Kwamamaza

Urwibutso Senateri Mucyo yasigiye abo yakoranye na bo

Yanditswe kuya 5-10-2016 saa 17:32' na Niyomwungeri Cyprien


Urupfu ni cyo kibi gishengura umutima wa muntu mu bibaho byose, rusigira benshi igikomere iyo rutwaye intwari nka Senateri Jean de Dieu Mucyo, umugabo benshi bita ‘umunyamutima wagiraga urugwiro rudasanzwe’.

Iherezo rya muntu! Uyu mubiri twambaye uzapfa, abemera Imana bahawe isezerano ry’uko ku munsi w’izuka imibiri y’abapfuye bizera izahuzwa n’umwuka bakazagororerwa kubaho iteka mu Isi nshya (Ibyahishuwe 21-22).

Ku bapfuye batemera Yesu/Yezu nk’umucunguzi, urupfu ni igihano gihoraho iteka ryose. Kumenya ukuri kwarwo birinda muntu kugira ubwoba butuma ahahamurwa n’urupfu (Yohana 8:32).

Urupfu ntirubabarira, rwahuranyije Senateri Mucyo mu gitondo cyo kuwa Mbere tariki ya 3 Ukwakira 2016, rwamutwaye by’igitunguro habura intambwe nke ngo yinjire mu kazi gukurikirana ubuzima bw’igihugu. Inkuru y’urupfu rwe yashegeshe benshi, yaciye umugongo igihugu, yaciye igikuba, yateye intimba irusha urusyo kuremera ku mitima y’abatabarika.

Abakoranye na Senateri Mucyo muri Minisiteri y’Ubutabera, ubushinjacyaha bukuru bwa Repubulika, Komisiyo y’Igihugu yo kurwanya Jenoside no mu Nteko Ishinga Amategeko, mu kuvuga urwibutso bamufiteho abenshi bazibiranywa n’ikiniga, bahuriza ku ngingo imwe ko “yari umunyamutima, inyangamugayo yahoranaga umucyo ku maso.”

Agahinda mu baturanyi be i Mbazi

Ni agahinda kageretse ku kandi ku abarokotse Jenoside Senateri Mucyo yafashije, mu kuvuga urwibutso bamufiteho, abenshi bamwita ‘umubyeyi w’umunyabuntu wahangayikishwaga no kubona abantu barangwa n’urukundo’.

Nyangezi Gaspard, yari inshuti magara ya Senateri Mucyo akaba n’umuturanyi we ku ivuko i Mbazi mu Karere ka Huye,ni na we wacungaga imitungo afite mu cyaro. Mu kiganiro na IGIHE yavuze ko abaturage b’i Mbazi batazibagirwa ibikorwa by’indashyikirwa yahakoze ku giti cye.

N’ikiniga cyinshi ati “Naguha nk’urugero, iwacu yazaniye amazi abaturage ku giti cye, abazanira umuriro, yubakira abatishoboye hari n’umudugudu witiriwe Mucyo, abaha amatungo yo korora, buriya n’isambu ye yari yarashyizemo amashyirahamwe y’abantu batishoboye kugirango bazamuke, yakuye benshi muri nyakatsi ku giti cye.”

Senateri Mucyo asize agahinda mu batishoboye yafashaga, by’umwihariko yari ageze kure umushinga wo kuzamura uburezi muri aka gace ndetse ngo yiteguraga gushinga ishuri ry’imyuga rifasha abatarabashije kurangiza amashuri.

Ati “Afite ishuri ry’incuke yashinze ku giti cye, yari afite intego yo kubaka amashuri abanza utsinze akazamuka uwo byanze yubatse ishuri ry’imyuga yiteguraga gukora neza.”

Mu buhamya bwumvikanagamo agahinda gakomeye, uyu muturage akomeza agira ati “Twamenyanye tukiri bato andusha imyaka ibiri. Yarankijije pe, yankuye mu rwego nari ndimo njya mu rundi, yangiriye inama. Yahoraga ambwira ngo ntugapfushe igihe ubusa jya uba inyangamugayo ubane n’abantu bose amahoro kandi ukoreshe ukuri.”

Asize umurage muri CNLG

Mu mwaka wa 2008 Mucyo yagizwe Umunyamabanga Nshingwabikorwa wa Komisiyo y’Igihugu ishinzwe kurwanya Jenoside, CNLG, kugeza mu 2015. Abakoranye nawe hari byinshi batazamwibagirwaho.

Gatabazi Claver, Umukozi ushinzwe kwibuka no gukumira Jenoside muri CNLG, yabwiye IGIHE ko yakoranye na Mucyo muri iyi Komisiyo imyaka itandatu kuva muri 2009, ariko atazibagirwa ubudasa yamubonyeho.

Yagize ati“Yari umugabo umuntu yakwigiraho byinshi yaba mu buyobozi bwite yaba no mu myitwarire ye, washoboraga kumuvomamo ibintu bizagufasha mu buzima bwabwe bwose. Urugero ni uko yari umuyobozi w’intangarugero ukwereka ikosa ryawe akarikwereka mu rwego rwo kugirango akore ibyiza ubirebereho hanyuma wikosore.”

Akomeza avuga ko muri CNLG yahasize umurage wo kwanga akarengane no gukunda akazi. Urwibutso rukomeye bamufitiho ngo ni uko yabashishikarizaga gushinga ingo kugira ngo bazikorere bagifite intege.

Ati“Abari abakozi ba hano yahoraga adushishikariza gushaka, akaguhamagara akakubaza ngo kuki udashaka urabura iki, shaka hakiri kare ukorere abana bawe n’umuryango wawe ugifite imbaraga, abenshi ba hano twashatse kubera we”.

Umusanzu we mu butabera bw’u Rwanda ntuzibagirana

Mucyo yabaye Minisitiri w’ubutabera kuwa 8 Gashyantare 1999 kugeza kuwa 21 Ukwakira 2003.

Abakoranye na we muri iyi Minisiteri bamuvuga ibigwi nk’ukibayoboye, bahuriza ku migirire ye yihariye ‘guca bugufi ndetse ngo abakozi bose bamwisanzuragaho uhereye ku bakoropaga kugeza ku bo bicaranaga mu biro’.

Umukozi ushinzwe ibikoresho muri Minisiteri y’ubutabera, Nyirakamana Consolée, yabwiye IGIHE ko Mucyo yamusanze muri iyi Minisiteri amazemo imyaka itatu akemeza adashidikanya ko yubatse umusingi w’ubutabera u Rwanda rufite ubu.

Yagize ati “Mucyo yaje hano mazemo imyaka itatu uretse no kunyobora ni umuturanyi wanjye ku ivuko i Mbazi. Iyi Minisiteri yarayizamuye ubundi ntawayimaragamo kabiri, yayigezemo Jenoside ikirangira hari akazi kenshi, sinabura kuvuga ko yayihaye umusingi akayigeza kure abandi bagakomerezaho.”

“Ku giti cyanjye sinzibagirwa ukuntu buri wese yamwisanzuragaho kandi akabanisha abakozi abatoza gukorera hamwe, kwiyumvanamo nta rwikekwe.”

Ubwo yari Minisitiri w’Ubutabera, Mucyo yatangije ubutabera bwunga binyuze mu nkiko Gacaca ndetse agakunda kujya mu magereza ashishikariza abakoze ibyaha kwirega no kwemera icyaha.

Sena isigaranye icyuho

Kuwa 29 Gicurasi 2015 nibwo Komisiyo y’Amatora yemeje ko Mucyo Jean de Dieu ariwe watorewe kuba senateri ahagarariye Intara y’Amajyepfo ku majwi 50.3%, icyo gihe akaba yari agiye kuziba icyuho cyari cyasizwe na Senateri Jean Damascene Bizimana wari wamusimbuye muri CNLG.

Amarira y’umugabo atemba ajya mu nda! Mu kuvuga kuri Senateri Mucyo mugenzi we Ntawukuriryayo Jean Damascene yagaragaraga ku maso nk’ushavuye ariko akiyumanganya. Yabwiye IGIHE ko inkuru y’urupfu rwa Mucyo yateye icyuho umuryango we, abamuzi, igihugu by’umwihariko abantu bakoranaga.

Senateri Ntawukuriryayo ni umwe mu bazi Mucyo kuko biganye mu cyiciro rusange i Save, bakajya bahurira mu mikino ubwo bigaga mu cyiciro cya kabiri cy’amashuri yisumbuye, ndetse binjirira rimwe muri Guverinoma.

Yagize ati “Ni umuntu twabanye twinjiriye rimwe muri Guverinoma y’u Rwanda mu 1999, dukorana neza no mu yindi mirimo yakoze kugeza igihe duhuriye hamwe hano muri Sena. Yagaragazaga ubuhanga nkuko yakomeje kubugaragaza n’ubwitange no kubana neza na bagenzi be nkuko twese twabanaga na we”.

Senateri Ntawukuriryayo yemeza ko Mucyo asigiye Abanyarwanda umurage wo gukunda igihugu, amahoro no kubana n’abantu neza mu ngeri zitandukanye.

Yagobotse benshi….

Abarokotse Jenoside batishoboye n’izindi ngeri z’abaturage bafashijwe na Senateri Mucyo bavuga ko urupfu rwe ari igihombo gikomeye ku buzima bwabo, bamufitiyeho urwibutso rw’iteka bashingiye ku bufasha yabahaye bukaba inkingi y’ubuzima bwabo.

Umuhanzi Senderi Eric, umwe mu bakoranye bya hafi na Senateri Mucyo mu bikorwa byo kwibuka Jenoside yakorewe Abatutsi avuga ko atazibagirwa ineza yamugiriye muri 2010 ubwo yamuteraga inkunga y’amafaranga ibihumbi 250 ngo akomeze ahange indirimbo zifasha Abanyarwanda kwibuka.

Amafaranga Mucyo yahaye Senderi yakoze indirimbo yitwa ‘Twigirire icyizere’ mu majwi n’amashusho. Iyi yayihimbye ashingiye ku mbwirwaruhame Mucyo yakundaga kuvuga zishingiye ku kwigirira icyizere.

Senderi avuga Senateri Mucyo nk’umugabo udasanzwe, warangwaga no kwicisha bugufi, agasangira na bose atarobanuye.

Yagize ati “Yacaga bugufi ntiyari igisambo, ni bake baguhamagara ngo ngwino dusangire. Ndabyibuka twari tuvuye kwibuka muri stade duhurira ku muryango wa VIP arambaza ati ‘ese ufite uko ugenda?’, ati icara mu modoka tujyane,twageze kwa Lando turaganira arambwira ngo reka twicare hano tunywe agafanta, yakundaga bose atavanguye.”

Munyanshoza Dieudonne [Mibirizi] yabwiye IGIHE ko muri 1997 ari bwo yahuye bwa mbere na Mucyo akamubwira ko yumvise indirimbo ye ‘Mibirizi’ kandi aririmba neza.

Icyo gihe ngo yamuhaye amafaranga ibihumbi 200 ngo ateze imbere ubuhanzi bwe. Avuga ko ari we wa mbere wamuteye inkunga mu myaka irenga 20 amaze akora umuziki.

Mibirizi yemeza ko ibikorwa bya Senateri Mucyo byamaze kumujyana mu ijuru. Ati “Ibikorwa ni byo bijyana umuntu mu ijuru, kandi ndizera ko yagezeyo. Sinzibagirwa ijambo yakundaga kubwira abacitse ku icumu ati ‘Nimukomere, ntimuheranwe nibyababayeho, muharanire kwiteza imbere, muve mu bwigunge musoze ikivi cy’abagiye.”

Senateri Mucyo asize umugore n’abana bane, umukobwa umwe n’abahungu batatu.

Mu 2002, Jean de Dieu Mucyo yafotowe ari mu Bubiligi. Icyo gihe yari Minisitiri w'Ubutabera
Tariki ya 19 Ukuboza 2014 ubwo Jean de Dieu Mucyo wari Umunyamabanga Nshingwabikorwa wa Komisiyo y’Igihugu yo kurwanya Jenoside yagezaga ijambo ku bari bitabiriye Inama y’Umushyikirano
Kuwa 11 Ukuboza 2014: Jean De Dieu Mucyo (akiyobora CNLG) avuga ku hazaza h’ububiko bw’inyandiko z’Inkiko Gacaca
Kuwa 24 Ukwakira 2013: Uwari Ambasaderi w’u Rwanda mu Bwongereza, Williams Nkurunziza ubwo yasuraga imurikwa ry’inyandiko zivuga kuri jenoside muri Kings College I Londres. Yari kumwe na Dr James Smith (ibumoso: uyobora Aegis Trust) na Jean de Dieu Mucyo wayoboraga CNLG
Mata 2014: Uwari Minisitiri w’Uburezi Prof. Silas Lwakabamba ari kumwe na Jean de Dieu Mucyo wayoboraga CNLG mu ifoto hamwe n’abana ku rwibutso rwa Mwurire
Jean de Dieu Mucyo ( wa Kane uturutse iburyo) mu muhango wo kwibuka ku nshuro ya 17 (mu 2011) Jenoside yakorewe Abatutsi
Jean de Dieu Mucyo (ibumoso) mu 2012 ubwo yari mu bikorwa byo kwibuka ku nshuro ya 18 Jenoside yakorewe Abatutsi
Tariki ya 15 Ukwakira 2013: Jean de Dieu Mucyo (wayoboraga CNLG) ari kumwe na Jan Kohout wari Minisitiri w’Ububanyi n’Amahanga wa Czech berekwa ibikorwa bya Aegis Trust bigamije uburezi bwubaka amahoro
16 Ukuboza 2010: Jean de Dieu Mucyo ari kumwe n’itsinda ryari ryasuye CNLG
Jean de Dieu Mucyo; Ubwo abasenateri bagezwagaho na Minisitiri w'Ububanyi n'Amahanga, Louise Mushikiwabo,uko u Rwanda rubanye n’amahanga, kuwa 09 Gashyantare 2016
Imwe mu mafoto ya nyuma yafotowe Jean de Dieu Mucyo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved