Uwahamijwe icyaha cyo gufata ku ngufu ashobora kuzajya ahabwa akato muri rubanda

Yanditswe na Evariste Nsengimana
Kuya 29 Ugushyingo 2017 saa 05:46
Yasuwe :
0 0

Perezida w’Urukiko rukuru, Kaliwabo Charles, yasabye ko umuntu wasambanyije umwana cyangwa undi wese wafashe undi ku ngufu, urukiko rukabimuhamya, ku gihano ahawe hakwiyongeraho guhabwa akato muri rubanda, umwirondoro we ugashyirwa mu itangazamakuru n’ahandi hahurira abantu benshi bakamumenya bakanamufata nk’umugizi wa nabi na nyuma y’uko afunguwe.

Ubusanzwe igitabo cy’amategeko ahana y’u Rwanda giteganya ibihano bitandukanye ku muntu wahamijwe ibyaha by’ihohotera rishingiye ku gitsina.

Yavuze ko uwasambanyije umwana ahanishwa igifungo cya burundu; uwafashe umukuru ku ngufu agahanishwa igifungo kiri hagati y’imyaka itanu n’irindwi, gishobora kugera kuri burundu bitewe n’uburyo byakozwemo; uwahohoteye uwo bashakanye ahabwa igifungo kiri hagati y’amezi abiri n’atandatu naho uwashatse umugore utaruzuza imyaka y’ubukure agahanishwa gufungwa kuva ku mezi atandatu n’imyaka ibiri.

Mu kiganiro Kaliwabo yahaye abanyamakuru n’izindi nzego, kigamije gusobanura ibizakorwa mu bukangurambaga bwo kurwanya ihohoterwa rikorerwa abagore n’abana, yagaragaje ko uwafashwe ku ngufu asigarana igikomere ubuzima bwose ariko uwabimukoreye nawe akaba akwiye guhabwa akato nawe ubuzima bwe.

Bimwe mu bizakorwa mu bukangurambaga kuva kuwa 24 Ugushyingo kugera kuwa 10 Ukuboza 2017, hazibandwa ku gushishikariza abanyarwanda kudahishira ihohoterwa rishingiye ku gitsina no mu ngo; kuburanisha imanza zisaga 440, zingana na 1/5 cy’izaburanishwaga mu gihe cy’umwaka wose.

Kaliwabo yabanje kunenga imiryango y’abana bafatwa ku ngufu bakabipfukirana, cyane cyane mu gihe uwabikoze yemeye kumugira umugore, avuga ko bibagiraho ingaruka mu buzima bwabo bwose kandi ko ingamba zihari zo guhana.

Yagize ati “Buriya umwana wafashwe ku ngufu ni ikintu kimugiraho ingaruka ku buzima bwose. Twe twumva ko iyo wahannye umuntu ukamuhanisha gufungwa burundu, uwahohotewe aba afite igikomere cy’ubuzima bwe bwose kidashobora gukemuka. Ingamba rero nubwo tuvuga izo guhana, hagomba izirenze kuko guhana umunyabyaha byonyine ntibigarura uwahohotewe aho yari asanzwe.”

Yavuze ko iyo uwahawe icyo gihano akakirangiza agaruka mu muryango, rimwe na rimwe akaba yafatwa nk’inyangamugayo aho atuye kandi yarasize icyasha k’uwo yahohoteye.

Yongeye ati “Twumva hari hakwiye amatangazo ahamye y’uwahamwe n’icyaha cy’ihohotera rishingiye ku gitsina. Mu yandi magambo, akagirwa ikivume mu muryango [..] Ku bwacu, twumva bidakwiye kugarukira mu itangazamakuru ahubwo amazina ye akwiye kumanikwa ku mududugu w’iwabo bakamenya ngo hari abantu bahamwe n’icyaha cy’ihohotera rishingiye ku gitsina, ntibandike uwarikorewe, umuntu wese ugiye gushaka icyangombwa akabona izina rya runaka, yaza gutereta umukobwa wawe ukabimenya.”

Yavuze ko hari igihe usanga umuntu ahanwe inshuro irenze imwe kuri icyo cyaha, ko bikozwe gutyo yazajya agira ipfunwe mu gihe abantu bose bamuzi.

Kaliwabo yasobanuye ko ubusanzwe umuntu wakatiwe n’urukiko amategeko ateganya ko imyanzuro yarwo yashyirwa ahabona ariko avuga ko uwashyiriwe umwirondoro ku karubanda atavuga ko yahohotewe, gusa ngo inzego bireba cyane cyane Minisiteri y’uburinganire n’iterambere ry’umuryango zigomba kwiga neza uko byashyirwa mu bikorwa.

Mu mwaka wa 2014/15, u Rwanda rwakiriye imanza ziregwamo ibyaha by’ihohoterwa rishingiye ku gitsina 2321; mu 2015/16 hakirwa 2645; mu 2016/17 hakirwa 1869. Mu 2014/15 haburanishijwe 1844; mu 2015/16 zari 1920 naho mu 2016/17 ziba 1951 kandi hagati ya 80 na 90% ya zo abaregwaga bahamijwe icyaha.

Perezida w’Urukiko rukuru, Kaliwabo Charles

[email protected]he.rw


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza