USA: Abanyemari b’Abanyarwanda babukereye muri Rwanda Day i San Francisco

Yanditswe na Philbert Girinema
Kuya 24 Nzeri 2016 saa 07:57
Yasuwe :
0 0

Mu gihe kuri uyu wa Gatandatu mu Mujyi wa San Francisco ho muri California hateganyijwe umunsi ngarukamwaka wa Rwanda Day, abantu b’ingeri zose bamaze gusesekara i San Francisco. Muri aba baje baturitse mu Rwanda higanjemo Abanyemari n’abandi bakora ibikorwa by’ubushabitsi.

Ku Gicamunsi cyo kuri uyu wa Gatanu abenshi bari bamaze kugera ahazabera igikorwa nyir’izina cya Rwanda Day, muri Hotel Marriott Marquis. Mu baganiriye n’Umunyamakuru wa IGIHE uri i San Francisco batangaje ko baje biteguye guhaha byinshi bazacyura igihe bazaba basubiye mu Rwanda.

Nkusi Godfrey umwe mu bacuruzi bamaze kubaka izina mu Rwanda yabwiye IGIHE ko ubu ari inshuro ya gatandatu yitabira Rwanda Day kuva zatangira mu mwaka wa 2010, akaba ngo hari byinshi yagiye yunguka uko imyaka yagendaga ishira.

Nkusi yagize ati “Kuza muri Rwanda Day bimfasha guhura n’abacuruzi mpuzamahanga, ndetse hakaba hari inganda zikora bimwe mu bicuruzwa byanjye mpura nabo, bikamfasha kwagura ubucuruzi bwanjye ndetse no kunoza imikorere n’imyakirire y’abakiriya.”

Uyu mugabo ukunze gucuruza ibicuruzwa byiganjemo imivinyo, avuga ko muri iyi Rwanda Day ya San Francisco azanaboneraho umwanya wo kwagura ubucuruzi bwe kuko azahura n’abanyenganda bakagirana amasezerano y’ubufatanye yo guhagararira ibicuruzwa byabo mu Rwanda.

Agira ati “Nimva muri iyi Rwanda Day ya hano San Francisco nzataha njyanye ibicuruzwa bishya birimo inzoga z’ubwoko bwinshi, ubundi ibyo turangura twabikuraga mu Bwongereza, u Bubiligi, u Budage, no muri Afurika y’Epfo, ariko kuri ubu nzavugana n’abashoramari bo muri Amerika uburyo nabahagararira mu Rwanda. Ikindi ni uko mu mpera z’uyu mwaka nzagabanya ho 15% ku bicuruzwa byose ncuruza”.

Si Nkusi gusa uvuga ko Rwanda Day hari byinshi imusigira kuko n’umunyamategeko Mutabazi Abayo Claude nawe witabiriye Rwanda Day avuga ko baza baherekeje Perezida wa Repubulika ariko kandi nk’umunyamategeko wibanda mu gufasha abanyemari bo mu Rwanda mu bijyanye n’amategeko azunguka byinshi kuko azahura n’abanyamategeko bo ku rwego mpuzamahanga, ibi bikazamufasha kunguka ubumenyi busumbuyeho mu bijyanye n’amategeko y’ubucuruzi.

Mutabazi agira ati “Nk’abanyamategeko dukora amategeko y’ubucuruzi baba baje gushora imari mu Rwanda nitwe biyambaza mu bucuruzi bwabo mu Rwanda, ariko kandi mu gutangira ubucuruzi bwabo mu Rwanda bagira amasezerano mu by’ubucuruzi bibasaba ko bamenya amategeko y’igihugu bagiye gukoreramo ubu rero bizamfasha kongera ubumenyi muri ibyo.”

Muri iyi Rwanda Day nubwo biteganyijwe ko izibanda ahanini ku bijyanye n’umuco, ntibizabuza abanyemari kuganira ku bijyanye n’ubucuruzi bwabo ndetse no guhura n’abandi bo muri Leta Zunze Ubumwe za Amerika.

Umucuruzi Nkusi Godfrey
UmunyamategekoMutabazi Abayo Claude

Jean Pierre Mazimpaka- San Francisco


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza