USA: Mbere ya Rwanda Day, Abanyarwanda basogongeje abanyamahanga ku muco wabo

Yanditswe na Uwishyaka Jean Louis
Kuya 20 Nzeri 2016 saa 09:22
Yasuwe :
0 0

Mu gihe Abanyarwanda ndetse n’inshuti zabo baturutse imihanda yose cyane abatuye muri Leta Zunze Ubumwe za Amerika bitegura guhurira hamwe mu gikorwa ngarukamwaka cya Rwanda Cultural Day yari imenyerewe nka Rwanda Day, abatuye muri Leta ya Maine bo biyibukije zimwe mu nkingi za mwamba z’Umuco Nyarwanda.

Ni igikorwa cyabaye mu mpera z’icyumweru gishize ku wa 17 Nzeri 2016, mu Mujyi wa Portland, muri Leta ya Maine, mu rwego rw’ubusabane, kwerekana urusobe rw’imico itandukanye, ndetse no kwitegura umunsi wa Rwanda Cultural Day uteganyijwe Ku wa 24 Nzeri 2016 i San Francisco muri Leta ya California.

Uru ruhurirane rw’ibirori rwabanjirijwe n’umukino w’umupira w’amaguru wahuje ikipe y’abatuye muri Leta ya Maine ndetse n’abatuye muri Leta za Massachusetts na New Hampshire. Nyuma y’umukino hakurikiyeho ubusabane mu gikorwa cyiswe “Bye bye summer” ugenekereje mu kinyarwanda ni nko gusezera igihe cy’impeshyi.

Si ibyo gusa kuko kuri uwo munsi hari n’ikindi gikorwa cyiswe “African gala”, gisanzwe ari ngarukamwaka, gihuza abanyamahanga baturuka mu bihugu bitandukanye, bagasangira ibiganiro, amafunguro ndetse bakanataramana. By’umwihariko uyu mwaka, abari bahagarariye u Rwanda baboneyeho umwanya wo kubwira abanyamahanga ibyiza bisobetse umuco Nyarwanda, ndetse no kugaragaza bimwe muri byo birimo imbyino no guhamiriza.

Mu kiganiro cyatanzwe na Rubanzangabo Frank, umwe mu banyarwada bari ku isonga mu itegurwa ry’iki gikorwa, yerekanye indangagaciro z’umuco nyarwanda ndetse n’uruhare ufite mu iterambere ry’igihugu.

Asobanura iby’umuco nyarwanda, Rubanzangabo yabwiye abari bitabiriye iki gikorwa basaga 1000 ko umuco ari ryo zingiro ukaba n’inkingi ya mwamba y’ahazaza h’igihugu, yibutsa n’abari mu mahanga ko batagomba kwibagirwa ibijyanye n’umuco wabo.

Biteganyijwe ko mu gikorwa cya Rwanda Cultural Day nabwo hazaganirwa ku buryo bwimbitse ibijyanye n’umuco hakazaba n’imurikabikorwa rizibanda cyane ku muco Nyarwanda.

Abanyarwandakazi babyinnye kinyarwanda mu rwego rwo kugaragaza umuco Nyarwanda
Urubyiruko rw'abanyarwanda rwagaragaje umuco nyarwanda binyuze mu mbyino no guhamiriza
Abanyarwanda batuye muri Leta ya Maine no mu zindi basabanye bakina umupira w'amaguru
Umwe mu banyarwanda uba muri Leta ya Maine
Abanyamahanga bari babukereye mu kwifatanya n'abanyarwanda

Josiane Muhimpundu Diaspora/Maine


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza