Uwizeyimana Evode yavuze ku makosa y’ababyeyi ashobora gutuma abana basambanywa

Yanditswe na Evariste Nsengimana
Kuya 21 Ukwakira 2018 saa 04:42
Yasuwe :
0 0

Ababyeyi n’abandi bafite kurera abana mu nshingano, bakebuwe ku makosa bakora ashobora gutuma abana babo basambanywa, yaba hagati yabo cyangwa bagafatwa n’ababitaho.

Hagati y’umwaka wa 2016 na 2018, abantu 2 728 bahaniwe icyaha cyo gusambanya abana mu Rwanda, bivuze ko n’abasambanyijwe bajya kungana gutyo.

Umunyamabanga wa Leta muri Minisiteri y’ubutabera ushinzwe Itegeko Nshinga n’andi mategeko, Evode Uwizeyimana, yavuze ko hari igihe abana basambanywa bitewe n’uburangare bw’ababyeyi.

Ni mu kiganiro ‘kubaza bitera kumenya’ cyatambutse kuri Radio Rwanda kuri iki cyumweru, cyagarutse ku mavugurura yakozwe ku mategeko ahana ibyaha mu Rwanda.

Uwizeyimana yavuze ko hari ibibazo bikunze kugaragara mu Rwanda by’abana n’urubyiruko basambanywa, wakurikirana ugasanga ababyeyi nabo babigiramo uruhare.

Ati “Ugafata mudasowa ukayisigira abana. Nk’ubu mudasobwa na televiziyo byabaye ibikoresho by’abana. Ahandi bagira uburyo bwo kurinda abana kureba filimi z’urukozasoni.”

Yatanze urugero aho mu bihugu bimwe na bimwe bafite uburyo bwo kugenzura uko abana bakoresha televiziyo, ku buryo iyo bagiye kureba filimi z’urukozasoni sheni bagiye kuzirebaho zihita zimenyesha ababyeyi bakaba batabara, ariko mu Rwanda bidahari.

Uwizeyimana ati “No muri mudasobwa, umwana aririrwa areba Pronogarafi, muzita ngo ni ‘filimi z’urukozasoni’, ibyo byose bibigiramo uruhare.”

Yanavuze ko kubera iterambere usanga ababyeyi bibera mu kazi, bigatuma batita ku mibereho y’abana babo.

Ati “Rwa ruhare ku bana b’abakobwa, urwa ba nyirasenge uyu munsi rurakorwa nande? Sosiyete yarahindutse, Isi rihuta ariko dukwiye kuba tureba ngo ni igiki gisimbura rwa ruhare rw’umubyeyi.”

Yavuze ko abakozi bo mu rugo ari ho bahera bakirirwa basambana hagati yabo cyangwa bagasambanya abana barera, asaba ko bifatirwa ingamba zihamye zo kubikumira.

Ingingo ya 133 y’igitabo cy’amategeko ahana y’u Rwanda ivuga ko uhamijwe icyaha cyo gusambanya umwana ahanishwa igifungo kitari munsi y’imyaka 20 ariko kitarenze imyaka 25.

Iyo gusambanya umwana byakorewe ku mwana uri munsi y’imyaka 14, igihano kiba igifungo cya burundu kidashobora kugabanywa kubera impamvu nyoroshyacyaha

Iyo gusambanya umwana ufite cyangwa urengeje imyaka 14 byamuteye indwara idakira cyangwa ubumuga, igihano kiba igifungo cya burundu.

Iyo kandi byakurikiwe no kubana nk’umugabo n’umugore, igihano kiba igifungo cya burundu kidashobora kugabanywa kubera impamvu nyoroshyacyaha.

Umunyamabanga wa Leta muri Minisiteri y’ubutabera ushinzwe Itegeko Nshinga n’andi mategeko, Evode Uwizeyimana, yakebuye ababyeyi ku makosa bakora ashobora gutuma abana basambanywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza