IGIHE.com > Amakuru > U Rwanda
Burera:  92%  by’abaturiye  urugomero rwa Ntaruka baracyacana agatadowa

Burera: 92% by’abaturiye urugomero rwa Ntaruka baracyacana agatadowa


Yanditswe kuya 3-02-2013 - Saa 19:13' na Faustin Nkurunziza

Akarere ka Burera, abaturage bafite ikibazo cyo kutagira amashanyarazi ahagije kandi baturiye urugomero rwa Ntaruka.

Umuyobozi w’Akarere ka Burera, Sembagare Samuel, mu kiganiro “Kubaza bitera kumenya” gica kuri radiyo na televiziyo by’igihugu, yavuze ko Akarere ayobora gafite ikibazo ko abaturage bagerwaho n’umuriro bari ku kigereranyo cya 7,9% mu mirenge 17 ikagize, nyamara Urugomero rwa Ntaruka rukaba rugabuburira abatuye kure yarwo kugera no mu Mujyi wa Kigali.

Umuyobozi w’Akarere ka Burera, Sembagare Samuel(Ifoto/internet)

Umuyobozi wa EWSA ishami rya Musanze na Burera, Mukiza Anaclet, avuga ko iri janisha rya 7,9% ari irya buri rugo ku rundi rtunze amashanyarazi, ko amashanyarazi ahenze kugera kuri buri muturage, ati “Kugeza amashanyarazi ku muturage biracyari ibintu bisaba inzira ndende bitewe n’ubukene ku buryo buri muturage abasha kuyishyura.”

Avuga ko hari amafaranga umuturage abanza kwishyura kugira ngo ahabwe amashanyarazi, harimo ibihumbi 56 atanga kuri EWSA. Umuturage ariko ngo ashobora kuyatanga mu byiciro, agatanga ibihumbi 15, andi akagenda ayishyura buhoro buhoro.

Ariko abaturage bahamagaye kuri telefone bo mu murenge wa Rugengabare bo bavuga ko bakwa amafaranga ibihumbi 70 yo kwibumbira mu mashyirahamwe kugira ngo bahabwe amashanyarazi.

Abaturage bagaragaza kobababazwa no guturana n’urugomero rutanga maashanyarazi nyamara bakaba nta muriro bagira, ati “ Ko twiyubakira ibiro by’akagali tukabyuzuza habuze iki ngo duhabwe amashanyarazi, ko twakwishakamo ubushobozi, kuki amashanyarazi y’urugomero rwa Ntaruka aduca hejuru habuze iki kugira ngo tuyahabwe !

Sembagare Samuel, avuga ko bafite gahunda yo kuva kuri 7, 9% bakagera kuri 12% mu mwaka utaha wa 2014.

Umuyobozi wa EWSA ishami rya Musanze na Burera, yavuze ko abantu bagendaga bishyira hamwe baca amafaranga abaturage kugira ngo babashe guhabwa amashanyarazi, cyakora ngo ibyo barabiciye kuko biteza ibibazo mu baturage.

Yagize ati “Hari ababikoramo ubucuruzi bakabaka amafaranga kandi ntabwo ari EWSA ishinzwe kuyakira.”

Sembagare Samuel, avuga ko bafite gahunda yo kuva kuri 7, 9% bakagera kuri 12% mu mwaka utaha wa 2014.

Akarere kavuga ko gafatanyije n’ikigo cya Leta gishinzwe ingufu isuku n’isukura (EWSA), ngo barateganya kugeza amashanyarazi ku baturage benshi mu mwaka utaha, bakazabigeraho biciye muri gahunda yo gutura mu midugudu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO