Yego Moto na GIZ bagiye guhugura abagore 200 banabafashe gutangira umwuga wo gutwara abagenzi kuri moto

Yanditswe na Habimana James
Kuya 11 Kamena 2019 saa 08:46
Yasuwe :
0 0

Ikigo Yego Moto gifatanyije n’Umushinga w’Abadage wita ku iterambere (GIZ), batangije umushinga uzahugura abagore 200 bo mu Mujyi wa Kigali ibijyanye n’umwuga wo gutwara abagenzi kuri moto, nyuma bakazabafasha kubona moto ku giciro gito.

Kuva muri Nyakanga kugeza mu Ukuboza uyu mwaka nibwo aba bagore bazahugurwa mu gihe cy’amezi atandatu, nyuma bashinge koperative ibahuza.

Umuyobozi Mukuru wa Yego Moto, Mahesh Kumar, yavuze ko kugira ngo batekereze ku bagore ari uko basanze barasigaye inyuma cyane cyane muri uyu mwuga wo gutwara abagenzi kuri moto.

Yego Moto yagaragaje ko mu bagabo barenga ibihumbi 45 batwara moto, abagore batanu gusa aribo bakora aka kazi.

Mahesh Kumar yavuze ko mu guhitamo abagore bazahugura, bazatanga amatangazo yo kwiyandisha nyuma bahitemo aba 200 bagendeye ku bizaba bikenewe birimo nko kuba bazi gusoma no kwandika.

Kumar yavuze ko muri iki gihe cy’amezi atandatu, abazaba batoranijwe bazigishwa ururimi rw’Icyongereza, bigishwe uko Umujyi wa Kigali uteye, uburyo bwo kwakira abakiriya, amakuru ajyanye n’u Rwanda, uburyo bafasha uwagize impanuka, gutwara moto, ikoranabuhanga, gukora ibinyabiziga byagize ikibazo no kwirwanaho mu gihe bagize ikibazo mu kazi.

Yagize ati “Nyuma yo kumara amezi atandatu bahugurwa, bazanakorera impushya zo gutwara ibinyabiziga kandi bafashwe kubona moto ku mafaranga make, bazajya bishyura buri cyumweru mu buryo buboroheye.”

Yavuze ko kuba barahisemo abagore ari ukugira ngo na bagenzi babo bumve ko bashoboye bityo n’ikibazo cy’ubushomeri kirandurwe mu bagore.

Umuyobozi Ushinzwe ibikorwa muri ambasade y’u Budage mu Rwanda Götz Lingenthal, yavuze ko GIZ yishimiye gufatanya na Yego Moto muri iki gikorwa.

Yagaragaje ko bikwiye ko abagore na bo bafashwa kwitinyuka bagakora uyu mwuga wo gutwara abagenzi kuri moto.

Ati “Mu mibare ihari igaragaza ko abagabo aribo bakora cyane impanuka mu gihe batwaye ibinyabiziga kurenza abagore, abagore bari munsi ya 25% ku bagabo batwara ibinyabiziga, nta mpamvu yo kugira ngo abagore basigare inyuma muri uyu mwuga.”

Umuvugizi wa Polisi ishami ryo mu muhanda, SSP Jean Marie Vianney Ndushabandi, we yavuze ko “Nka Polisi tuzakomeza kubaba hafi kandi twizeye ko impanuka zizagabanuka kuko nk’uko tubizi, bashiki bacu mu buryo baremye bakunda kwitonda kurenza abagabo.”

Yashishikarije abo bagore gukoresha ubumenyi bwabo ngo babone impushya zo gutwara ibinyabiziga, aho bazanyura mu nzira zisanzwe ku muntu wese ukeneye uruhushya rwo gutwara ikinyabiziga mu Rwanda.

Götz Lingenthal, Chargé d'affaires muri ambasade y’Abadage mu Rwanda, yavuze ko GIZ yishimiye gufatanya na Yegomoto muri iki gikorwa
Umuvugizi wa Polisi ishami ryo mu muhanda, SSP Ndushabandi Jean Marie Vianney yavuze ko yishimiye kuba abagore bagiye guhugurwa muri uyu mwuga
Umuyobozi Mukuru wa Yegomoto Mahesh Kumar na Ellen Kallinowshky wari uhagarariye GIZ ubwo basinyanaga amasezerano yo guhugura aba bagore
Umuyobozi Mukuru wa Yegomoto Mahesh Kumar, yavuze ko kugira ngo batekereze ku bagore ari uko basanze barasigaye inyuma cyane cyane muri uyu mwuga wo gutwara abagenzi kuri moto
Yego Moto na GIZ bagiye guhugura abagore 200 banabafashe gutwara abagenzi kuri moto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza