Kwamamaza

Uwiga ubumenyingiro ntabwo ari udafite icyo azi - Rwamukwaya

Yanditswe kuya 26-10-2016 saa 07:58' na Tombola Felicie


Umunyamabanga wa Leta ushinzwe amashuri y’imyuga n’Ubumenyingiro, Rwamukwaya Olivier, yongeye gukebura abatekereza ko amashuri y’imyuga n’ubumenyingiro aganwa n’abafite ubushobozi buke ko ari ukwibeshya cyane kuko bitunze ababikora.

Ubwo hasurwaga ibice bitandukanye nk’inganda, udukiriro,amakoperative n’ibigo bikorwamo n’abihangiye imirimo mu bukangurambaga bwa NEP-Kora Wigire bwo gushishikariza abagore, urubyiruko, abafite ubumuga n’abandi bose kwitabira imyuga n’ubumenyingiro; hagaragajwe ko amasomo y’imyuga adakwiye gufatwa nk’ayabananiwe ibindi kuko ariyo itanga akazi kihuse kandi vuba.

Rwamukwaya yagize ati “Uwiga ubumenyingiro ntabwo ari udafite icyo azi namba . Mu bakora aka kazi k’imyuga harimo n’abize ibindi bintu bitandukanye mu mashuri y’ubumenyi rusanze.”

“Iyo uje warize amasomo y’ubumenyi rusange urafashwa, ugahabwa ubumenyingiro, ugateza imbere imibereho yawe utarindiriye byanze bikunze gukoresha bwa bumenyi rusange wize. Ibyo ntibikuyeho ko igihe amahirwe abonetse wakoresha bwa bumenyi rusange ariko hagati aho ntube wakora mu mifuka ngo ntacyo mfite cyo gukora , ntube wasabiriza.”

Yakomeje avuga ko ubukangurambaga bwa NEP-Kora Wigire bugamije gushishikariza abatarabijyamo kubyitabira ariko kandi no kureba umusaruro umaze kubivamo kuva iyi gahunda yatangira muri 2014.

Ati “ Twifuje kureba umusaruro umaze kuva muri Kora Wigire,ni byiza ko tutavuga gusa ahubwo tunerekane ibikorwa byavuyemo.Mu buhamya batanga ni uko imibereho yabo yahindutse bagereraninyije na mbere ”

Tuyizere Leuben warangije kaminuza mu by’ubuvuzi bw’amatungo yavuze ko yaje gusanga bitamwinjiriza cyane nk’uko abyifuza bituma afata umwanzuro wo kujya kwiga uko baconga amabuye.

At “ Nabanje gukora ibijyanye n’ubuvuzi bw’amatungo ariko nta musaruro nabibonagamo. Nafashe umwanzuro wo kujya kwiga ubumenyingiro bwo guconga amabuye, byahinduye ubuzima bwanjye ubu nditunze, hari abo ndihirira amashuri y’imyuga kuko nasanze ari ibintu byiza nubwo njyewe nayagiyemo nyuma.”

Mushimiyimana Esperance we yarangije amashuri yisumbuye ariko ngo amaze kugura inka ebyiri, azakurikizaho kwizigamira byose abikesha guconga amabuye.

Mu ruganda C&H Garment rukora imyenda ruherereye ahagenewe inganda,Uwambajemariya Jacqueline ukora akazi ko gufuma, we yatangaje ko yize uburezi nyuma abura akazi ariko uru ruganda rwamuvanye mu bwigunge.

Ati “Uru guranda rwaradufashije cyane, kuko akazi nkora gatuma nita ku bana banjye n’umugabo kandi mbere twaryaga bitugoye. Nubwo nize uburezi sinigeze nterwa isoni no kuza kwiga gufuma kuko mbona ko binyinjiriza amafaranga”

Uku kwezi k’ubukangurambaga bwa NEP-Kora Wigire buje gutuma abaturage bamenya gahunda zihari zo kubafasha kwihangira imirimo dore ko imihigo ya 2015/2016 yagaragaje ko abaturage bo hasi batazi gahunda ya Hanga Umurimo ndetse n’inzego zigomba kuyibafashamo.

Ubu bukangurambaga buzazenguruka uturere 30 tw’igihugu, hasurwa ibyo gahunda ya Kora Wigire yagejeje ku bayitabiriye ndetse n’abandi berekwa ibyiza biyirimo bikazagirwamo uruhare na Minisiteri esheshatu, ibigo12 bizishamikiyeheho ndetse n’uturere twose.

Ubu bukangurambaga bwatangiye tariki ya 21 Ukwakira buzasozwa tariki ya 20 Ugushyingo 2016 bufite insanganyamatsiko igira iti “Twiteze imbere, twihangira imirimo”.

Uruganda rwo kudoda rwatanze akazi ku bantu basaga 900
Abize muri kaminuza baza kwiga guconga amabuye
Inzego zitandukanye zeretswe aho kwihangira umurimo bigejeje ababyinjiyemo
Guconga amabuye no kuyubaka mu muhanda byabateje imbere
Agakiriro ka Gahanga
Abakora mu ruganda bahinduye ubuzima

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved