Urwego rw’Umuvunyi rwafunze babiri bakekwaho itonesha no gutanga indonke

Yanditswe na IGIHE
Kuya 25 Nyakanga 2019 saa 05:48
Yasuwe :
0 0

Urwego rw’Umuvunyi rwafunze Bigirimana Jean Damascène alias Ngamba wari Umuyobozi wungirijwe ushinzwe kwandika abantu mu Rugaga rw’Abakora imirimo ishamikiye ku buvuzi, ubu akaba akora mu bitaro bya Kaduha biri mu Ntara y’Amajyepfo.

Bigirimana akurikiranyweho icyaha cyo gufata icyemezo gishingiye ku itonesha, ubucuti, urwango, ikimenyane cyangwa icyenewabo giteganywa kandi kigahanishwa ingingo ya munani y’Itegeko No 54/2018 ryo kuwa 13/8/2018 ryerekeye kurwanya ruswa.

Ingingo ya munani y’iri tegeko ivuga ko umuntu wese ufite mu nshingano ze guha serivisi abantu, ufata icyemezo ashingiye ku itonesha, ku bucuti, ku rwango, ikimenyane cyangwa icyenewabo ku bamugana, aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri.

Bigirimana akurikiranyweho kandi icyaha cyo kwakira no gusaba impano cyangwa indonke kugira ngo hakorwe ikinyuranyije n’amategeko cyangwa ntihakorwe icyagombye gukorwa, giteganywa kandi kigahanishwa n’ingingo ya Kane y’Itegeko ryo kurwanya ruswa.

Urwego rw’Umuvunyi rwanafunze Bayavuge Espérance, ukora muri Laboratwari y’Ikigo Nderabuzima cya Janja giherereye mu Karere ka Gakenke mu Ntara y’Amajyaruguru.

Bayavuge akurikiranyweho icyaha cyo gutanga impano kugira ngo hakorwe ibinyuranyije n’amategeko, giteganywa kandi kigahanishwa ingingo ya Kane y’Itegeko ryo kurwanya ruswa.

Ingingo ya Kane ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Ibihano bivugwa mu gika cya kabiri cy’iyi ngingo ni na byo bihabwa umuntu wese utanga cyangwa usezeranya gutanga, mu buryo ubwo ari bwo bwose, indonke iyo ari yo yose, kuri we cyangwa ku wundi muntu kugira ngo hatangwe cyangwa hadatangwa serivise.

Iyo ibikorwa bivugwa mu gika cya mbere n’icya gatatu by’iyi ngingo byakozwe kugira ngo hakorwe ikinyuranyije n’amategeko, igihano kiba igifungo kirenze imyaka irindwi ariko kitarenze imyaka icumi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse, yakiriye cyangwa yatanze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza