Kwamamaza

Ushaka kuzana iterabwoba tugomba kumukumira- IGP Gasana

Yanditswe kuya 28-08-2016 saa 12:47' na Uwishyaka Jean Louis


Umuyobozi wa Polisi y’u Rwanda, IGP Emmanuel Gasana, asaba Abanyarwanda bose guhagurukira hamwe bakarwanya icyo ari cyo cyose gishobora guhungabanya umutekano igihugu kimaze kugeraho, cyane bahangana n’ibikorwa by’iterabwoba bikomeje kototera igihugu.

Ibi uyu muyobozi yabitangaje kuri uyu wa Gatandatu tariki 27 Kanama 2016, ubwo yaganiraga n’abatwara abagenzi kuri Moto mu Mujyi wa Kigali, nyuma y’umuganda usoza ukwezi kwa Kanama, wabereye i Nyandungu, mu Karere ka Gasabo.

IGP Gasana yibukije aba bamotari ko umutekano ari ishingiro rya byose mu Rwanda, binatuma rumaze kugera kugera ku iterambere rigaragarira buri wese, ababwira ko ariko kuwugeraho bisaba ubufatanye bwa buri wese.

Yagize ati: “Umutekano ni inkingi ya mwamba mu gihugu cyacu. Iyo nta mutekano uhari, ntushobora kugira icyo ukora. Mu bihugu bitarangwamo umutekano, abantu barapfa ndetse bikanateza imidugararo n’imitungo ikangirika. U Rwanda rwo rugeze ku rwego rwo gufata umutekano nk’ikintu gikomeye.”

IGP Gasana yavuze ko abakora ibikorwa by’iterabwoba bari kugenda bakwirakwira hirya no hino ku isi, yibutsa ko mu gihe haba hatabayeho gukorera hamwe ngo babarwanye bazagera no mu Rwanda, bityo abasaba kwinjira mu rugamba rwo kurwanya ibi bikorwa n’ababikora.

Yavuze ko u Rwanda rwanyuze mu ntambara nyinshi ndetse ruranazitsinda bityo yemeza ko uzashaka kugarura intambara ndetse n’ibindi bikorwa biteza umutekano muke mu gihugu atazihanganirwa.

Yagize ati: “Byasabye ingufu nyinshi mu kurwanya no guhagarika Jenoside yakorewe Abatutsi mu 1994 ndetse ingufu nyinshi zanakoreshejwe mu kurwanya ndetse no gutsinda burundu intambara y’Abacengezi. Kuri ubu turi mu rugamba rw’iterambere ry’u Rwanda. Nta kindi kintu dukeneye. Umuntu wese ushaka kuzana indi ntambara cyangwa ushaka kuzana ibibazo birimo iby’iterabwoba, byaba ari ikibazo gikomeye. Tugomba gufatanya mu kubirwanya.”

Yakomeje agira ati “Muracyari bato, muri mu makoperative. Dushobora gufatanya tukarwanya ibyaha n’uwari we wese ushaka gutekerereza u Rwanda ndetse n’undi uwo ari we wese ushaka kujya muri iyo nzira.”

Mu bindi uyu muyobozi yibukije aba bamotari ko bagomba kurwanya, harimo ibiyobyabwenge mu rubyiruko, icuruzwa ry’abantu, ibyaha by’ubujura mu Mujyi wa Kigali, n’ibindi.

Ubu butumwa buje bukurikira iraswa ry’abantu batatu bakekwaho ibikorwa by’iterabwoba mu Murenge wa Bugarama mu Karere ka Rusizi, ku wa 19 Kanama 2016.

Aba kandi barashwe nyuma y’umunsi umwe mu Mujyi wa Kigali, hazwi nka Nyarutarama harasiwe umugabo witwa Mbonigaba Channy wakekwagwaho ibikorwa by’iterabwoba, wishwe na polisi y’ u Rwanda nyuma yo kuyirwanya ayirasaho amasasu.

Mu mpera z’ukwezi kwa mbere uyu mwaka kandi mu Murenge wa Kimironko, hari harasiwe uwari umuyobozi w’umusigiti wa Kimironko, Sheikh Mugemangango Muhamed na we wari ukurikiranyweho ibikorwa by’iterabwoba ndetse no gushakira abayoboke umutwe w’abarwanyi wa Islamic State ukorera mu bihugu byo muri Aziya.

Kugeza ubu kandi abayoboke b’idini ya Islam bagera kuri 17, bari mu nkiko zo mu Rwanda aho bari kuburanishwa ku byaha by’iterabwoba bakurikiranyweho.

Icyo gihe ishami rya Polisi rishinzwe ubugenzacyaha (CID), ryemeje ko mu Rwanda hamaze kugaragara ibyaha by’iterabwoba, aho ryatanze urugero ko hari abantu 18 bafunzwe bakekwaho gushaka gutwika urusengero rwa ADPR mu Karere ka Gatsibo.

Ubwo yagiranaga ikiganiro n’abavuga rikijyana bo mu Ntara y’Iburengerazuba, ku wa 26 Werurwe 2016, Perezida Paul Kagame yamaganye iterabwoba n’umuntu wese warizana mu Rwanda, ndetse anavuga ko igihugu cyiteguye guhangana n’icyo kibazo.

Umuyobozi wa Polisi y’u Rwanda, IGP Emmanuel Gasana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved