Kwamamaza

WASAC ihomba 35.5% by’amafaranga yagombye kwishyurwa ku mazi

Yanditswe kuya 30-08-2016 saa 16:30' na Ezechiel Mbananabo


Ikigo cy’Igihugu gishinzwe Amazi, Isuku n’Isukura (WASAC) kuri uyu wa Kane cyatangije umushinga w’imyaka itatu ugamije kucyongerera ubushobozi bwo kugabanya igihombo cy’amazi kugeza ubu kingana na 35.5%.

Imibare itangwa na Wasac igaragaza ko 35.5% by’amafaranga yagakwiye kwinjira aturutse ku mazi gitanga ataboneka.

Urugero niba hagombaga kwinjira miliyari y’amafaranga y’ubwishyu bw’abakoresha amazi, hishyurwa akabakaba miliyoni 650.

Umuyobozi Mukuru wa WASAC,James Sano, yavuze ko icyo gihombo giterwa n’impamvu zitandukanye zirimo kuba hari nk’amazi atangwa mu baturage ariko ntibishyure fagitire neza, ayoherezwa ntagere aho agomba kugera nk’uko bikwiye biturutse ku bushobozi buke bw’imiyoboro y’amazi, ameneka n’izindi.

Yagize ati “Nko muri Kigali hari nk’amazi twohereza ntagere ku bakiliya nk’uko bikwiye kuko imiyoboro yayo imaze imyaka 40 yaragenewe kugeza amazi ku bantu 350, mu gihe ubu hari abakabakaba miliyoni imwe na magana abiri.Ayo mazi aguma mu miyoboro, bivuze ko nta mafaranga aba yinjije. Ikindi hari n’ayandi atakara mu gihe cyo kuyakwirakwiza mu baturage.”

Sano yakomeje avuga ko umushinga batangije kuri uyu wa Kane uziye igihe cyane ko bafite gahunda yo kugabanya igihombo giterwa n’amazi atishyurwa kikagera kuri 25% mu myaka itanu iri imbere, ikaba ari na yo ntego ku rwego rwa Afurika kuko nta gihugu kuri uyu mugabane cyari cyayigeraho.

Uyu mushinga watewe inkunga n’Ikigo cy’Abayapani gishinzwe Iterambere Mpuzamahanga(Jica).

Ibi ngo bizagerwaho binyuze muri gahunda zitandukanye zashyizweho zirimo kongera imikorere myiza mu mashami ya WASAC hirya no hino, ndetse hakabaho amarushanwa ku buryo arushije andi gukora neza abihemberwa, gukora isuzuma buri kwezi, gutegura neza ibyo bifuza kugeraho n’ibindi.

Umuyobozi Mukuru wungirije wa Jica mu Rwanda, Ryutaro Murotoni, yavuze ko bafite abahanga mu micungire y’amazi bakabakaba 10 b’Abayapani bazafasha WASAC muri uyu mushinga ku buryo bizayongerera ubushobozi bwo kugabanya igihombo cyaturukaga ku mazi.

Yagize ati“Turifuza kubona ubushobozi bwa WASAC butera imbere nyuma y’imyaka itatu y’uyu mushinga, gusa intego yacu ni uko byanaba ibintu birambye. Nk’uko tubibona, abaturage b’Umujyi wa Kigali bariyongera ni ngombwa kongera ubushobozi mu gutunganya amazi kandi n’amafaranga akishyurwa neza.”

Aba batekinisiye b’abayapani bazatanga inkunga mu bya tekiniki, bazajya bakorana n’abakozi ba WASAC mu rwego rwo kubasangiza ubunararibonye.

Baturuka mu kigo kizobereye mu gukwirakwiza amazi no kugabanya igihombo kiyaturukaho mu Mujyi wa Yokohama mu Buyapani.

Igihombo gituruka ku mazi si umwihariko ku Rwanda

WASAC igaragaza ko igihombo gituruka ku mazi atari umwihariko w’u Rwanda gusa kuko kiboneka no mu bindi bihugu birimo n’ibyateye imbere.

Mu bihugu byo munsi y’ubutayu bwa Sahara haboneka igohombo cy’amazi kigana na 50%, mu Bwongereza bari kuri 20%, mu gihe mu Buyapani bwateye imbere mu gucunga amazi bahomba hagati ya 7% na 10% by’amafaranga yagombaga kwinjira aturutse ku mazi.

Guverinoma y’u Rwanda yihaye intego y’uko bitarenze umwaka wa 2017 Abanyarwanda bose 100% baba bagerwaho n’amazi meza, bavuye kuri 74.2% mu 2010.

Ni mu gihe abaturage hirya no hino cyane cyane mu Mujyi wa Kigali badasiba gutaka kubura amazi.

Umuyobozi wa WASC , James Sano
Umuhango wo gutangiza uyu mushinga witabiriwe n'abayobozi b'amashami ya WASAC
Umuyobozi wungirije wa Jica mu Rwanda, Ryutaro Muroton

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved