IGIHE.com > Amakuru > U Rwanda
COOPEDU yateje abagore imbere, ariko ntiyaheje n’abagabo -Jeanette Kagame

COOPEDU yateje abagore imbere, ariko ntiyaheje n’abagabo -Jeanette Kagame


Yanditswe kuya 29-06-2012 - Saa 22:16' na Olivier MUHIRWA

Ibi bi ibyagarutsweho na Jeanette Kagame Umufasha wa Perezida wa Repubukika y’u Rwanda, ubwo ku mugoroba wo kuri uyu wa Gatanu tariki ya 29 Kamena 2012 yari mu birori byo kwizihiza isabukuru y’imyaka 15 COOPEDU imaze ibayeho.

Muri uyu muhango Minisitiri w’Ubucuruzi n’Inganda François Kanimba yashimiye byumwihariko imikorere ya COOPEDU kuva yashingwa kugera aho igeze ubu, ashima ko abanyamuryango bayo bakoze kandi bakabasha kugera ku bintu byinshi bishimishije nta mfashanyo batse, ngo kuko iyi Koperative yafashije cyane cyane mu iterambere ry’abari n’abategarori.

Kanimba yagize ati: ”Nagiye nshimishwa n’imikorere ndetse n’imicungira ya myiza COOPEDU, kuko atari ikigo gitagaguza amafaranga mu nguzanyo zidafatika cyangwa zitizwe neza, ibi nibyo mbashimira byimazeyo.”

Kanimba kandi yashimye uburyo abanyamuryango ba COOPEDU bayibonamo, ari nabyo bigira uruhare mu gucunga umutekano w’amafaranga ibitse. Yanasabye COOPEDU gukomeza gukangurira abandi Banyarwanda gukorana n’ibigo by’imari, mu rwego rwo kugirango Abaturarwanda benshi babashe kwiteganyiriza.

Kanimba yagize ati:”Hari bamwe bakibwirako hazigama uwahaze, ariko uko si ko bimaze kuko kuzigama ari ukwigomwa.” Yanabijeke kubashyigikira mu nzira barimo yo kuba banki mu minsi iri imbere, ndetse no kubashyigikira muri gahunda barimo yo kugaba amashami hirya no hino mu gihugu.

Mu ijambo rye Jeanette Kagame yashimiye abagize igitekerezo cyo gushinga COOPEDU ndetse n’abanyamuryango bayo, ashima kuba COOPEDU yaragize akamaro mu gutinyura abagore nyuma ya Jenoside mu kugana ibigo by’imari, ndetse ashima ubwuzuzanye bugaragara muri iyi Koperative.

Jeanette Kagame agira ati: “COOPEDU ijya gutangira yari igamije guteza imbere umugore, ariko ntiyigeze iheza abagabo nk’uko bigaragara.”

Yasabye abanyamuryango gukomeza ubwuzuzanye ndetse bukababera imbarutso y’iterambere ry’umuryango ndetse n’igihugu muri rusange,ariko kandi ngo n’ibitaragenze neza bigomba kubabera isomo.

Umufasha wa Perezida yasabye abanyamuryango ba COOPEDU gutekereza ku by’ingenzi, harimo guhindura imyumvire kuko gusaba inguzanyo hari abo bitera ubwoba by’umwihariko ku bagore kuko hari abitinya ntibagane amabanki. Asanga kandi kwegera abandi no kwishyira hamwe byaratinyuye bamwe mu kwaka inguzanyo no kwiteza imbere.

Yagize ati:” iyo umuntu ahereye kuri bike biroroha kubyumvisha abandi, kuko aba afite urugero rufatika.”

Jeanette Kagame yasabye abagannye COOPEDU kwegera urubyiruko rw’abakobwa bakabaha inzira yo gutinyuka, kandi bakabatoza kugana ibigo by’imari babitsa kandi basaba inguzanyo kuko ngo byabarinda ingeso nyinshi zabashora mu bitabateza imbere, ahubwo bakiyubaka bagahangana n’abashobora kubashukisha imari. Asanga kandi hakenewe abantu bo kwigisha abagana ibigo by’imari kutiheba igihe badahise babona inyungu, hakaba hakenewe kandi ko habaho guhanga udushya dukurura abagana COOPEDU.

Asoza ijambo rye Jeanette Kagame yagarutse kubatabasha kubahiriza inshingano zo kwishyurira igihe inguzanyo, hakaba hashobora kuvukamo ingorane zirimo kugurisha ingwate ndetse n’indi kitungo ariko, ndetse bamwe bahitamo guhunga igihugu kubera kunanirwa kwishyura, maze bakagenda bavuga ko babuze amahoro, cyangwa bahunze ibibazo bya politiki nyamara baba bahunze amabanki.

Koperative yo kubitsa no kuzigama COOPEDU yatangiye mu mwaka w’1997, ku itariki ya 15 Kamena itangizwa n’abanyamuryango bagera kuri 610 ariko kugera mu mpera z’umwaka ushize mu kwezi k’Ukuboza yari ifite abanyamuryango bagera ku 17,393.

Muri uyu muhango wo kwizihiza isabukuru y’imyaka 15, COOPEDU yahaye impano Jeanette Kagame, ndetse inemera kwishyurira abanyeshuri batatu amashuri yisumbuye biciye mu Muryango "Imbuto Foundation" uyoborwa na Jeanette Kagame.

Aha Jeanette Kagame na Perezida w'Inama y'Ubuyobozi ya COOPEDU bakataga umutsima
Jeanette Kagame ahabwa impano na COOPEDU
Bamwe mu banyacyubahiro bari bahari

Nk’uko Perezida w’Inama y’Ubuyobozi Sissi Mukanyirigira Dimitrie abivuga, ngo muri iyi myaka 15 ashize bakoze ibishoboka byose mu kugera ku ntego zo guteza imbere abanyamuryango, binyuze mu bikorwa byo kuzigama no gutanga inguzanyo. Kugeza ubu COOPEDU ifite amashami atandatu hirya no himo mu mujyi wa Kigali ariko mu misi ya vuga aragaba n’indi banki i Rwamagana.

Foto:Imbuto Foundation

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO