Kwamamaza

Ushaka amahoro y’Isi ntakwiriye kwemerera bariya bantu gukorera ku butaka bwe-Ndayisaba

Yanditswe kuya 27-09-2016 saa 08:27' na Ntakirutimana Deus


Abagize umutwe wa FDLR ndetse n’abiyita abanyapolitiki baba hanze y’u Rwanda barashinjwa gukora ibikorwa bigamije guhungabanya ubumwe n’ubwiyunge bw’Abanyarwanda bagomba kwirindwa, amahanga abacumbikiye akaba asabwa kudakomeza kubatiza umurindi.

Abanyarwanda basanga imitwe ya Politiki ikorera mu gihugu igira uruhare ruto mu kubafasha gukomeza mu nzira y’ubumwe n’ubwiyunge.

Ubwo Komisiyo y’Ubumwe n’Ubwiyunge yaganiraga n’abanyapolitiki bibumbiye mu ihuriro nyunguranabitekerezo ry’imitwe ya politiki ku wa Mbere tariki ya 26 Nzeri 2016, Umunyamabanga Nshingwabikorwa wayo Fidèle Ndayisaba yagaragaje abakomeje kubangamira iyi gahunda.

Abagamije kubangamira iyo ntego barimo abanyapolitiki bari hanze y’u Rwanda abanyarwanda basabwa kwirinda.

Ndayisaba ati “Tuzi ko hari n’abandi biyita abanyapolitiki biyemeje kugendera ku ngengabitekerezo y’amacakubiri , ndetse bakanimika ingengabitekerezo ya Jenoside, abo biyita imitwe ya politiki birumvikana ntibemewe mu gihugu cyacu, baba hirya no hino ku Isi bagira uburyo bahana amakuru na bamwe mu bayoboke bari mu mitwe ya Politiki yemewe ikorera mu Rwanda iyo ngengabitekerezo mbi yabo bakayikwirakwiza kugeza ubwo bashobora kubangamira abayoboke baba mu Rwanda.”

Fidele Ndayisaba aganira n'itangazamakuru

Ndayisaba yavuze ko abo banyapolitiki bakomeje kujijisha Abanyarwanda , imitwe ya politiki ikaba isabwa kwegera abayoboke babo kugira ngo badakomeza kubarangaza.

Ati “ Icyo dusaba imitwe ya politiki yemewe mu Rwanda n’abayoboke bayo, ni ukutarangazwa n’abo ngabo , ni ukudateshwa umwanya nabo, kubima amatwi kuko mu by’ukuri nta neza irimo, umuntu ugitekereza ku cyatanya abanyarwanda, umuntu ugitekereza irondakoko, kugarura ibikorwa byakoreka imbaga y’abanyarwanda uwo nguwo mu by’ukuri nta mwanya afite muri iki gihugu cyacu, nta n’uwo akwiriye gutesha umwanya ahubwo dukwiye kumwima amatwi.”

Abafite ingengabitekerezo bakorana n’abantu ku giti cyabo.

Ati “ Muri rusange nta mutwe wa politiki ukorera mu Rwanda wemewe uzwi ukorana n’imitwe ya politiki igendera ku ngengabitekerezo ya Jenoside n’amacakubiri,icyo tuzi ni uko hari abiyita abanyapolitiki, abiyita ko ari imitwe ya politiki ikorera hanze twumva ivuga yagize umurongo wa politiki amacakubiri n’ingengabitekerezo ya Jenoside bakigendera mu by’ukuri ku mitekerereze idaharanira ineza y’abanyarwanda.”

Umunyamabanga Nshingwabikorwa wa Komisiyo y'Ubumwe n'Ubwiyunge,Fidèle Ndayisaba

Ndayisaba yemeza ko abanyarwanda muri rusange bazi inzira batangiye n’ubwo hari bamwe muri bo bakibavangira.

Ati “ Icy’ingenzi nuko abanyarwanda bari mu gihugu benshi bakomera ku bumwe n’ubwiyunge byabo, ndetse n’ababa mu mahanga nabo bakabona igikwiye. Kuko Umunyarwanda wese ushyira mu gaciro ntakwiye kuba akirangazwa n’uwari we wese ugendera ku macakubiri n’ingengabitekerezo ya Jenoside.”

Mu rwego rwo kwirinda ko abafite ibyo bitekerezo bibi bakomeza kubikwirakwiza hirya no hino ku Isi, Ndayisaba yasabye amahanga guhaguruka.

Ati “ Dusaba ko abo bantu batahabwa urubuga haba mu bihugu bakoreramo, byanafashweho umwanzuro na Loni ko za leta zitagomba guha urubuga abantu bakwirakwiza ingengabitekerezo ya Jenoside …ni imbogamizi ku bumwe n’ubwiyunge kandi ntabwo bireba u Rwanda gusa, abo bantu iyo bahawe urubuga bishobora no guteza n’ibibazo no ku bandi baturage b’ibindi bihugu, niyo mpamvu bidakwiriye kuba umwihariko w’u Rwanda , uwo ari we wese ushaka ineza y’Isi ushaka amahoro ntakwiriye kwemerera bariya bantu gukorera ku butaka bwe.”

Yashimye ibihugu bidahwema gufata abakekwaho kugira uruhare muri Jenoside yakorewe Abatutsi, nubwo ngo hari ibitabikozwa.

Ku ruhande rw’abanyapolitiki biyemeje kudaha urwaho ushaka guhungabanya ubwo bumwe, baniyemeza kwegera abayoboke babo iyo nzira y’Ubumwe n’Ubwiyunge nk’abagena politiki igihugu kigenderaho.

Abitabiriye ikiganiro Komisiyo y’Ubumwe n’Ubwiyunge yagiranye n’abanyapolitiki bibumbiye mu ihuriro nyunguranabitekerezo ry’imitwe ya politiki

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved