Kwamamaza

Abanyereza ibigenewe abaturage basabiwe ibihano bikomeye nk’uko byakozwe muri Koreya

Yanditswe kuya 18-11-2016 saa 11:43' na Ntakirutimana Deus


Mu nama Nyunguranabitekerezo yahuje abagize Guverinoma, abasenateri, abayobozi b’Uturere n’abo mu zindi nzego zitandukanye za Leta, bahurije ku busabe bw’uko abayobozi bagaragayeho amakosa arimo kwiba, kunyereza ibigenewe abatishoboye bajya bahabwa ibihano bikomeye.

Iyi nama yateguwe na Sena igamije kungurana ibitekerezo ku ishyirwa mu bikorwa rya gahunda za Leta zo kuvana Abanyarwanda mu bukene yabaye ku wa Kane tariki ya 17 Ugushyingo 2016.

Perezida wa Sena,Bernard Makuza, yibukije ko hari byinshi byakozwe mu rwego rw’izo gahunda zikavana bamwe mu bukene, ariko ko hari n’amakosa akomeye yagiye azigaragaramo.

Yifashishije raporo y’Umugenzuzi Mukuru w’Imari ya Leta, yavuze ko igaragaza ko hari miliyoni zigera kuri 557 z’amafaranga y’u Rwanda zanyerejwe muri gahunda ya Girinka Munyarwanda, 454 zo muri gahunda y’Ubudehe na 269 zanyerejwe muri VUP.

Minisitiri w’Imari n’Igenamigambi, Gatete Claver, yagaragaje ko izo gahunda zagiye zinyerezwamo amafaranga menshi ku buryo byagoye leta kuziba icyo cyuho.

Yagize ati “Aha ngaha hari ibintu bifatika, hari mituelle de santé twakurikiranye tugakora igenzura mu gihugu hose tureba ukuntu ayo mafaranga yanyerejwe mu buryo utasubiramo hano, bubi cyane. Twagombye guhagarika porogaramu nyinshi za Minisante, za Minaloc kugira ngo twongere twishyure miliyari zirenga 13.6 z’amafaranga y’u Rwanda hagati y’umwaka, ku mafaranga abaturage bitangiye, abagenewe , batagizemo uruhare urwo ari rwo rwose mu kuyanyereza.”

Gatete yavuze ko muri izo gahunda ariho yamenyeye ijambo "gutekinika", aho abantu bagendaga babeshya imibare bagenzurwa bagasanga itandukanye n’ibyo bavugaga.

Ati “Ni ibintu ibiteye agahinda, ibintu bijyanye n’ubudehe, gahunda za VUP na Minecofin yigeze gufata icyemezo cyo kujya yiyishyurira umuntu itayacishije ku bayobozi biteza induru ngo twakoze amahano, ariko umuntu yitwa Gatete ariko bati amafaranga uyashyire kuri konti yitwa iya Gatera.”

Yavuze ko ayo makosa yagiye agaragara ndetse ko bose babyiboneye no muri gahunda za girinka, ku buryo nta ruhare rw’umuturage rurimo.

Ati “Ku bigo nderabuzima ibintu twabonye ntibigira uko bingana, ku buryo ejo bundi twashyizeho uburyo bwo kwishyura hakoreshejwe ikoranabuhanga, kuri ibyo bigo ukumva umuntu araguterefonnye akakubwira ngo hari akantu mwashyizeho katari keza, kuko twajyaga twiyishyurira imishahara. Ukamubwira uti ‘ariko se urabyemerewe’? Ati ‘oya, ariko byajyaga bitworohera’, kuko mwashyizeho ubwo buryo bwamubujije kugira uburenganzira ku mafaranga.”

Minisitiri w’Ubutegetsi bw’Igihugu, Francis Kaboneka, nawe yakomoje kuri ayo makosa atandukanye yagiye akorwa n’abo bayobozi yita ’ibisambo’.

Ati “Ibi ng’ibi turimo kubikora tunabijyanisha na bamwe mu bayobozi bagiye baba… reka mbite ibisambo, bakarya ibintu by’abantu aribo bakabaye babafasha.”

Muri Koreya wibaga umufuka wa sima bakakwica

Abayobozi batandukanye barimo ab’uturere basabye ko abayobozi bikubira ibyagenewe abaturage atari abo kwihanganirwa.

Gasana Richard uyobora Gatsibo yagize ati “Uko twicara tujya imigambi ku buryo abaturage bacu bava mu bukene, hari abandi nabo barekerereje bavuga bati iyi gahunda twayivanamo iki? ( kwiba) […] Iyo bamenyekanye njyewe rwose tubwizanyije ukuri uburyo bakurikiranwa burajenjetse. Kubera ko umuntu ararya iby’abaturage, akarekurwa ngo akurikiranwe ari hanze, niwe leta iri kugaburira yakabaye ari kwigaburira.”

Yavuze ko ukekwa wese yagombye gukurikiranwa ,nkuko babikoze mu ntara y’u Burasirazuba mu minsi yashize ubwo bashakishaga abibaga inka bakaza kubabona bafatanyije n’abaturage kandi bakabyemera.

Ati “N’abo rero kuvuga ngo nta bimenyetso biba bihari, no kuvuga ngo abaturage barabavuga byibura rimwe, kabiri, gatatu, birahagije ngo bakurikiranwe."

Gasana yavuze ko hari ibihugu byateye imbere kubera ibihano bikomeye byafatirwaga ababaga bakoze ibyaha, bigatuma abandi batinya kubikora, bityo akemeza ko no mu Rwanda haramutse hakajijwe ibihano n’abakora ibyaha bagabanuka. Aha yatanze urugero rwo muri Koreya y’Epfo.

Ati “Ariko umuntu wibaga umufuka wa sima icyo gihe bari bagifite igihano cy’urupfu baramwicaga, sinabonye bamwica narabisomye, bakamushyira ku giti imbere y’abantu bakamwica ngo yariye umufuka umwe wa sima. Niyo mpamvu Koreya yahise ikira vuba, abantu babonaga politiki zo gukiza abaturage bakazitinya nkuko umwana akora ku muriro ejo ntiyongere kuwukoraho.”

Yakomeje agira ati“ Aha rero banyakubahwa, mureke politiki zirahari dufatanye guhana abazica, ibihano bibe bikomeye ku bakora ibyaha. Inkunga nto ikomatanyije ku bakene, n’ibihano bikomatanyije bikomeye ku bakora ibyaha.”

Aha Minisitiri Kaboneka yavuze ko hafashwe ingamba zitandukanye zirimo gushyiraho urwego rw’ubugenzuzi rukurikirana umunsi ku wundi ishyirwa mu bikorwa ry’izo gahunda zigamije kuvana abaturage mu bukene.

Ati “Ubu aho tugeze ubigaragayemo arakurikiranwa , byaduhaye n’ishusho y’uko mu kubishyira mu bikorwa hari ahabaye intege nke abayobozi babigiramo uruhare rwo kubirigisa cyangwa kubikoresha nabi. Icyo nababwira ni uko abenshi bamaze kugaragara, hari abamaze gufungwa, hari abamaze no guhagarikwa cyangwa kwirukanwa ku kazi kugira ngo bamenye y’uko iby’umuturage utabikoresha uko wishakiye."

Mu minsi yashize hagiye havugwa inkundura y’abayobozi batandukanye bagiye begura barimo Abanyamabanga Nshingwabikorwa b’imirenge, abayobozi ku rwego rw’uturere, ariko abenshi bavugaga ko beguye ku mpamvu zabo bwite.

Minisitiri w'Uburinganire n'Iterambere ry'Umuryango, Espérance Nyirasafari (iburyo) nawe yari yitabiriye ibi biganiro
Minisitiri w'Imari n'Igenamigambi, Amb. Claber Gatete, yari muri ibi biganiro
Perezida wa Sena, Bernard Makuza
Senateri Gakuba Jeanne D'Arc na Minisitiri Francis Kaboneka
Senateri Sindikubwabo Jean Nepomuscene
Gatete yavuze ko ijambo gutekinika yarimenye kubera abanyereza ibigenewe abaturage

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved