukiko rwarategetse kugurisha igorofa imwe Noteri akagurisha amagorofa atatu, yanyuranyije n’icyemezo cy’urukiko, mu gihe iperereza ryagaragaje ibipimo nyakuri by’ikibanza. Yasabye ko cyamunara yaseswa Kanimba agasubizwa ibye, abarega bagahabwa indishyi z’akababaro n’umuturanyi wabo (wa Kanimba) Niyomwungeri agasubizwa igorofa ye yagurishijwe mu cyamunara.

KIME Ltd ihagarariwe na Me Ndamage Ferdinand, yireguye ivuga ko ikibanza nomero 2998 kiburanwa gikubiyemo n’inzu ya Niyomwungeri François kuko ngo cyari igisigara Kanimba John yometse ku kibanza cye, ariko bikaba bigaragara ko icyo yita igisigara ari ikibanza cyanditse kuri Niyomwugeri François gifite nomero 253 we yita igifitirano.

Yavuze ko amafaranga yavuye muri cyamunara yashyizwe kuri konti y’Urukiko rw’Ikirenga, ko abari bayafiteho uburenganzira bakuyeho ayabo Kabonera Ramazani agatwara miliyoni 38, Akarere ka Kicukiro kagatwara 6% angana na miliyoni 26, na ho Ikigo cy’imisoro n’amahoro mu Rwanda kigakuraho miliyoni ebyiri z’imisoro.

Kuba KIME Ltd yaratanze sheki nta mafaranga ari kuri konti yarabyemeje, ariko avuga ko bitabuza umuntu ugura mu cyamunara ko ashatse amafaranga ahandi akayishyura nyuma nta mategeko yaba yishe.

Umuhesha w’Inkiko Kagame K. Alexis we yireguye avuga ko yubahirije imihango y’ifatira, kuko mu rubanza yarangizaga n’ubwo uwaregwaga kwishyura indishyi ari EWOF Sarl we yumvaga na Kanimba John yaragombaga kwishyura Kabonera Ramazan miliyoni 38, kuko urukiko rwa Nyarugenge rwari rwavuze ko Kanimba uhagarariye Expo World Fourniture (EWOF sarl) agomba kwishyura. Ngo ni yo mpamvu yamwishyuje kandi kuri we sosiyete EWOF na Kanimba John ntaho bataniye.

Noteri w’Akarere ka Kicukiro Ruzindaza Landrine, we yavuze ko yubahirije icyemezo cy’umucamanza asobanura ko abavuga ko yibeshye ku bipimo bigaragara ku kibanza cya Kanimba atari we wabyibeshyeho ahubwo ari uwakoze igenzura ry’ikibanza.

Urukiko rwamubajije impamvu icyemezo cy’urukiko cyategekaga ko hagurishwa igorofa imwe iri mu kibanza 2998 cya Kanimba John we akagurisha amagorofa atatu, umuburanira avuga ko atazi ikinyarwanda neza ariko ngo abamusobanuriye bamubwiye ko iyo bavuze “igorofa” biba bivuze igorofa imwe cyangwa nyinshi ngo kuko bidashoboka gushyira “igorofa” mu bwinshi ngo bayite amagarofa.

Gusa urukiko ntirwanyuzwe n’ibi bisobanuro, kuko rwongeye kumubaza niba amagorofa yose yo muri Kigali yakwitwa “igorofa” agasubiza ko yose yitwa igorofa kuko ijambo “amagorofa” ritabaho mu kinyarwanda.

Uru rubanza ruzasomwa ku itariki ya 22 Werurwe 2013 ku Rukiko Rwisumbuye rwa Nyarugenge saa kumi z’umugoroba.

Izi nzu zatejwe cyamunara nk'iz'umuntu umwe ariko si iz'umwe
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO