Yatewe inda n’uwamuguriye ikariso agiye mu mihango bwa mbere (Video)

Yanditswe na Mazimpaka Jean Pierre
Kuya 7 Ukuboza 2018 saa 08:44
Yasuwe :
0 0

Mugeni [izina ryahinduwe] ni umubyeyi uri mu kigero cy’imyaka 25. Magingo aya afite abana babiri ariko ahorana amarira n’agahinda amaranye imyaka irenga umunani aterwa no kuba yaratewe inda n’umugabo wamugiriye ubuntu akamugurira ikariso ubwo yajyaga mu mihango bwa mbere.

Avuka mu Karere ka Gasabo, mu Murenge wa Ndera. Afite abana babiri umukuru afite imyaka umunani, umuto afite imyaka itandatu. Se yitabye Imana, nyina ntiyishoboye kandi abana n’ubwandu bwa Virusi itera Sida.

Mu kiganiro na IGIHE, Mugeni yasobanuye ibyamubayeho, agaragaza ko ari ingaruka zo kuba abana b’abakobwa bakiri bato batitabwaho uko bikwiye.

Ati “Mama ntiyari yifashije, anyohereza gukora akazi ko mu rugo kwa Mama wacu. Mama wacu nta n’ikariso yanguriraga. Najyaga mu mihango nkayijojoberezaho”

Yakomeje avuga ko umugabo bari baturanye yigeze kumubona, amubaza impamvu yijojoberezaho imihango undi amubwira ko nta kariso agira.

Uwo mugabo ngo yakomeje kumukurikirana akajya amubaza niba nta kariso iwabo bari bamugurira. Amaze kubona ko ntayo nibwo yamuhaye amafaranga ibihumbi bibiri (2000 Frw) ngo agure utwenda tw’imbere.

Nyuma yo kugura uwo twenda turimo na ya kariso yahoraga ataka, uwo mugabo yaje kujya kwa Nyinawabo arahagorobereza kuko bacuruzaga inzoga.

Iryo joro nibwo uwo mugabo yasabye nyina wabo w’uwo mukobwa, ko arara muri uwo rugo, maze amujyana mu cyumba uwo mukobwa yararagamo.

Ati “Yangezeho nko mu masaha ya saa saba z’ijoro. Numva mama wacu arankinguje, ati ‘nimusasire uyu muntu’, nti ese uyu muntu ararara he ko uzi ko aho turara ari hato? ati ‘winshingaho muko nawe aha si iwawe! Uwo munsi nibwo twararanye n’uwo mugabo, aramfata arandongora, antera inda, ubu umwana afite imyaka umunani.”

Nyuma yo guterwa inda, uyu mwana yakomeje ubuzima bushaririye, yirukanwa kwa nyinawabo. Umugabo wamuteye inda ajya kumukodeshereza i Kanombe, ariko umugore we aramumenesha.

Nyuma uyu mubyeyi yaje gushakana n’umusore wo mu kigero cye, babyarana undi mwana, ariko nawe nyuma y’igihe aramuta.

Aba mu nzu y’icyumba kimwe, itagira amadirishya akodesha ibihumbi birindwi ku kwezi, ariko nayo ayabona yiyushye akuya.

Uyu avuga ko gutwita kw’abangavu hari aho biterwa ahanini n’imibereho mibi no kutitabwaho kw’abana b’abakobwa.

Ati “Icyo mbona gituma umuntu atwara inda zitateganyijwe ni uko umuntu aba ari mu buzima bubi, yagera hirya, akibaza uko abaho bikaba ngombwa ko baba bamutera inda.”

Yitangaho urugero akavuga ko umugabo amusabye ko baryamana ngo amuhe ibihumbi bitanu (5000 Frw) byo guhahira abana be atabyanga kuko nta yandi mahitamo afite.

Uyu mubyeyi yifuza ko yafashwa kubona aho kuba ndetse agahabwa ubutabera.

Ati “Ubufasha nakwaka nk’ubuyobozi, ni uko banyubakira inzu y’uburushyi, nkarereramo abana banjye. Menye ngo niba nkoze n’ubuyede, mfite aho ntaha, sinongere kuba nagwa mu bishuko byo kujya muri aba bagabo.”

Umuyobozi w’Umurenge wa Ndera, Iyamuremye François, yatangaje ko ikibazo cy’abangavu baterwa inda z’imburagihe kigaraga muri uyu murenge kimwe n’ahandi henshi mu gihugu.

Ku kibazo cy’uyu mubyeyi yavuze ko icy’ibanze ari uko babimenye, ngo inama bamugira ni ukugana ubuyobozi bukamufasha.

Ati “Uwo mwana ntabwo twari tumuzi. Inama twamugira ni ukwegera ubuyobozi agafashwa. Tumaze kubona amakuru ye, natwe tuzakora iperereza kuko urumva ko hashize igihe kinini.”

Iyamuremye akomeza avuga ko bagiye gukomeza gukora ubukangurambaga mu miryango, bagasaba ababyeyi kwegera abana babo bakabigisha ibijyanye n’ubuzima bw’imyororokere.

Uyu murenge kandi uri gushyira imbaraga mu mahuriro y’urubyiruko atangirwamo inama ku buryo bwo kwirinda inda zitateganyijwe, kwihangira imirimo n’ibindi.

Uyu mubyeyi ukuri muto iyo avuga inkuru ye afatwa n'ikiniga akarira
Atuye mu nzu yishyura ibihumbi birindwi, ariko kuyabona ni ikigeragezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza