UTAB yabonye abayobozi bashya basimbura abarimo Padiri Nyombayire bayiyoboraga

Yanditswe na Cyprien Niyomwungeri
Kuya 23 Ugushyingo 2019 saa 01:43
Yasuwe :
0 0

Kaminuza y’Ikoranabuhanga n’Ubugeni ya Byumba (UTAB), yashyizeho abayobozi bashya b’agateganyo basimbura Padiri Prof Dr Nyombayire Faustin wayoboraga iyi Kaminuza na Niyibizi Mbabazi Justine wari ushinzwe Imari yayo bakuweho nyuma y’ibibazo bagiranye by’imikoranire.

Abayobozi bashyizweho kuri uyu wa Gatanu n’inama ya komite y’Inteko rusange y’umuryango UTAB washinze iyi Kaminuza, ni Dr Niyonzima Eliezer wasimbuye Padiri Nyombayire na Benjamin Niyonshuti wongerewe inshingano zari zisanzwe ari iza Mbabazi Justine.

Kuwa Kane w’iki cyumweru nibwo Minisitiri w’Uburezi Dr Eugène Mutimura, yatangaje ko hafashwe icyemezo cyo gukuraho abari abayobozi ba UTAB, kubera umwuka mubi uri hagati yabo ndetse na Perezida w’Inama y’ubutegetsi Dr Ndahiro Alfred akavaho agasimburwa n’uwari umwungirije kuko ntacyo yakoze mu gukemura ikibazo.

Padiri Nyombayire n’ubundi yari amaze iminsi yandikiwe ibaruwa na Mgr Nzakamwita amumenyesha ko amuhinduriye ubutumwa bityo yakwitegura gusimburwa n’undi ku buyobozi bwa UTAB.

Umushumba wa Diyosezi ya Byumba, akaba uhagarariye UTAB mu mategeko n’umuvugizi wayo, Nzakamwita Servilien, yabwiye IGIHE ko abayobozi basimbujwe nyuma yo kubasaba gusezera mu nyandiko.

Ati “Twabasabye gusezera kandi barabikora, twashyizeho abandi bayobozi bashya bafatanya n’abo bahasanze, abarimu. Umuyobozi mushya ni umwarimu uhasanzwe wayoboraga ishami ry’inderabarezi, umwanya w’umucungamutungo wa Kaminuza twasabye uwari wungirije uwavuyeho kuba akomeje imirimo hamwe n’abandi bakozi bashinzwe icungamutungo”.

Yavuze ko aba bayobozi bashyizweho mu gihe cy’inzibacyuho, bakaba bagiye kurambagiza abandi bakozi baboneka bakajyaho.

Mgr Nzakamwita yashimiye Padiri Nyombayire wasanze kaminuza ikiri umushike agakoramo umurimo ukomeye cyane ndetse n’ushinzwe umutungo akaba yaritanze. Mu byo bakoze ni inyubako.

Aba bayobozi bafite umukoro wa mbere wo gukomeza gutegura umuhango wo gutanga impamyabumenyi uteganyijwe kuwa 12 Ukuboza 2019.

Muri UTAB hari ikibazo cy’imiyoborere itanoze aho abayobozi bo hejuru ba Kaminuza bari bafite ubwumvikane buke ubwabo ariko bikototera n’ubwumvikane bw’abandi bakorana nabo.

Mgr Nzakamwita avuga ko ‘ibyo bibazo nubwo byavugishije abantu ariko ntabwo byari bikakaye ndetse ku by’Imana byari bitaragera mu barimu n’abanyeshuri kuko byari hagati y’abantu babiri gusa’.

Mu igenzura kandi ryakozwe n’Inama Nkuru y’amashuri makuru na za Kaminuza (HEC), hagaragaye ibitanoze aho hari abanyeshuri bajyanwaga muri kaminuza badafite impapuro zibajyana, ugasanga umunyeshuri ari mu mwaka wa kabiri, uwa gatatu nta kigaragaza amanota yabonye ku yindi kaminuza yavuyeho.

UTAB yashinzwe mu 2006, yigisha amasomo y’Ubugeni, Ivugururamibereho rigamije iterambere ry’Abanyarwanda, gucunga umutungo no kwimakaza iterambere, abarezi babereye kurerera u Rwanda mu bumenyi n’Ubumenyamuntu, Ubuhinzi n’Ubworozi, kubungabunga Ibidukikije n’Ingufu zisubira.

Kaminuza ya UTAB iherereye mu Karere ka Gicumbi imaze imyaka hafi 14 ikora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza