Volkswagen igiye kugeza ku isoko ry’u Rwanda imodoka zikoresha amashanyarazi

Yanditswe na Rabbi Malo Umucunguzi
Kuya 14 Kanama 2019 saa 04:35
Yasuwe :
0 0

Umuyobozi w’ishami ry’uruganda rwa Volkswagen ruteranyiriza imodoka mu Rwanda, Michaella Rugwizangoga, yavuze ko mbere y’uko uyu mwaka urangira ruzaba rwagejeje ku isoko ry’u Rwanda zimwe mu modoka zarwo zikoresha amashanyarazi.

Rugwizangoga yabivugiye mu kiganiro urubyiruko rwagiranye na Perezida Paul Kagame, cyabereye mu Intare Conference Arena.

Yavuze ko mu myaka itatu ishize ubwo Volkswagen yashakaga kwagura ibikorwa byayo hanze ya Afurika y’Epfo bikagera muri Afurika yo munsi y’ubutayu bwa Sahara, barebye ku bihugu byinshi bitegereza ubukungu, umutekano, politiki, amahoro n’ibindi, u Rwanda ruza ku isonga.

Imirimo yahise itangirira mu Rwanda mbere yo kwagukira muri Ghana, Ethiopia, Nigeria n’ahandi, ndetse ubu ishoramari ntirikiri mu kuba buri muntu wese yagura imodoka ye bwite.

Rugwizangoga yagize ati "Nubwo duteranyiriza imodoka mu gihugu, turimo kunoza uburyo bwo kwifashishwa mu ngendo tunareba ikintu gishya twashyira ku isoko mu myaka iri imbere."

Yavuze ko mu gihe imodoka zigezweho ari izikoresha amashanyarazi, Volkswagen Group nayo irimo gushyira imbaraga muri uru rugendo, ndetse ko mu minsi mike zizagera mu Rwanda.

Ati "Mu mwaka umwe ushize dukora, uruganda rwahanze imirimo isanga 150 ku ba enjeniyeri, abatekinisiye bize imyuga n’ubumenyingiro n’abashoferi, kandi ntabwo tuzagarukira aho."

"Nk’uko mubizi hagezweho gukoresha amashanyarazi. Kuva mu 2025, VW Group izakora imodoka zikoresha amashanyarazi gusa, kandi mbere y’uko umwaka wa 2019 urangira, tuzaba dufite imodoka zikoresha amashanyarazi mu Rwanda, dutangire kwitegura umwaka wa 2025 n’ibihe biri imbere."

Inganda zikomeye nka General Motors na Volkswagen zikomeje gushyira imbaraga mu gukora imodoka zikoresha amashanyarazi gusa, zisimbura izari zatekerejweho mbere zihuza uburyo bw’amashanyarazi n’ibikomoka kuri peteroli zo mu bwoko bwa hybrid.

Ni uburyo buzahuza neza n’amabwiriza akomeje gushyirwaho yo kugabanya imyotsi isohorwa n’imodoka, mu rwego rwo kurengera ibidukikije no kurwanya ihumana ry’ikirere.

VW iheruka gutangaza ko bitarenze uyu mwaka izatangira gukorera imodoka zikoreshwa n’amashanyarazi mu nganda zayo mu Burayi, Aziya no mu ruganda rwa Chattanooga muri Leta Zunze Ubumwe za Amerika ruzashorwamo miliyoni $800.

Volkswagen Group iteganya gushora miliyari €30 mu gukora imodoka zikoresha mashanyarazi, aho iteganya kongera ubwoko bw’imodoka zikoresha amashanyarazi gusa, zikava ku bwoko butandatu bukagera kuri 50 bitarenze umwaka wa 2025.

VW kandi ivuga ko irimo gukora ibishoboka mu kunoza uburyo bwo kongera amashanyarazi mu modoka bizwi nka ‘charging’, aho mu gihe kiri imbere abakoresha izi modoka bazatangira kwifashisha ingufu zitangiza ibidukikije zikorwa na Elli Group.

Volkswagen yamaze gushyira hanze imodoka zayo za mbere zikoresha amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza