Kwamamaza

Zimwe muri gahunda za leta ziteza imbere abaturage zigiye kwegurirwa imiryango yigenga

Yanditswe kuya 14-09-2016 saa 19:26' na Rabbi Mako Umucunguzi


Guverinoma y’u Rwanda igiye gutangira gufatanya byeruye n’imiryango itari iya leta, hagamijwe kwihutisha ishyirwa mu bikorwa rya gahunda zisanzweho zo kwita ku mibereho y’abaturage bakiri mu bukene, zajyaga zidindira ku mpamvu zinyuranye.

Uyu mwanzuro wemejwe n’Inama y’Abaminisitiri yo kuri uyu wa Kabiri tariki 13 Nzeri ku cyifuzo cyatanzwe mu mwiherero w’abayobozi bakuru b’igihugu muri Mata, wemezwa hamaze kurebwa uko gahunda zitandukanye zigenewe abatishoboye n’ibindi byiciro by’Abanyarwanda zishyirwa mu bikorwa.

Minisiteri y’Ubutegetsi bw’Igihugu ivuga ko leta yari imaze no kubona ko imaze gushyira amafaranga menshi muri gahunda zita ku mibereho y’abaturage, ariko bikagaragara ko ibyagezweho byakwiyongera habayeho ubufatanye n’imiryango yigenga.

Umunyamabanga Uhoraho muri Minisiteri y’Ubutegetsi bw’Igihugu, Vincent Munyeshyaka, mu kiganiro n’abanyamakuru yavuze ko iyi gahunda igamije kunoza uburyo izo gahunda zigezwa ku bo zigenewe.

Ati “Ntabwo ari ukuvuga ngo leta inshingano twakoraga zose tuzihaye imiryango itegamiye kuri leta, ahubwo ni ukuvuga ngo reka dufatanye turebe ukuntu tunoza imikorere myiza, dukemure ibibazo bimwe na bimwe byagiye bigaragara.”

Munyeshyaka yavuze ko bizagira uruhare mu gukemura ibibazo byagiye bigaragara, nk’imiryango y’inshike igenerwa inkunga y’ingoboka ariko kuyibonera igihe bikagorana, ibibazo muri gahunda ya Girinka n’ibindi, kandi iyi miryango igasinyana amasezerano na leta agaragaza ibigomba kugerwaho buri mwaka, inshingano za buri ruhande n’uko leta izakurikirana ko bigerwaho.

Ati “Igitekerezo ni ukugira ngo tuzatoranye imiryango itegamiye kuri leta ikorera mu gihugu, amadini n’amatorero afite ubushobozi ndetse n’ubunararibonye mu kuba barakoze porogaramu zisa nk’izi, ku buryo twakorana nabo, nka Leta y’u Rwanda tugafata igice ku ngengo y’imari ya buri mwaka twashyiraga muri izi gahunda noneho tukayiha iyo miryango bagashyira mu bikorwa”

Iyi miryango izahabwa igice kimwe cy’imishinga

Munyeshyaka yavuze ko Minisiteri ahagarariye yatekereje ko leta yatangira ishyira muri ubu bufatanye ingengo y’imari ingana na 10% ry’ayo isanzwe ishyira muri izi gahunda ziteza imbere abaturage buri mwaka, ni ukuvuga miliyari 7 Frw, zizahabwa imiryango izatoranywa hakurikije ubushobozi n’ubunararibonye bafite harebwe kuri gahunda igiye gukorwa.

Ati “Hazaba uburyo bwo gutoranya abo tuzakorana nabo, ariko habeho n’uburyo bwo gupiganirwa ayo mafaranga. Amafaranga azaba ahari, Ikigo cy’Igihugu cy’Imiyoborere, RGB, nicyo kizaba gikurikirana iyi gahunda, ikazakorerwa mu turere twose kandi ikazareba za porogaramu z’ibanze zishinzwe kuzamura imibereho myiza y’abaturage.’’

Izo gahunda zirimo Girinka, VUP n’ibyiciro byayo uko ari bitatu (Inkunga y’ingoboka ya buri kwezi, amafaranga ashyirwa mu bikorwa by’imirimo y’amaboko ahemba abakozi, n’amafaranga ajya gufasha abaturage mu mishinga itandukanye), Ubudehe n’izindi.

Ubu bufatanye kandi buzagezwa no mu gukemura ibibazo bitandukanye birimo abana bata amashuri n’utugoroba tw’ababyeyi tudakora neza, ku buryo bwitezweho imikorere inoze mu kugeza ku baturage gahunda zibagenewe kandi ku gihe.

Biteganyijwe ko iyi mikoranire izatangirana n’umwaka w’ingengo y’imari wa 2017/2018, ndetse imiryango itegamiye kuri leta ikaba yaramaze kumenyeshwa ibijyanye n’ubu buryo bushya.

Umunyamabanga Uhoraho muri Minaloc, Vincent Munyeshyaka
Abitabiriye ikiganiro n'abanyamakuru cya nyuma y'Ibyemezo by'Inama y'Abaminisitiri

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved