Kwamamaza

“Ushaka kubaka u Rwanda rw’Abanyarwanda bagenda baseseye ntabwo ari umuyobozi”

Yanditswe kuya 2-09-2016 saa 19:10' na Ntakirutimana Deus


Iterambere u Rwanda rugenda ruganamo, ubwema, ubushongore n’ubukaka bw’uko ruhagaze mu ruhando rw’amahanga ku bijyanye no kurinda ubusugire bwarwo, isuku n’umutekano bigomba gusanishwa n’imiturire igezweho ihesha agaciro buri Munyarwanda.

U Rwanda muri ino minsi rubangamiwe no kugeza ibikorwa remezo ku baturage batuye mu bice byubatse mu kajagari, ku buryo hari n’impungenge z’uko hagezwa ubutabazi mu gihe ibyo bice byaba bihuye n’impanuka runaka zirimo inkongi n’ibindi.

Mu rwego rwo kwirinda ko icyo kibazo cyasubira kubaho mu Rwanda ruri mu cyerekezo cy’iterambere,hatangijwe gahunda y’igishushanyo mbonera cy’Umujyi wa Kigali ndetse n’indi mijyi mu Rwanda.

Abayobozi ngo bagomba kujyana n’icyo cyerekezo mu rwego rwo gushakira abaturage icyiza babarinda ibibazo bikomeye bashobora guhura na byo biteye impungenge.

Minisitiri w’Ubutegetsi bw’Igihugu Francis Kaboneka yabigaragaje ubwo aherutse guhura n’abayobozi b’Umujyi wa Kigali mu nteko rusange yabaye mu ntangiriro z’iki cyumweru.

Yagize ati “Nyarutarama[Bannyahe], Mu myembe, Kimihurura, Gitega, Cyahafi, hafashwe n’inkongi nubwo wagira ute,uretse n’imodoka ya kizimyamwoto, sindi buvuge n’igare kuko na ryo ntiryabona aho ryanyura.

N’abantu bagenda n’amaguru kugira ngo babone aho banyura ni ikibazo. Nicyo gituma tuvuga ngo ayo makosa yakozwe tuyareke akomeze akorwe cyangwa tuyakosore tunirinde n’ayandi mashya ashobora gukorwa?”

Utwo duce kandi duteye impungenge kubera ko hashobora kuba indiri y’abakora ibikorwa bihungabanya umutekano.

Umuyobozi w’akarere ka Gasabo Rwamulangwa Stephen yavuze ko i Nyarutarama muri Kangondo[Bannyahe], iyo hagize umujura wirukankanwa n’abashinzwe umutekano agahungiramo, aba agize Imana kuko abacikiramo, kubera akajagari k’inyubako zihari zigoye kuzinjiramo.

Kaboneka yagarutse ku ruhare rukomeye rw’abayobozi muri ayo makosa, ashimangira ko ukora gutyo adakwiye kwitwa umuyobozi.

Ati “Nta na hamwe hatubatswe abayobozi barebera [...]Burya iyo ushyigikiye akajagari ku nyungu zawe bwite uba uvangiye inyungu z’Abanyarwanda bitari uwo munsi bitari ejo hazaza.Uba ubashyize mu kaga igihe kirekire n’ubuzima bwabo ubushyize mu kaga. “

Ku ruhande rwa leta y’u Rwanda ngo ntizemera ko abaturage bayo bakomeza guhura n’icyo kibazo.

Kaboneka ati “U Rwanda tugezemo si urw’aho umuntu ajya mu rugo rwe asesera. Umuntu wagendaga yemeye yajya kujya mu rugo rwe akabanza agakubita ibipfukamiro hasi agasesera. Umuntu ushaka kubaka u Rwanda rw’Abanyarwanda bagenda baseseye ntabwo ari umuyobozi. Tugomba kubaka u Rwanda Abanyarwanda bagendamo bemye, umuntu yajya iwe akagenda yemye akanavayo yemye."

Minisitiri Kaboneka yihanije abayobozi bo mu mujyi wa Kigali, mu rurembo rw’u Rwanda, batubahiriza inshingano zabo bagakingira ikibaba abubaka mu buryo bw’akajagari.

Ati “ ‘Nk’abayobozi rero b’Umujyi wa Kigali nagira ngo mbakangurire gucika kuri iyo ngeso yo gushyigikira akajagari, yo kubona akajagari kubakwa abantu barebera kuko ntakubakwa abayobozi batabona[...]Nk’umujyi wa Kigali ni iki twakora ngo uwinjira muri Kigali amenye ko ariho yinjiye koko!”

Abanga kwiteranya bazabibazwa n’amateka

Bamwe mu bayobozi bashyigikira akajagari mu myubakire barimo abavuga ko banga kwiteranya n’abo bafitanye amasano abo baziranye n’abo bafite ibindi bahuriyeho, abakora gutyo na bo ngo amateka azabibabaza.

Ati “Hari uwo nigeze kuganira na we arambwira ngo erega turabyumva ariko mba nanga kwiteranya. Namubwiye ibintu bibiri nti ‘hitamo kwiteranya ufashe Abanyarwanda ejo bazabe bakwibuka, cyangwa hitamo kwanga kwiteranya urohe abo ushinzwe kuyobora."

Yongeyeho ati ”Shaka icyiza cy’abo ushinzwe kuyobora, iyo bageze kuri icyo cyiza uba wabyungukiyemo, nawe icyo cyiza ntikigusiga, ariko ushobora gushaka ikiza ku giti cyawe, ukanakigeraho ariko ntikizaramba, kuko ba bandi ushinzwe kuyobora wakandamije ukanabazamukiraho ukagera ku cyo ushaka ku giti cyawe ejo nibo bazagaruka bagasenya ibyo wakoze.”

Umuyobozi wanga kwiteranya ngo ntacyo ashobora kugeza ku gihugu, kuko mu buyobozi byanga byakunda hari abo aba agomba kubangamira, ariko inyungu rusange.

Ati “ Bangamira inyungu z’umuntu umwe ku giti cye urokore iz’abantu benshi ushinzwe kurebera kure. Bangamira inyungu ku giti cyawe, ubabare ariko ufashe abandi Banyarwanda nushaka ubabere igitambo cyo kugera ku byiza, kuko niko kuyobora.”

Minisitiri Kaboneka yanavuze ko abibwira ko bazayobora badahura n’ibibazo bibeshya kuko kuyobora atari ukudamarara, ati” Kuyobora ni ukwitanga si ukudamarara, ni ukuvunika si ukunezerwa, si ukwishima, si ukunguka ni imvune. Ubuyobozi si ukwishakira icyiza wowe ku giti cyawe.”

Hirya no hino mu Rwanda harimo kugenda hubakwa inyubako zijyanye n’igishushanyo mbonera, ababirenzeho zigasenywa. Kaboneka akaba agaya abayobozi bakira amafaranga y’abaturage nka ruswa yo kugira ngo bubake mu kajagari, ejo zigasenywa kandi abo bayobozi bayariye.

Minisitiri Kaboneka yasabye abayobozi gutanga urugero mu gukoresha abakozi bafite ibyangombwa

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved